Redentiner Osterspiel

Erster Teil

Zweite Handlung

______________________________________________________________________________

Michael führt die befreiten Seelen in das Paradies.

Et [Michael] ducit animas, que cantent:

„Magna consolatio [in tormentis. Alleluja.]“

Tunc obviis Elye et Enoch dicit Symeon:

We synt desse twe?

Segget uns, wor umme hebbe gy nycht leden we?

685

Gy hebbet nycht an der helle wesen.

Wor umme sint gy vor anderen luden ute lesen?

Enoch:

Ik bun de olde Enoch

Unde leve lifliken noch

So ik was in der erden.

690

Got let my aver sitten unde werden

An deme paradise

Nach syner gotliken wise:

Dar schal ik unde myn kumpan

Alzo lange ane gan,

695

Dat paradis schole wy beriden                    [Bl. 6b]

Wente Antichrist[es] tyden,

So schole we liden den dot

Unde loset werden van der erdeschen not.

Helyas:

Ik bun gheheten Helias,

700

De dar myt ju an der werle was.

Do quam gades macht

Unde syn almechtighe cracht,

De nam my an den hemmele levendich

Myt eneme waghene, de was vurich.

705

De sulve vurighe waghen

Heft uns an desse stede traghen:

Dar schole wy alzo langhe syn

Sunder jeneger hande pyn

Wente Antichrist kumpt an de lant:

710

So werde we wedder nedder sant

Unde scholen syn ware predikere

Teghen syne valschen lere.

Dar umme let he nycht martelen us. [47]

So kame wi an der hemmel clus,

715

Dar gy scholen ane rowen.

Des moge gy ju wol vrowen.

David:

Leve vrunt, we bustu,

Dat du wanderst also vro

An des paradises garden?

Latro:

720

Wete wy nycht, wes ik warde?

Ik bun de rover, de an deme styllen vrigdaghe

Godes sone to sprak myt myner claghe:

„Here, denk myner gotlike

Wen du kumpst an dynes vader rike.“

725

Do sprak he to my:

„Vor ware ik nu segghe dy:

Du scholt huten myt my syn vor war

An dat paradis so clar.“

He sprak: „dit cruce scholtu myt dy bringhen.

730

Oft di de enghel wil afdrenghen,

So sprek: ‚engel gades, dyt is myn warteken,

An deme cruce is got an syn herte steken.

Hir scholtu my bewaren

Wente he kumpt sulven here varen.‘“

735

Des so warde ik al hir.

[Anime:]

Des so warde wy myt tir.

Angelus:

Do des gade behelik was,

Do he schup de werlt unde allent dat dar jnne was,

Do schup he en paradis der wollust,

740

Dar inne rowen scholde des mynschen brust

Dar wordestu, Adam, inne settet apenbar,

En [mynsche] nach gades bilde clar.

Dar heft dy but gheworpen dyne sunde,

Dar sedder der stunde

745

Mer wen vif dusent jar

Van aller mynschen schar

Numment mochte in kamen.

Nu heft ju got myt syneme dode wedder namen,

Ik schal ju in dit paradis wedder brynghen.

750

Dar se gy en scharp swert vor henghen: [48]

Dar schole gy vruchten nicht vor,

Tredet an des paradises dor,

Wachtet an deme wunliken sale

Went ju got sulven hale.