Tractat von den landen Scithia

J3r

________________________________________________________

<fol. J III> artlich gemacht.Die hosen und nyderwaten von weyterer leinwat / sy pflegen auch zuo tragen vast lang knebelpärt under der nasen / und haben stätigs bey jn dreyerlay rüstung / ainn feuwer zeug in ainem gar artlichen wolgemachten von jren weybern außgenäetem liderin peutelin / tragen auch bey jnen scharsich und schleyffstainlin die selben und jre wör zuo scherpffen und wötzen / damitt ainer dem andern das haubt schirt / damiten lassen sy ainen langen lock harß den sy flechten / und etlich sagen den kopf dapey zuo fassen so jn der wirt abgehauwen / damit das angesicht mit plütigen henden nit vermayliget werd und alle mal so sy sich ainer schlacht versehen / beschern sy die scham / achten es für sünd und schantlich harig an dem selben ort todter gesehen werden. So sy feindtschafft haben werffen sy feuwer in jrer feind heuser / wöliche alle von stro gemachet seind mit angemachtem schwebel / an den pfeylen angetzündt. Die mächtigen haben in jren heussern groß guldine und silbrine trinck geschirr ain stuck von drey biß in vierhundert guldin wert / darauß sy trincken mit grosser Ceremonia die sy brauchen in jrem trincken / mer dann in anderm jrem handl und gemaynicklich so trincken sy in dem namen gots der hailigen und der gestorben jrer gesypten freund / bedencken damit jr eerlich leben jr loblich volfürung des selben und seines edlen geschlächts mit grossen eern und reverentz gleich als mit ainem opffer / mit entdecktem haubt und andacht. Sy schlaffen mitt den heubtern auf der Loricha (also von jn genannt) das ist ain pantzerhembd haben sy für ainn pfulgen mit den waffen bey jnen ligen und so sy unversehen auf stond zuohand beklayden sy sich mitt demselben pantzer und rüsten sich gewaffet. Man und weib ligen bey ainander in petten mit den füssen zuosammen gekert / dieselben jre pett seind liderin / gefüllt mit roren oder pintzen bluommen / sy haben die mainung under jnen das kainer edler gepurdt sol geacht werden von denen kuntlich ist etwan zeit unedel gewesen sein / obwol hernach vil künig von seinem geschlächt kommen wären. Sy wöllen auch das der edelman kain kaufmanschaft treib noch rechnung wisse / allain mögen sy ire reub ver=