Redentiner Osterspiel

Erster Teil

Erste Handlung

______________________________________________________________________________

Pilatus und die Ritter am Grabe.

Primus miles:

115

Nu tredet vor, gy recken,

Latet uns to grave trecken.

Dat ghelt maket den helt springhen.

Woldan, ik wil ju vore synghen!

Servus Pilati:

Wiket al ghelike,

120

Beyde arm unde rike!

Gy scholen alle van desser straten keren

Unde rumen Pylatuse myme heren.

He wil umme alzo dane sake here kamen,

Des de joden scholen nemen vramen.

Pilatus:

125

Salomon, ik holde di vor den besten.

Du scholt hir ligghen in dat westen,

Dar scholtu de stede alzo bewaren,

Dat di Jhesus nicht moghe entvaren.

Lestu di ene untslyken,

130

Ute deme lande scholtu my untwiken. [31]

Primus Miles:

Ik ga ligghen in dat westen,

Wente ik holde my ok vor den besten.

Dessen ort wil ik bewaren.

Kumpt hir jemant here varen,

135

Deme wil ik alzo moten,

He mochte sik lever laten des kynkhostes boten.

Myn swert het Mummink

Unde loset platen pantzer unde rynk,

Dat wil ik harde by my han

140

Unde wil dar mede sitten gan.

Oft he wil van dode up stan,

lk wil ene wedder to der erden slan.

Pilatus:

Sampson, du scholt hir an deme norden syn

Unde vorvullen alzo dat bot myn,

145

So du dat lon wult van my untfan.

Ik bun dyn vrunt al sunder wan.

Wes myneme denste truwe unde holt,

Ik wil dy gheven riken tzolt,

Unde bedenke dat to voren:

150

Woldat de en wart ne vorloren.

Secundus miles:

Ik legghe my hir an dat norden.

Queme hir jemant, den wolde ik morden,

Id sy tam edder wilt,

Wente ik bun gheheten Howeschilt,

155

Unde wil hir gan sitten,

Dar ik ene moghe besmytten

Mit myme vresliken swerde,

Oft he wolde upstan ut der erden.

Pilatus:

Hore, gummen Boas van Thamar,

160

Du bist an dynen synnen harde swar:

Du scholt jo bequeme syn

Unde volghen jo der lere myn.

In dat osten scholtu dy strecken.

Wolde Jhesum jement wech trecken,

165

Dar scholtu alzo sen to,

Dat he uns mer nenen schaden en do.

Tertius miles:

An dat osten wil ik my legghen

Unde dreghen my up myne brunen egghen. [32]

Myn swert dat het Klynghe

170

Unde is scharp rechte so en swynghe,

Dat ruschet an myner scheyde.

Tros! dat myner iemant beyde,

Ik wolde em dat ben beselen,

He scholde en jar an der hasen quelen!

175

Desse sulve stede wil ik kesen,

Myner ere wil ik nycht vorlesen.

Ik segghe ja dat al vor war:

Steyt he up, yd schal em werden swar.

Pilatus:

Myn truwe ridder Sadoch,

180

Du hest vram wesen wente noch.

In dat suden wil ik dy wisen,

Du scholt di dar an prisen,

Datu moghest desse tid waken.

Wente id is nicht sunder saken:

185

Scholde he an der drudden nacht upstan,

Des moste [gy] alle schande han.

Quartus miles:

Ik ga hir liggen an der suder siden.

He schal uns nycht entgan edder riden.

Krighe ik myn swert an myne hant,

190

Ik wil ene drenghen up de want,

Dat em alle syne ribben scholen knaken.

Dar to so helpet my alle wol waken

Unde latet ju den slap nicht bedregen.

Unbestroffet schal he uns nicht untvleghen.