Redentiner Osterspiel

Erster Teil

Erste Handlung

______________________________________________________________________________

Pilatus und die Juden dingen die Grabhüter.

Pilatus dicit militibus:

Myne riddere stolt,

Me schal ju gheven sulver unde golt,

Dat gy bewaren Jhesum,

Den se heten Nazarenum.

75

Waket wol umme dat graf,

Dat den licham numment neme dar af.

Primus miles:

Nu set, mit wolken saken

Schole we enen doden man waken?

Gy vruchtet, dat nycht to vruchtende stat

Secundus miles:

80

Wat mach uns schaden dat?

Wy willen nemen ere gave

Unde gan myt em to deme grave.

Wilme uns dure mede gheven,

We waket so lef den doden alzo den leven.

Primus miles:

85

Truwen, so wil ik der huder en wezen.

Vor my schal he nicht ghenezen.

Begunde he ok van dode up stan,

Ik wolde ene wedder to der erden slan.

Secundus miles:

Ik wil de ander huder syn,

90

Scholdet ok kosten dat levent myn.

De schande schal uns nummer schen,

Dat he schal van dode up sten.

Ik spreke dat an desser stunde:

Dat he des wol begunde,

95

Ik woldet myt em alzo an clyven,

He scholde vor mynen voten dot blyven.

Tertius miles:

My behaget wol desse rede. {30}

Ik wil ok juwe kumpan wesen mede

Unde helpen ene ju so bewaren,

100

Dat he uns nycht schal untvaren.

Were he ok noch so behende,

We willen ene beholden sunder ende.

Quartus miles:

Ik bun ok en starker holt,

Ik wil ok helpen bewaren dit velt.

105

Mit truwen unde myt eren

Wil ik denen Pilatese myme heren.

Steit he up, er id daget,

Ik gheve ju myne mome vor ene maget.

Primus Judeus:

Gy rittere, dat schal ju nummer ruwen!

110

Ik segghe ju dat myt truwen:

Beware gy wol den helt,

So wert ju dat rede ghelt

Betalt up deme brede.

[Expositor ludi:]

Des so gynghen se mede.