Le Roman de la Rose

Chapitre XXXI

____________________________________________________________________________

Comment Honte et Paor aussy

Vindrent à Dangier par soucy

De la Rose le ledengier

Que bien ne gardist le vergier.

A cel conseil se sont tenues,

Puis en sont a Dangier venues,

Si ont trové le païsant

3672

Desoz un aubespin gisant.

Il ot, en leu de chevecel,

A son chief, d'erbe un grant moncel,

E començoit a someillier;

3676

Mais Honte l'a fait esveillier,

Qui le laidenge e li cort seure:

«Coment dormez vos a ceste eure»,

Fait ele, «par male aventure?

3680

Fos est qui en vos s'asseüre

De garder rose ne bouton

Ne qu'en la queue d'un mouton.

Trop estes recreanz e lasches,

3684

Qui deüssiez estre farasches

E tot le monde estouteier.

Folie vos fist otreier

Que Bel Acueil çaienz meïst

3688

Ome qui blasmer nos feïst.

Quant vos dormez, nos en oon

La noise, qui mais n'en poon.

Estiez vos ore couchiez?

3692

Levez tost sus, e si bouchiez

Toz les pertuis de ceste haie,

E ne portez nului menaie.

Il n'afiert pas a vostre non

3696

Que vos faciez se enui non.

Se Bel Acueil est frans e douz,

E vos seiez fel e estouz,

Pleins de rampones e d'outrage:

3700

Vilains qui est cortois enrage,

Ce oï dire en reprovier,

Ne l'en ne puet faire esprevier

En nule guise de busart.

3704

Tuit cil vos tienent por musart

Qui vos ont trové debonaire.

Volez vos donques as genz plaire

Ne faire bonté ne servise?

3708

Ce vos muet de recreantise,

Si avroiz mais par tot le los

Que vos estes lasches e mos

E que vos creez jangleors.»

3712

Lors a après parlé Peors:

«Certes, Dangiers, mout me merveil

Que vos n'estes en grant esveil

De garder ce que vos devez.

3716

Tost en porroiz estre grevez,

Se l'ire Jalosie engraigne,

Qu'ele est mout fiere e mout grifaigne,

E de tencier apareillie.

3720

Ele a ui bien Honte assaillie,

E a chacié par sa menace

Bel Acueil hors de ceste place,

E juré qu'il ne puet durer

3724

Qu'el nou face vif enmurer:

C'est tot par vostre mauvaistié,

Qu'en vos n'a mais point d'engrestié.

Je cuit que cuers vos est failliz;

3728

Mais vos en seroiz mal bailliz,

E en avroiz poine e enui,

S'onques Jalosie conui.»

Lors leva li vilains s'aumuce,

3732

Frote ses iauz, si s'esberuce,

Fronce le nés, les iauz roïlle,

E fu pleins d'ire e de roïlle

Quant il s'oï si mal mener:

3736

«Bien puis», fait il, «or forsener,

Quant vos me tenez por vaincu.

Certes, or ai je trop vescu

Se cest porpris ne puis garder,

3740

Tot vif me face l'en larder

Se jamais on vivanz i entre.

Mout ai irié le cuer dou ventre

Don nus i mist onques les piez;

3744

Miauz amasse de deus espiez

Estre feruz par mi le cors.

J'ai fait que fos, bien m'en recors,

Or l'amenderai par vos deus;

3748

Jamais ne serai pareceus

De ceste porprise defendre;

Se j'i puis nului entreprendre,

Miauz li vendroit estre a Pavie.

3762

Jamais a nul jor de ma vie

Ne me tendroiz por recreant,

Je le vos jur e acreant.»

Lors s'est Dangiers en piez dreciez,

3756

Semblant fait d'estre corrociez.

En sa main a un baston pris

E vait cerchant par le porpris

S'il trovera sentier ne trace

3760

Ne pertuis qui a bouchier face.

Des or est mout changiez li vers,

Car Dangiers devient plus divers

E plus fel qu'il ne soloit estre.

3764

Mort m'a qui si l'a fait iraistre,

Car je n'avrai jamais loisir

De veoir ce que je desir.

Mout ai le cuer dou ventre irié

3768

Don j'ai Bel Acueil adirié;

E bien sachiez que tuit li membre

Me fremissent quant il me membre

De la rose que je soloie

3772

Veoir de près quant je voloie;

E quant dou baisier me recors,

Qui me mist une odor ou cors

Assez plus douce que de basme,

3776

Par un poi que je ne me pasme,

Qu'encor ai je ou cuer enclose

La douce savor de la rose;

E sachiez, quant il me sovient

3780

Que a consirrer m'en covient,

Miauz voudroie estre morz que vis.

Mar touchai la rose a mon vis

E a mes iauz e a ma bouche,

3784

S'Amors ne suefre que j'i touche

Tot de rechief autre feiee;

Se j'ai la savor essaiee,

Tant est graindre la covoitise

3788

Qui esprent mon cuer e atise.

Or revendront plor e sospir,

Longues pensees senz dormir,

Friçons e pointes e complaintes.

3792

De teus dolors avrai je maintes,

Car je sui en enfer cheoiz.

Male Bouche soit maleoiz!

Sa langue desleial e fausse

3796

M'a porchaciee ceste sausse.