Redentiner Osterspiel

Erster Teil

Erste Handlung

______________________________________________________________________________

Der Wächter und die Ritter.

Vigil cantat et uno vers[o] finito dicit:

195

Gy riddere unde gy helde,

Denket an de ghelde.

Deme ju ghelavet hat.

Juwer malk do mannes dat!

Oft sik dat ghevalle,

200

Ik wil ju helpen myt myme schalle.

Primus miles:

Wachter, myn leve vrunt,

Wake myt uns an desser stunt.

Wes uns truwe unde holt,

Dat vramet di sulver unde golt. [33]

Et sic ponit se dormiens.

Tunc cantet vigil et post unum versum dicit:

205

Wake, ritter kone!

Tuschen Hiddensee unde Mone

Dar se ik wol twe,

De vleten an der wilden see

An eyneme korve, des dunket my.

210

Rytter ghemeyt, nu ware dy!

Secundus miles:

Wachter, leve bole,

Segghe my wen se sint by Pole,

So wyl ik my to der were stellen

Unde spreken to mynen ghesellen.

Et sic ponit se dormiens.

Et vigil cantet et post versum dicit:

215

Wake, ritter stolt,

Unde vordene myt eren dyn golt!

Wake, rydder, id is middernachtesstunde!

Ik hore lude bleken de hunde,

Se schryen unde bellen.

220

Sprek to dynen ghesellen!

Tertius miles:

Wachter, leve neven,

Alle mynen schat wil ik dy gheven,

Dat ik moghe eyn kleyne slapen.

Werliken, ik kan nicht lengher japen

225

Van groter unrowe.

So helpe my des keysers vrowe!

Ik mut den oghen voder gheven,

Scholde ik dar umme werden vordreven.