Redentiner Osterspiel

Erster Teil

Erste Handlung

______________________________________________________________________________

Die Juden verhandeln mit Pilatus.

Ad Pilatum primus Judeus:

Got grote di, Pilatus here!

[Pilatus:]

Sprek up, jode, was brinxtu nyer mere?

Secundus Judeus:

Pilate, wy bydden, dat du gutliken willest untfan

Rede, de wy di laten vorstan.

45

Pilate, des is uns not:

Wy bidden dy dor den levendeghen got,

De dar schop lof unde gras,

Dat du Jhesum, de vor dineme richte was,

Willest laten waren.

50

We vruchten, dat syne jungere here varen

Unde nemen synen licham dar ut

Unde spreken denne al averlut,

Jhesus de si up ghestanden.

So mochte we wiken myt allen schanden.

Pilatus dicit:

55

Wane! begynne gy nu to reven?

Love gy, dat en dot man werde leven?

Dot ju der rede af

Unde bewaret sulven dat graf.

Primus Judeus:

Pilate, wultu weten –

60

Ik en hebbe nicht vorgheten – :

Jhesus let synen jungeren dicke vorstan,

He wolde an deme drudden daghe levendech ut deme grave gan.

Dat sede he al apenbar.

Des vruchte we syne groten schar, [29]

65

Der is gar unmaten vele.

Uppe dat me den licham nycht enstele,

So schicke us hude,

Pilate vul gude!

Pilatus dicit:

Wil ik wesen myt ghemake,

70

So mut ik ju schicken hude unde wake.