Das Rolandslied

Verse 3000 - 3999

______________________________________________________________________________

3000

aller siner tougen.

di zaher siner ougen

stiegen uon herce grunde.

nehain houpthafte sunde

wolt er uf ime nicht tragen.

3005

daz urchunde wir uon sent Egidien haben,

daz er unseren herren umbe in bat,

daz er im aine sculde uirgab.

er gedachte an di brode,

so der botich liget ode,

3010

diu sele hin zucchet,

der arme likename sich stuppet.

daz wizzen die herren,

die nach werltlichen eren

tagelichen ringe[n]t,

3015

daz si got dar unter minnent

unt ir ougen cherent ze gote:

so chumt in der himilische bote

unt irloset si uon allen noten,

suchent si in mit deumuote.

3020

Der kaiser sin gebet

uil diche hin ze gote tet.

uil innechliken er dar unter nante

sinen neuen Roulanten,

unt alle di cristen waren

3025

di enphal er zu den gotes gnaden.

uon den uenien begonde er muoden,

do wolt er gerne rouwen;

der slaf in bezuchte,

aine wile er entnouchte:

3030

do troumte im uil gewis

wie er ware in porta Cesaris,

mit ime herren gnuoge,

wie er ain scaft in der hant truoge,

Genelun nach ime slieche

3035

unde den scaft ain halp begriffe

unt wolt im in uz der ‹hant› zucken.

der scaft prast zestucken:

der kaiser ain tail behabete.

Genelun uirzagete:

3040

siniu stucke warf er widere;

di furen gegen dem himile

in di lufte uil hoch,

daz im daz ouge enzoch,

daz si ne sach nimen:

3045

di lufte si enphiengen.

di berge alle der uon erchracheten,

der kaiser unsamfte erwachete.

Der kaiser uiel zu der erde.

er sprach: «gnadeclicher trechtin herre,

3050

ich han garnet dinen zorn,

ê muz er uber mich chomen:

der miner manigen sunde[n]

la daz liut nicht engelte[n];

richt uober mich, herre, daz ist recht:

3055

ich bin din entrunner knecht.

du erlostest mich uil ture:

beschirme mich uor dem ewigen fûre,

richt uober den proden likenamen.

la daz liut in dinen gnaden:

3060

la si des geniezen

daz si dine boten alle hiezen,

herre, din selbes chint

unt hie in dinem diniste sint.

swaz ich widir dir han getan,

3065

di rache scol billichen uber mich gan.»

Des Kaisers Traum

(P, fol. 41v)

Do er got uil tiure ane rief,

der chaiser ander stunt enslief.

in duchte wie er ze Ache ware

unt ain bere uor ime lage

3070

mit zwain cheten gebunden.

sa ze den stunden

der pere in uaste ane sach,

di cheten er bede cebrach.

an lief in der pere;

3075

die fursten wolten in were;

der chaiser en macht sich sin nicht erhaln:

er geweltigot im den arm,

daz flaisc er ime allez abe brach,

daz bain er gar nacket sach.

3080

uon den sachen

der chaiser begonde aber wachen.
 

Der kaiser gab sich in gotes gewalt.

sin . . . . . . . . . .

. . . . . . . . . . . . . . . . . .

. . . . . . . . Lücke (ca. 150 Verse) . . . . . . . . . .

. . . . . . . . (Verse 3649 - 3822): . . . . . . . . . .

. . . . . . . . . . . . . . . . . .

Gegen dem himele er sach,

swa er den heiden wirt genant.

«. . . in da nennet,

3085

da machtu ane angest sin:

so helue mir min trechtin,

unt waren di gisel da haime,

also lange so si sint haiden,

daz si mit allen ir creftin

3090

sich niemir ne geturren beheften

wan nach dinen eren.

fursten die herren

di so lange uze sint,

den wartent wip unde kint.

3095

des sint die fursten zesamene chomen,

wir setzen zeherzogen

Roulanten dinen neuen:

so mac er imer frolichen lebe.»

Der kaiser in an sach,

3100

uil trureclichen er sprach:

«ia du ualantes man,

warumbe hast du so getan?

waz wizestu mir?

ain ubel gaist ist mit dir.

3105

het ich dir nicht wol gelonet,

machtestu gotes haben an ‹mir› gesconet.

iz ist uil watlich:

du getruobest allez romische riche.

uon dir scol michel uobel chom.

3110

war umbe hast du mir mine huote benomen?

des truret min sele,

ich ne uirgibe dirz ouch niemir mere.»

Roulant uf spranc,

uil uaste er dare fuor dranc:

3115

«herre, nu lihe mir daz lant,

des gerent die fursten alle samt.

want si mich nennent dar zuo,

scol ich iz willicliche tuon.

ich enphahe hiute den uan

3120

in den drin namen

da wir an gelouben.

den wil ich dar zu wole getruowen,

ob ich durch di cristen icht garbaite,

daz ich daz lon uinde geraite

3125

zu der zesewin siner kinde.

owi ware ich da ingesinde!

er wart durch mich gemarterot.

ich bin gerecht unze an den tot

der sele ze gelaite,

3130

daz der lip gearbeite,

daz ich an der iungesten wile

unter den rechtin belibe.»

Dem kaiser wurden di ougen naz;

da erwainte allez daz da was.

3135

den uan er im bot:

«scolt ich,» sprach er, «dise not

hi samt dir liden.

dar umbe wolt ich uirzihin

der gebe Marsilie.

3140

ungerne rite ich widere,

wan daz ich iz zeuaste gelobet han.

mit eren mag ich hi nicht bestan.

ich furchte grozer arbaite.

got selbe si sin gelaite;

3145

Roulant, uil liber neue,

ich newaiz ob ich dih imer gesehe.»

Di fursten zu drungen,

uil groz lob si im sungen;

Roulanten si hohten,

3150

 uober Yspanie si in chronten

dem heiligen Criste zeeren.

do mante er di herren:

«wol ir Karlinge,

uf uwer aller gnade ich dinge,

3155

 uobe mir uwer hernach durft werde,

so mane ich iuch uerre.

di rede wil ich bescaiden:

toufent sich die haiden,

swiz min herre bescaidet,

3160

sone werde[n]t si niemir uon mir gelaidet.

wellent si an got gelouben,

sone scol si nimen rouben

sunter frieden unte fristen

sam unsere lieben eben cristen.

3165

unte belibent si haiden,

ich gemache da uaige:

ich gerite in so nahe,

swelhes ich da gerame,

daz erz niemir uber windet.

3170

ist daz si der tuuil gescendet,

so bedarf ich uwer helue,

daz ir mir uor deme rike

entruwen gehaizet,

daz ir mich aine icht uerlazet

3175

in dem ellende.»

in des kaiseres hende

lobeten si getrulichen,

sine wolten im niemir geswichen,

geschaez im ze der note.

3180

des erfroute sich der helt guote.

Roulant enphie den uan;

er sprach: «wanu mine uil lieben man

di mir heluen wellen?

wanu liebe gesellen,

3185

wanu frunt unt mage?

nu stet iz an der wage:

hi scol man frunte erchenne,

den ich etwenne

han libe getan.»

3190

er zucte uf sinen uan,

er rant uf an aine hohe;

daz was ain buhel scone.

dar riten di zwelf notgestallen

mit zwaincec tusent mannen:

3195

di waren guote knechte,

ze allen noten gerechte,

di im nimer geswichen

ze hainen sinen sachen,

sine bedwunge nehain not.

3200

si waren im gerecht unz an den tot

pestatigen sin ere.»

Genelun sach daz ungerne.

Roulant sprach zu dem chaiser:

«herre, rit an dine reise

3205

harte urolichen

haim zu Francriche.

den uan scol ‹ich› fuoren,

herre, al nach dinen eren.

gotes hulde hastu hie erworuen.

3210

habe du dehaine sorgen

daz ich imer entrinne dannen:

der uan ne scol mir nicht so lichte enphallen

so der hantscuoch Genelune.

dine fursten du niene sume.

3215

got spar din ere.»

der kaiser wainte uil sere;

uil dicke er in chuste,

er druhte in an sine bruste,

er beswif in mit den armen;

3220

er sprach: «nu muoze iz got erbarmen,

daz ich dich hi muoz lazen.

ia ne mag ich nicht dar zu gebenmaze[n],

daz ich da fuore name,

helt, daz ich dich tagelichen sehe.»

3225

Do sich die gelieben

uon ain ander schieden,

der iamer wart uile groz;

der woft uon in doz

uober zwo mile;

3230

daz liebe ingeside,

der uater uon sinem lieben sun,

der bruder muose sam tuon,

da schit sich michel fruntscaft.

owi wie da geclaget wart!

3235

da was wuoft unde we:

ne weder sit noch ê

sone gehorte nie dehain man

chlage also fraissam.

si musen alle wol wainen:

3240

si liezen da manigen helt uaigen.

Der kaiser cherte ze lande.

di aller chuonisten wigande,

di uf der erde

ie geboren dorften werde,

3245

di cherten unter Roulantes uan.

si heten zwaincec tusent man,

an den nichtes gebrach.

swa iz in dar zu geschach

da si gote scolten dinen,

3250

da ne gesunderote si niemen.

si furten uaile den lip.

si gerechten sich in alle zit

durch den heiligen gelouben ersterben:

durch got wolten si gemarteret werden.

3255

fursten die da bestunden,

di mit Roulante huoten,

ouch ne gerten si nehainer gewinne,

ni wan di waren gotes minne.

daz beware ‹wir› mit den lebentigen buochen,

3260

daz man si scol suochen

unter allen mines trechtines chinden.

der sundare mac da zu in uinden

baidiu helue unde rat

uober alle sine missetat.

3265

Alle di mit Roulante beliben,

di sint an den lebentigen buochen gescriben:

daz ist Gergirs unde Engelris,

Ekerich unt Gernis;

da was Pernger unt Atto,

3270

Ansis unt Iuo,

Gerhart unt Walter,

Samson ain helt snel,

Oliuir unt Turpin.

Roulant unt di mit in sin,

3275

unt alle di mit in waren,

da si den gaist wider gaben

ir urlosare,

ir tot ist ture unt mare.

Roulant sich geraite,

3280

mit flize er sich bewarte

‹in› ain liechten roch uesten,

daz unter dem hiemele neweste

sinen bezzeren nehain.

uon sinen brusten uorne scain

3285

ain trache uon golde,

sam uz im uaren scolde

di funchen fiures flammen

mit gesmelze bewallen,

daz gestaine also edele,

3290

soz wol gezam deme helede.

der helm hiez Uenerant,

den der helt uf bant,

mit golde beworchten,

den di haiden harte uorchten.

3295

mit guldinen buochstaben

was ander listen ergraben:

«elliu werlt wafen

di muzen mich maget lazen.

wilt du mich gewinnen,

3300

du furest scaden hinnen.»

sin swert hiz Durendart,

wan unter dem himele nie gesmidet wart

nicht des im gelich ware.

sine site waren seltsane:

3305

in swelh ende man iz bot,

da was geraite der tot.

alle die ie smiden begunden,

di ne wessen noch ne chunden

wi daz swert gehertet was;

3310

siniu ecke waren wahs.

iz uorchten alle die widir im waren

unt di iz ouch nie gesahen;

iz uorcht elliu haidenscaft.

der stal ne het da wider nehaine craft,

3315

ne weder bain noh horn:

iz was allez uerlorn,

ioch di herten ulinstaine;

durch not entsazen iz di haiden.

Zwo hosen er an leite,

3320

di waren gantraitet

uon golde unt uon berelen:

di luchten sam die sternen,

daz edele gestaine.

er ne uorcht wafen nehaine.

3325

ainen spiz nam er in di hant;

ain wizzen uan er an bant:

da waren tiêre unt uogele

mit golde unt[er]zogene,

uil manc wunter dar an was.

3330

uf ain march er gesaz,

daz was genamet Uelentich.

daz cruce tet er fur sich,

zerucke unt ze siten.

du cherter an aine lite[n].

3335

er sprach zu sinen gesellen:

«lat iuch sin nicht erlangen:

ich wil gerne ersinnen,

uobe die unseren widir winnen

sin mit samnunge.»

3340

do chert der helt iunge

uf aine hohe der alben.

do sach er allenthalben

di molten uf stieben,

uil manigen wizen uanen fliegen,

3345

mit manigem helme bruner uarwen

manigen schilt golt garwen.

baidiu berc unt tal

was geuangen uober al.

goldes furten si genuoc.

3350

der wider schim im daz entruoc,

daz er si mit nichte

geachten ne machte.

baidiu golt unt gestaine

scain uon den haiden

3355

sam di sternen unter den wolchen.

uon uolche zeuolche

sigen si zesamene

mit dem aller maisten magene

daz sich uf der erde

3360

ie gesamnet machte werde.

si furten groz uber muot:

du nist nimenne guot,

si geliget ie nidere;

der richtare da ze himele

3365

haizet si selbe uallen.

den dimuotigen allen

gehaizet er selbe sinen segen,

di in siner gehorsam wellent leben.

Do froute sich der helt Roulant,

3370

daz er der haiden samnunge uant;

er sprach ‹ze› Walthere:

«nu ile du, helt mere,

wel dir tusent manne

unt sume dich nit zelange.

3375

uah uns die perge,

ê sin di haiden innen werden,

daz wir di hohe begrifen,

ê uns di haiden unter slichen.

di ander du warne,

3380

hi ist des tiueles geswarme,

daz si sich wafen schiere.

sage Turpin unt Oliuire,

den helden allen samt:

sem mir disui zesewe min hant,

3385

ich ne chuome niemir uon dirre herte,

unz ich geslahe mit minem swerte;

sine hiluet nehain ir grozer scal:

ir wirdet hiute so getan ual

daz man iz wole sagen mac

3390

unz an den iungesten tac.

mir ne geswiche der gute Durendart,

si geruwet al ir hoch uart.»

Do di helde uernamen

daz di haiden mit samnunge waren,

3395

si baten ir ewarte

daz si sich garten.

zu ir ambachte si fiengen,

den gotes lichename[n] si enphiengen.

si uielen ir uenie,

3400

si riefen hin zehimele:

ze uil manigen stunden

manten si got ‹siner› wunden,

da er di sine mit erloste,

daz er si getroste,

3405

daz er in ir sunde uergabe

unt selbe ir urchundare ware.

mit bichte si sich bewarten,

ze dem tode si sich garten,

unt waren idoch guote chnechte,

3410

zu der marter gerechte,

der sele zewegene.

di waren gotes degene

wolten nicht entrinnen.

si wolten gerne wider gewinnen

3415

daz unser alt erbe;

dar nach strebeten di helede.

ia waren di herren edele

in cristenlichem lebene.

si heten alle ain muot.

3420

ir herce hin ze gote stunt.

si heten zucht unt scam,

chuske unt gehorsam,

gedult unt minne.

si prunnen warlichen inne

3425

nach der gotes suoze.

wegen si uns muozen,

daz wir dirre armuote uergezen,

want si daz gotes riche habent besezzen.

Do sich di gotes degene

3430

mit salmen unt mit segene,

mit bichte unt mit gelouben,

mit trahenden ougen,

mit grozer demuote,

mit maniger slachte guote

3435

sich ze gote habeten,

di sele gelabeten

mit dem heiligen brote

unt mit dem uronen bluote

zu dem ewigen lebene,

3440

do wafenoten sich di helede.

got lobeten si do;

si waren alle samt fro,

sam di ze brutlofte[n] sint.

si haizen alle gotes chint.

3445

di werlt si uersmaheten,

daz raine opher si brachten,

do si daz cruce an sich namen.

ze dem tode begonden si harte gahen.

si chouften daz gotes riche.

3450

sine wolten ain ander nicht geswiche:

swaz ainen duchte guot,

daz was ir aller muot.

Dauid psalmista

hat uon in gescriben da:

3455

«wi groze in lonet min trechtin,

di bruderlichen mit ‹ain› ander sin!

er biutet in selbe sinen segen,

si scuolen iemir urolichen leben.

ain zu uersicht unt ain minne,

3460

aín geloube unt ain gedinge,

ain truowe was in allen;

ir nehain entwaich dem anderen.

in was allen ain warhait:

des frout sich elliu di cristinhait.

3465

Haiden di uerworchten,

di got nine uorchten,

ir apgot si uf huben,

mit grozer hochuart si furen.

si uielen fur Machmet.

3470

daz was ir aller gebet,

daz er in erloupte

daz si Roulanten houpten,

unt so si in ersluogen,

daz si sin houbet fur in truogen.

3475

si gehiezen im ze eren

sin lop iemir zemeren

mit tance unt mit sait spil.

aller uobermuote was da uil,

si uersahen sich zu ir chrefte.

3480

done wessen si nicht rechte,

daz er allez wider got strebet,

swer ane got lebet.

si uersmahent ir rechten schephare,

den unseren waren heilare,

3485

den unseren oberisten ewart,

der niemen ane trost enlat,

swer mit deumuote

suchet sine guote.

Nv horen wir diu buoch sagen:

3490

ain hantwerc heten si erhaben

alnach der chuonige gebot.

da waren siben hundert apgot:

Machmet was der herest unter in.

dar cherten si allen ir sin:

3495

daz lob si im sungen,

siben tusent horn da uor chlungen.

siben tusent golt uaz,

ze eren buten si im daz,

di luchten tac unt nacht.

3500

der liute was so groziu craft

daz diu uelt waren bedechet,

daz di erde nine blechet,

daz si niemen machte gesehen,

daz wir fur war muogen gehen

3505

daz sulch hêr nie gesamnet wart.

da gelac michel hochuart

da bewaret unser herre siniu wort:

sent Iohannes hat gescriben dort,

daz diu deumuot hin ze himele stiget,

3510

daz di ubermuot nider niget

in di uinsteren helle:

da bi bezzer sich swer der welle.

Haiden di uertanen

bi dem halse si sich ergaben

3515

in des tiueles gewalt.

si baten di gote alle samt,

daz si in fuore waren

unt in salde gaben,

daz si ir not bedachten

3520

unt selbe uor uachten,

daz si alle gesunde

uon Uallefunde

pelaiten si ze Salue Terre.

si getruoten in ze uerre,

3525

des gelagen si alle da nidere.

der gote ne chom nine hain widere.

di gote wurden alle zeslagen,

in pruoch unt in graben

wurden si geworfen.

3530

sine machten in selben nichtes gehelfen.

Uz huoben sich di uaigen,

di unsamfte wurden geschaiden.

michel wart der her scal.

si fulten berge unt tal

3535

unt al daz geuilde.

di uogel unter dem himele

musen tote nider uallen.

uon dem ummazen scalle

geswaich in daz geuidere.

3540

Alterot der wilde

furt ain stap in der hant;

er ilte da er den chuonc uant,

er sprach: «Marssilie herre,

Mahmet spar din ere!

3545

ich han fur war uernomen,

di cristen sin so harte erchom

daz si nehaine wile nemugin gestan.

mir sageten mine mán,

si uallen uffe die erdin,

3550

si waren nu gerne

uon uns hinnin.

nu wil ich an dich gedingen:

durch dine tugentliche site

tuo des ich dich bite:

3555

lich mir daz ce lehen

uz allen disen herren:

ich han uile guote knechte,

daz ich mit den da uore uechte,

daz ih Roulanten erslahe

3560

unt man daz mare uon mir sage;

so hastu sin ere,

unt din ‹ich› iz iemir mere.»

Do sprach der chuoninc Marsilie:

«nu sente dich mir widere

3565

Machmet unser herre:

ich getruwe ime sin uil uerre.

wi wol ich dir dinir eren gan!

machtu Rolanten erslan,

daz houbit fur mich bringen,

3570

so saltu hi ze mir gewinnen

imer alle werlt wunne.

du gerest al din chunne.

di cristin habent zwelf scar,

nu warnet ir uch wol dar:

3575

erwelt ir mir zwelf man

di guoten willin dar zvo han.

der helde iegelich

neme zwelf tusint zvo sich.

wol berait uwer scar,

3580

chomet uirmezenlichen dar,

scaffet uwer huote,

wesent ain muote,

ritet mit scaren zuo.

sine muogin nicht widir íu getuon.

3585

erslahet si allesamt.

Oliuir unt Roulant

habent mir so herce laide getan:

chumit der zwelue dehainer dan,

sone gescach mir nie so laide.

3590

die selben gesellen baide

scolten billihin hangin:

so were min wille wol ergangen.

daz bedenchen alle dise guote herren,

unt din ich iz imer mere.»

3595

Der herzoge Falsaron

mit grozer crefte kom er cehoue;

er sprach: «ich han achtzehen tusint man;

die uolgent hiute minim uan,

swa ich hin kere.

3600

nu erloube du mir, herre, –

min marche ist mir uirbrunnin,

mine burge sint mir an gewunnin,

min liut ist mir geuangen, –

daz ich hiute uor in allin

3605

Rolanten muze erslahen:

so uirgiz ich alles mines scaden.

unt ist daz iz Machmet wil,

ir geuellit hiute so uíl

daz Portaspere

3610

wol muz rasten

unz an Urstamme

uor Rolante unt uor sinen mannin.

so hastu sin ere,

unt ‹ich› din iz imer mere.»

3615

Der chuoninc antwirt im do:

«min herce ist mir iemir mere fro,

ob dir Machmet daz heil gít,

daz der zwelue einir uon dir gelít,

in allem minem riche

3620

mache ich dich geliche

minem liebin kinde.

du scolt hi zemir gewinne

daz al din chunne geret,

din richtum zwispilde gemeret.»

3625

Do chom der chunc Cursabile

geuaren uf sinem marhe:

«hail sistu, chuninc Marsilie!

ich han ains min drizec tusint helede

ze beherten din ere,

3630

swa du hin wil cheren.

di rechent gerne dinen anden.

erloube mir uobir Rolanden.

des rechtis wil ich dich manin:

ich han den oberisten uán

3635

unt[er] allin dinin mannen.

daz scol dir nicht misseuallin:

ich scol in hiute uor uechtin

uon adele unt uon rechte.

ouch scolt du mir lonen:

3640

ich sluoc den chuoninc Philonin,

herre, durch dinen willen.»

der chuonc antwirte im mit minnen:

«du bist min uil liebir mán,

du hast uil dicke getán

3645

daz min wille wás.

wol weiz ich dáz:

du furest die úz genomen helede.

erslahe mir si alle zwelue:

der eren wil ich dir wole gunnin.

3650

du hast mich iemir der mit gewunnin.»

Malprimes uon Ampregalt

«herre», sprach er, «durch dinen chunclichen gewalt:

Roulant hat mir uil celaide getan;

min bruder hat er mir irslagin,

3655

dar zu mine liebin man.

din urloup wil ich haben,

daz ich ‹daz› muze rechin,

durch sin herce stechin

minen golt garwin spíz.»

3660

der chuoninc ime uil gwislichin gehíz,

unt gerache er in ‹an› Roulante,

er machet in gewaltic

in sinem riche maniger grozen eren.

do naiger sinem herren.

3665

Ammirat uon Paluir:

«nu erloube, herre, mir:

ich bin uerre her gestrichin.

min craft du ist michil,

ich bin ein uil starcher mán.

3670

Roulant ist unerslagen

uon allem chunne der haiden:

ich irslahe in aine.»

do sprach der chuonc Marsilie:

«du bist starch unt biderbe,

3675

ain helt zu dinen handen.

erslehes du Rolanten,

ob des Machmet gewerde,

elliu palwischiu erde

si iemir din aigen.

3680

dine tugent scoltu uns erzaigen.»

Do chom uon Tortulose Targis,

er sprach: «wol du chunc here unt wis,

din tohter ist min wip.

wie ob Machmet mir hiute gít

3685

daz ich den rum gewinne

daz ich fur dich pringe

daz houbit Roulantes,

dinis uiantis.

ich gelege sinen hochmuot:

3690

do er uor deme kaisere gestunt,

sin swert er zuhte,

dinin chunclichen namen er uerdruchte

unt uermaz sich zeuerre,

er wolte mere unt erde

3695

cinshapht bringen,

unter des kaiseres uanen dingen.

ich wil mit miner hende

den guten Palswendin

in sinem herce blute berennen.

3700

du scolt wizzen unt erkennen,

also liep sint mir din ere

sam Roulante sines herren.

du bist alsam edele unt also ricke,

daz du gewalticlike

3705

dine marke uor im scolt befriedin.

sin houbit scol huite dar umbe beligin.

iz ist hiute min ban,

oder ich irledige alle Yspaniam.»

Marsilie ersmielte do,

3710

der rede antwirt im so:

«ich en zwiuele an dir nít,

dirne si min ere uil liep.

ich getruwe dir so wol

so ich uon rechte minem kinde scol.

3715

Machmet gebe dir die salde,

daz du mir diu niumare

bringest urolichin widere.

gelage Roulant da nidere,

umbe Karelen wurde sin gut rat:

3720

wir gefrumen aine hereuart

unter di Karlinge;

si gewinnint bose gedinge:

si wurden alle deme tode ergebin,

sine wolten an Machmet iehin.»

3725

Margariz uon Sibiliae

der rait zu dem kuonige.

er was scone unde lussam:

die haiden harte gezam

daz si in musin scouwin;

3730

harte minnoten in die frouwin.

uil maniger lante habete er gewalt.

daz swert zuchter uber halp,

er sprach: «Marsilie herre,

thaberiske erde

3735

han ich hie mit gewunnin,

cinsis bedwungin.

din liut heiz du beraiten,

din her wil ich laiten

zu sent Dyonisien hús:

3740

Karl entrinnet dar uz

oder er wirt din mán.

dirne mac uor nicht gehaben

al daz der lebit unter wolchen,

alsus getanem uolche:

3745

dine helde sint chune unt uermezzen.

der chaiser ist hie gesezzen

siben iár unt mere.

niemir du widir chere

unze du al Francriche

3750

sam gewalticliche

in dine gewalt gewinnest,

cinsis bedwingest

sam Karl tet din Yspaniam.

ich han zwai unt drizec tusint man,

3755

mit den ich dir niemir geswiche.

daz gelobe ich dir getruweliche,

daz ich niemir widir chere,

Dune behertest ê al din ere.»

do chom der chunc Cernubiles:

3760

harte trost er sich des,

daz er also starc was.

daz buoch bewaret uns daz:

swaz siben mule machten getragin,

daz huop er uf an sinin arm.

3765

er was swarz unt uobil getan.

sin lant daz was fraissam,

daz liut daz ist grimme,

der sunne der ne gescain nie dar inne,

die tuuele puwint dar unwerde;

3770

iz ist diu uerfluochet erde,

die got selbe uirfluochet hat;

des liutes en wirt niemir rát.

er sprach zu deme chuninge:

«mir geuellit uile uobele

3775

daz wir so lange hi biten.

laz unsich zu in riten.

ich bringe dir Roulanten

mit iseninen banten.

swi du in haizest toten,

3780

odir mit wizen des noten

daz Karl muz dingen,

so machtu mit im widir gewinnin

aller dinir fursten kínt

di in grozen noten sint.

3785

wirdit der kaiser ubeles muotis,

ich ne getruwe ime ne haines guotes:

din sun haizet er hahen.

uon du wil ich Roulanten uahen

unter allin sinin mannen;

3790

umbe di ander ist iz schire irgangin:

di zepriche ich sam daz hun.

widir minir craft ne mac niman nít getun.»

Marsilie antwirt im des:

«ia du chunc Cernubiles,

3795

chor mir Roulanten gewinnen,

so han ich allen minin willen.

im ne gefristet nieman daz leben,

des han ich mine truwe gegebin.

aine urist laze ich in gesunt:

Zernubiles erhält den Oberbefehl

(P, fol. 52r)

3800

Karl uirgiltet mir drie stunt

swaz er des mines da hin fuoret,

swa er sich ruomet,

daz er scadin unt lastir hát.

uil guot ist der din rát.

3805

Machmet spar din ere:

ich ne getruwe niemen so uerre.

nu unterwinde dich der scár.

daz her fuore du dar

unt hantel iz mit sinnen

3810

unt enlaz ir nehainen hinnen:

ich gibe dirz lop unt die ere

unt lone dir sin iemir mere.»

Do nam der zwelfe iegelich

zwelf tusint zu sich.

3815

zwelue wurdin der scár,

Machmeten furten si dár,

daz iegelichim uán

uolgoten zwelf tusint man.

siben tusint horn da uore clungen,

3820

ir wiclít si sungen:

da wart also getan scál,

sam perge unt diu tál

allez in wage ware.

daz duhte si harte seltsane

3825

daz in di cristin uor gehabeten.

Falsaron si mante,

er sprach: «welt ir sin min rat haben,

so werdent si alle erslagen,

daz wir si uillichte gewinnen

3830

unt ir nehain ne mac entrinnen;

so tailet uch in uieríu.

zeware sage ich iz íu:

so wartent si den ainen,

ia muzen si sich scaiden,

3835

si muzen brechen ir scár:

so erslahe wir si gár

ane allen unseren scáden.

in iegelichim taile scult ir haben

sehs unt drizec tusint man.

3840

wir treten si in den graben,

daz ir unraine gebaine,

daz ir lebentic nehaine

uf unser erde

niemir mere gesehen werde.»

3845

Oliuir sprach zu Roulant:

«wir haben an der hant

ain uil starchez uolcwic.

aller mannegelich wer sinen lip.

nu wil ich sin iemir got loben

3850

daz iz dar zu ist chom.

nu gesterchet uch, helde, in got!

uns chumet allen sin gebot,

diu helue uon himele,

daz ir groziu menige

3855

ne mac uns nicht gewerren:

si muzen alle samt ersterben,

swaz wir ir hiute erraichen.

suvem got wil heluen,

der mac lichte geuechten.

3860

owol ir guten knechte,

welt ir ain muote sin,

ia hiluet íu selbe min trechtin.

si habent den tot ander hant.

owi geselle Roulant,

3865

wan blasestu noch din horn?

din neue machte uns cehelue chom,

daz wir frolichen scaiden hinnen.

nu tuz durch miner swester Alden willen:

gefriste dine herliche man!»

3870

«daz muoz nu allez an gote gestan,»

sprach der helt Roulant,

er bot uf sine hant,

«unt ne ware iz dir, liber geselle, nicht lait,

ich swuore dir ain offen ait

3875

daz ich iz nine blasin wil.

der haiden nist nie so uil,

iz ne si ir aller uaictage.

fur war ich dir sage:

di haiden sint uor gote uirtailet;

3880

so werdent abir mit bluote gerainet

di heren gotes marterare:

wolt got daz ich des wert ware,

daz ich uirdinete den namin,

dar wolt ich gerne gan.

3885

wi salic der ist geborn

den got da zu hat erchoren,

daz er in sinim diniste beliget,

want er im daz himilriche zelone gibet.

zu disen fulen asen

3890

ne wil ich niemir nicht geblasen.

si wanten daz wir uns uorchten

odir helue zu in bedorften.

ia sint si di aller bosisten zagen.

ir botich gelege ich hiute den raben.

3895

daz ir fro sangin

ist uil schiere ergangin.

got wil siniu wunter hi erzaigen,

der guote Durndart sine tugent erscainen.»

Turpin was da wole nuotze,

3900

mit sconem antlutze,

sin herce was liuter unt gâr:

er fur uon scar hin cescâr,

al umbe er rante,

di helede er wol mante,

3905

er sprach: «gehabet uch urolichen;

ia nahet daz gotes riche.

uol stet an deme rechtin.

hiute mugen wir gerne uechtin.

der tiuel uert da hêr

3910

unt hat gesamnet sin hêr:

des heiligen geloubin

wolt er uns beroubin.

wol ir gotes helede,

uechtet umbe uwir erbe,

3915

daz iu lange geheizen si.

uenite benedicti!

nach disem suzen segene,

ir turen uolcdegene,

muoget ir gerne uechten.

3920

ia uorderet uch min trechtin

zu sinen zesewin chindin.

wa macht ir nu gewinnin

also guoten soldat

so er selbe gehaizen hat?

3925

uol stet ir an deme geloubin,

mit ulaisclichen ougin

scult ir sin antlutze gesehen

unt iemir mit im urolichen leben.

mit den wortin sprechen wir iu antlaz.

3930

in der warheit sage wir íu daz:

uor gote birt ir inbunten

uon allin werltlichen sunden

sam ain niuborn westebarn.

swaz ir der haiden hiute muoget erslan,

3935

daz setze ich iu cebuoze.»

nach dirre rede suoze

uielen si alle zu der erde.

do segenot si der herre;

er sprach in indulgentia[m]:

3940

der antlaz was uor gote ze himele getan.

Di helede widir uf sazin;

do heten si uerlazen

allez ir chunne

durch di gotes minne,

3945

aigen unt burge;

si heten alle ir sorge

geworfin zeruoche.

si sint unser bruche

zu dem gotes riche,

3950

swer si suchet innecliche

umbe dehaine sine nót.

nu heluen si uns umbe gót

uon dirre werltlichen brode,

swa unser herce ode

3955

in dehainem zwiuel buwe[n],

daz wir in samelichen ruwen

an unseren iungisten stunden

in rechtin buozen werden funden,

unt ‹si› unsich zegotes hulden bringen:

3960

daz sculen wir an si gedingen.

Do der helt Roulant

uf ainer hohe daz rechte eruant,

daz si sich in uieriu heten getailet:

«ich waiz wole waz si mainent:

3965

si wellent uns uierhalben an renne;

nu warne wir uns dar ingegene.

liber geselle Oliuir,

nim du drie scár zu dír:

wol troste ich mich dín.

3970

sam tuo du, helt Turpin:

ich erchenne wol dinen sít.

nu tuot ir also ich uch gebit:

cheret di ruche an ain ander,

unt lebete der wundirliche Alexander,

3975

wolt er da durch dringen,

er machte lichte scaden gewinnen.

Gergers der huote min,

der scol hiute mín not gestalle sín.

iz ne lebit nehain haidenischer mán,

3980

wil er da in zwischen durch uaren,

er muz unsanfte erbaizen:

daz wil ich in truwen gehaizen.

got sal uns gnaden:

di uiente sint uns harte nahen.»

3985

Roulant der milte,

ain lewen furt er an sinem schilte,

uzer golde ergrabin.

ia ne chan íu nieman gesage[n]

wi groz froude unter den cristen was.

3990

di haiden intsazin in daz.

si furen in den creftin

sam si zewirtsceftin

alle geladet waren,

mit egeslichem gebaren.

3995

haiden di da zeuorderiste waren

unt der cristen uermezenhait ersahen,

si riten widere zesamene;

si waren da zedem zagele

alle gerne gewesin: