Le Roman de la Rose

Chapitre XXX

____________________________________________________________________________

Comment par la voix Male-Bouche,

Qui des bons souvent dit reprouche,

Jalousie moult asprement

Tence Bel-Acueil pour l'Amant.

Male Bouche, qui le covine

3512

De mainz amanz pense e devine,

E tot le mal qu'il set retrait,

Se prist garde dou bel airait

Que Bel Acueil me deignoit faire,

3516

E tant que il ne se pot taire,

Qu'il lu fiz d'une vieille iraise,

Si ot la langue mout punaise

E mout poignant e mout amere:

3520

Bien en retraioit a sa mere.

Male Bouche des lors en ça

A encuser me comença,

E dist que il metroit son ueil

3524

Que entre moi e Bel Acueil

Avoit mauvais acointement.

Tant parla li gloz folement

De moi e dou fill Cortoisie

3528

Qu'il fist esveillier Jalosie,

Qui se leva en esfreor

Quant ele oï le jangleor.

E quant ele se fu levee,

3532

Ele corut come desvee

Vers Bel Acueil, qui vosist miauz

Estre a Estampes ou a Miauz,

Lors l'a par parole assailli:

3536

«Garz neienz, por quoi t'a failli

Sens, que bien fusses d'un garçon

Don j'ai mauvaise sospeçon?

Bien pert que tu croiz les losenges

3540

De legier as garçons estranges.

Ne me vueil plus en toi fier.

Certes, je te ferai lier,

Ou enserrer en une tor,

3544

Car je n'i voi autre retor.

Trop s'est de toi Honte esloigniee

E si ne s'est pas bien poigniee

De toi garder e tenir cort;

3548

Si m'est avis qu'ele secort

Mout mauvaisement Chasteé,

Qui laisse un garçon desreé

En nostre porprise venir

3552

Por moi e li avilenir.»

Bel Acueil ne sot que respondre;

Ançois se fust alez repondre,

S'el ne l'eüst iluec trové

3556

E pris avuec moi tot prové.

Mais quant je vi venir la grive,

Qui contre nos plaide e estrive,

Je sui tantost tornez en fuie,

3560

Por la riote qui m'enuie.

Honte s'est lores avant traite,

Qui se crient mout estre forfaite;

Si fu umeliant e simple,

3564

E ot un voile en leu de guimple

Ausi con none d'abaïe;

E, por ce qu'el fu esbaïe,

Comença a parler en bas:

3568

«Por Deu, dame, ne creez pas

Male Bouche le losengier:

C'est uns on qui ment de legier,

E maint prodome a amusé.

3572

S'il a Bel Acueil encusé,

Ce n'est ore pas li premiers;

Male Bouche est bien costumiers

De raconter fausses noveles

3576

De vallez e de damoiseles.

Senz faille, ce n'est pas mençonge,

Bel Acueil a trop longue longe;

L'en li a sofert a atraire

3580

Teus genz don il n'avoit que faire.

Mais certes je n'ai pas creance

Que il ait eüe beance

De mauvaistié ne de folie;

3584

Mais il est voirs que Conoisie;

Qui est sa mere, li enseigne

Que d'acointier genz ne se feigne,

Qu'el n'ama onques ome entulle.

3588

En Bel Acueil n'a autre hulle,

Ce sachiez, n'autre encloeüre,

Fors qu'il est pleins d'envoiseüre

E qu'il jeue as genz e parole.

3592

Senz faille, j'ai esté trop mole

De lui garder e chastier,

Si vos en vueil merci crier.

Se j'ai esté un poi trop lente

3596

De bien faire, j'en sui dolente;

De ma folie me repens;

Mais je metrai tot mon apens

Des or en Bel Acueil garder;

3600

Jamais ne m'en quier retarder.

– Honte, Honte», fait Jalosie,

«Grant peor ai d'estre traïe,

Car Lecherie est tant montee

3604

Que tost porroie estre ahontee.

N'est merveille se je me dot,

Car Luxure reine par tot;

Ses pooirs ne fine de croistre.

3608

En abaïe ne en cioistre

N'est mais Chasteé asseür:

Por ce ferai de novel mur

Clore les rosiers e les roses;

3612

Nes lairai plus ensi descloses,

Qu'en vostre garde poi me fi,

Car je voi bien e sai de fi

Que en meillor garde pert l'en.

3616

Ja ne verroie passer l'an

Que l'en me tendroit por musarde

Se je ne m'en prenoie garde.

Mestiers est que je m'en porvoie.

3620

Certes je lor clorrai la voie

A ceus qui, por moi conchier,

Vienent mes roses espier.

Il ne me sera ja parece

3624

Que ne face une forterece

Qui les rosiers clorra entor.

Ou mileu avra une tor,

Por Bel Acueil metre en prison,

3628

Car j'ai peor de traïson.

Je cuit si bien garder son cors

Qu'il n'avra pooir d'issir hors

Ne de compaignie tenir

3632

As garçons, qui, por lui honir.

De paroles le vont chuant.

Trop l'ont trové icil truant

Fol e bergier a decevoir;

3636

Mais, se je vif, sache il de voir

Mar lor fist onques bel semblant.»

A ce mot vint Peor tremblant;

Mais ele fu si esbaïe

3640

Quant ele a Jalosie oïe

Qu'onques mot ne li osa dire,

Por ce qu'el la savoit en ire.

En sus se trait a une part;

3644

E Jalosie atant s'en part:

Peor e Honte laisse ensemble.

Toz li maigres dou cul lor tremble.

Peor, qui tint la teste encline,

3648

Parole a Honte sa cosine:

«Honte», fait ele, «mout me poise

Don il nos covient oïr noise

De ce don nos ne poon mais.

3652

Maintes foiz est avris e mais

Passez qu'onques n'eüsmes blasme;

Or nos laidenge e nos mesasme

Jalosie, qui nos mescroit:

3656

Alon a Dangier orendroit,

Si li montron bien e dison

Qu'il a faite grant mesprison

Don il n'a graignor poine mise

3660

A bien garder ceste porprise;

Trop a a Bel Acueil sofert

A faire son gré en apert,

Si covendra qu'il s'en ament,

3664

Ou sache il bien veraienrient

Foïr l'en estuet de la terre,

Qu'il ne durroit pas a la guerre

Jalosie n'a l'ataïne,

3668

S'ele le cuilloit en haïne.»