Le Roman de la Rose

Chapitre XXXII

____________________________________________________________________________

Comment, par envieux atour,

Jalousie fist une tour

Faire au milieu du pourpris

Pour enfermer et tenir pris

Bel-Acueil, le très-doulx enfant,

Pource qu'avoit baisé l'Amant.

Des or est tens que je vos die

La contenance Jalosie,

Qui est en male sospeçon.

3800

Ou païs ne remest maçon

Ne pionier qu'ele ne mant,

Si fait faire, au comencement,

Entor les rosiers uns fossez,

3804

Qui costeront argent assez,

Qu'il sont mout lé e mout parfont.

Li maçon sor les fossez font

Un mur de carriaus tailleïz,

3808

Qui ne siet pas sor croleïz,

Ainz est fondez sor roche dure.

Li fondemenz tot a mesure

Jusqu'au pié des fossez descent

3812

E vient amont en estreçant.

S'en est l'uevre plus fort assez.

Li murs si est si compassez

Qu'il est de droite carreüre;

3816

Chascuns des pans cent toises dure,

Si est autant lons come lez.

Les torneles sont lez a lez,

Qui sont richement batailliees,

3820

E faites de pierres tailliees.

As quatre coignez en a quatre,

Qui seroient forz a abatre;

E si i a quatre portauz,

3824

Don li murs est espès e hauz.

Il en a un ou front devant,

Bien defensable par covent,

E deus de coste e un derriere,

3828

Qui ne doutent cop de perriere;

S'i a bones portes colanz,

Por faire ceus dehors dolenz,

E por aus prendre e retenir

3832

S'il osoient avant venir.

Enz ou mileu de la porprise

Font une tor par grant maistrise

Cil qui dou faire furent maistre:

3836

Nule plus bele ne pot estre,

Qu'ele est e grant e lee e haute.

Li murs ne doit pas faire faute

Por engin qui sache getier,

3840

Car l'en destrempa le mortier

De fort vin aigre e de chauz vive.

La pierre est de roche naïve

De quoi l'en fist le fondement,

3844

Si est dure come aïmant.

La tor si fu toute roonde;

Il n'ot si riche en tot le monde,

Ne par dedenz miauz ordenee.

3848

Ele est dehors avironee

D'un baile qui vait tot entor,

Si qu'entre le baile e la tor

Sont li rosier espès planté,

3852

Ou il a roses a plenté.

Dedenz le chastel a perrieres

E engins de maintes manieres:

Vos peüssiez les mangoniaus

3856

Veoir par desus les creniaus;

E as archieres tot entor

Sont les arbalestes a tor,

Qu'armeüre ne puet tenir.

3860

Qui près des murs voudroit venir,

Il porroit bien faire que nices.

Hors des fossez a unes lices

De bons murs forz, a creniaus bas,

3864

Si que cheval ne pueent pas

Jusqu'as fossez venir d'alee

Qu'il n'i eüst avant mellee.

Jalosie a garnison mise

3868

Ou chastel que je vos devise;

Si m'est avis que Dangiers porte

La clef de la premiere porte,

Qui uevre devers orient;

3872

Avuec lui, au mien escient,

A trente sergenz tot a conte.

E l'autre porte garde Honte,

Qui uevre par devers midi;

3876

El fu mout sage, e si vos di

Qu'ele ot sergenz a grant plenté,

Prez de faire sa volenté.

Peor rot grant conestablie,

3880

E fu a garder establie

L'autre porte, qui est assise

A main senestre, devers bise.

Peor n'i sera ja seüre,

3884

S'el n'est fermee a serreüre;

E si ne l'uevre pas sovent,

Car, quant ele ot bruire le vent,

Ou el voit saillir deus langoutes,

3888

Si l'en prent il tel eure est soutes.

Male Bouche, que Deus maudie,

Ot soudeiers de Normandie:

Cil garde la porte detrois;

3892

E si sachiez qu'as autres trois

Vait il e vient quant il li siet,

Qu'il doit la nuit faire le guiet.

Il monte le soir as creniaus

3896

E atempre ses chalumiaus

E ses buisines e ses corz:

Une foiz dit lais e descorz

E sons noviaus de controvaille,

3900

As estives de Cornoaille;

Autre foiz dit a la fleüste

Qu'onques ne trova fame juste:

«Il n'est nule qui ne se rie

3904

S'ele ot parler de lecherie;

Ceste est pute, ceste se farde,

E ceste folement regarde,

Ceste est vilaine, ceste est fole,

3908

E ceste si a trop parole.»

Male Bouche, qui riens n'esperne,

Trueve a chascune quelque herne.

Jalosie, que Deus confonde,

3912

A garnie la tor roonde,

E si sachiez qu'ele i a mis

Des plus privez de ses amis

Tant qu'il i ot grant garnison.

3916

E Bel Acueil est en prison,

Amont en la tor enserrez,

Don li uis est si bien barrez

Qu'il n'a pooir que il en isse.

3920

Une vieille, que Deus honisse,

A avuec lui, por lui gaitier,

Qui ne fait nul autre mestier

Fors espier tant solement

3924

Qu'il ne se moine folement.

Nus ne la porroit engignier

Ne de signier ne de guignier,

Qu'il n'est baraz qu'el ne conoisse,

3928

Qu'ele ot des biens e de l'angoisse

Qu'Amors a ses sergenz depart

En jonece eü bien sa part.

Bel Acueil se taist e escoute,

3932

Por la vieille que il redoute,

E n'est si hardiz qu'il se mueve,

Que la vieille en lui n'aperçoive

Aucune fole contenance,

3936

Qu'el set toute la vieille dance.

Tot maintenant que Jalosie

Se fu de Bel Acueil saisie,

E ele l'ot fait enmurer,

3940

Don se prist a asseürer.

Ses chastiaus, qu'ele vit si fort,

Li a doné grant reconfort;

El n'a mais garde que glouton

3944

Li emblent rose ne bouton:

Trop sont li rosier clos forment;

E en veillant e en dormant

Puet ele estre bien asseür,

3948

Mais je, qui sui dehors le mur,

Sui livrez a duel e a poine.

Qui savroit quel vie je moine,

Il en devroit grant pitié prendre.

3952

Amors me set ore bien vendre

Les biens que il m'avoit pretez;

Jes cuidoie avoir achetez,

Or les me vent tot de rechief,

3956

Car je sui a plus grant meschief,

Por la joie que j'ai perdue,

Que s'onques ne l'eüsse eüe.

Que vos iroie je disant?

3960

Je resemble le païsant

Qui giete en terre sa semence,

E a joie quant el comence

A estre bele e drue en erbe,

3964

Mais, avant qu'il en cueille gerbe,

L'empire tel eure est e grieve

Une male nue qui lieve

Quant li espi doivent florir,

3968

Si fait le grain dedenz morir,

E l'esperance au vilain tost

Qu'il avoit eüe trop tost.

Ge crien ausi avoir perdue

3972

E m'esperance e m'atendue,

Qu'Amors m'avoit tant avancié

Que j'avoie ja comencié

A dire mes granz privetez

3976

A Bel Acueil, qui apretez

Estoit de recevoir mes jeus;

Mais Amors est si corageus

Qu'il me toli tot en une eure,

3980

Quant je cuidai estre au deseure.

Ce est ausi con de Fortune,

Qui met ou cuer des genz rancune,

Autre eure les aplaigne e chue.

3984

En poi d'eure son semblant mue:

Une eure rit, autre eure est morne;

Ele a une roe qui torne,

E quant ele viaut ele met

3988

Le plus bas amont ou somet,

E celui qui est sor la roe

Reverse a un tor en la boe.

E je sui cil qui est versez!

3992

Mar vi les murs e les fossez

Que je n'os passer ne ne puis.

Je n'oi bien ne joie onques puis

Que Bel Acueil fu en prison,

3996

Car ma joie e ma guerison

Est toute en lui e en la rose,

Qui est entre les murs enclose;

E dela covendra qu'il isse

4000

S'Amors viaut ja que je guerisse,

Car ja d'aillors ne quier que j'aie

Enor ne bien, santé ne joie!

Ha! Bel Acueil, biaus douz amis,

4004

Se vos estes en prison mis,

Gardez moi au moins vostre cuer,

E ne sofrez a nes un fuer

Que Jalosie la sauvage

4008

Mete vostre cuer en servage

Ensi come ele a fait le cors;

E s'el vos chastie defors,

Aiez dedenz cuer d'aïmant

4012

Encontre son chastiement.

Se li cors en prison remaint,

Gardez au moins que li cuers m'aint:

Frans cuers ne lait mie a amer

4016

Por batre ne por mesamer.

Se Jalosie est vers vos dure

E vos fait enui e laidure,

Faites li engrestié encontre;

4020

E dou dangier qu'ele vos montre

Vos vengiez, au moins en pensant,

Quant vos ne poez autrement.

Se vos ensi le faisiez,

4024

Je m'en tendroie a bien paiez.

Mais je sui en mout grant soussi

Que vos ne faciez pas ensi,

Car, se devient, vos me savez

4028

Mal gré de ce que vos avez

Esté por moi mis en prison.

Si n'est ce pas por mesprison

Que j'aie encore vers vos faite,

4032

Qu'onques par moi ne fu retraite

Chose qui a celer feïst,

Ainz me poise, si Deus m'aïst,

Plus qu'a vos de la mescheance,

4036

Car j'en suefre la penitence

Plus grant que nus ne porroit dire.

Par un poi que je ne font d'ire

Quant il me membre de ma perte,

4040

Qui est si grant e si aperte;

Si ai peor e desconfort,

Qui me donront, ce croi, la mort.

N'en doi je bien avoir peor

4044

Quant je sai que losengeor

E traïtor e envieus

Sont de moi nuire curieus?

Ha! Bel Acueil, je sai de voir

4048

Qu'il vos beent a decevoir,

E faire tant par lor favele

Qu'il vos traient a lor cordele,

E, se devient, si ont il fait.

4052

Je ne sai or coment il vait,

Mais durement sui esmaiez

Que entroblié ne m'aiez,

Si en ai duel e desconfort.

4056

Jamais n'iert rien qui me confort

Se je pert vostre bienvoillance,

Que je n'ai mais aillors fiance.

Fin des vers de Guillaume de Lorris.