Tractat von den landen Scithia

J2v

________________________________________________________

<verso> selbst in der pauwren dörffer und scheußt jn soliche jre thier / und die untersassen getürren jn solichs kainerlay weiß wörn noch wider sein. So dann die selben jungen man bar werden ist ir geprauch teglichen das geyäg der wilden unnd haymischen thier auch die menschen zuo jagen zuo schissen und zuo fellen / das landt ist den merern tayl vast mößig / unnd erfüllet mit großsem gerör und rorstengeln / der wurtzen ist Calamo aromatico. wöliche moß erwachssen auß dem grossen fluss Thanai / und auß dem fluss Hoge und Rhinbite also genannt / und auß mer flüssen und klainen wassern auß den mößern versamlt / durch wöliche vil außgeng unnd zwerch weg gemacht seind / der selben päßs sy das arm pauwers volck vil bekümmern / ansprengen und überfallen / vich und leut sampt jren weybern und kinden weg füren. Item andere land daselbst sy die vertauschen und verkauffen / wann in jren landen ist kain geprauch des gelts besonder der so zwischen dem landt ligen. jr handlung seind vil mit buchaschen ainer leinwat von paumwoll geweben so lang dz darauß aines jrer hembder gemacht mag werden / unnd sunst alle jr notturfftige war bezalen sy mit buchaschin / die dann gefüret werden gen Alkeyr in Egypten / desgeleichen auch wie vor angezaygt ist / die geraubten pauwren und menschen werden daselbst hyn gefürt und verkaufft / alßdann begibt sich manigmal durch verwandlung des gelücks. das auß den aller gröbisten pawren der welt zuo grosser Oberkait und herrschaften kommen / wann auß jnen ist gemacht worden mer alß ain künig Soldan zuo Alkeyr. und unzalich vil Armiraldi und stathalter der großmächtigen land und stött en Egipto / jre obklaydung seind von weyssem filtz / geleichen der pfaffen Chormenteln / zuo der gerechten seyten seind sy geöfnet das sy mit ainem arm daraß mögen / auff dem haubt tragen sy ain filtz pyret / der form wie ain zuckerhuot. under den menteln klaiden sy sich mit Trilici leynem tuoch also genannt / und von seyden oder leynwat / gefalten oder gefiltzt / ettlich mitt paumwoll eingenäet von der gürtel ab geleicher weiß den alten Römischen wappenklaydungen. An jre stifeln und styfelin legen sy fast vil fleiß / seind