Le Roman de la Rose

Appendice

Source:

Le Roman de la Rose par Guillaume de Lorris et Jean de Meung

Publié par Pierre Marteau, Orleans: Herluison, 1878

Facsimile: Internet Archive

____________________________________________________________________________

Vers qui,

dans certains manuscrits,

terminent la partie de

Guillaume de Lorris.

(Que je n'ai mès aillors fiance)

Ne reconfort nul qui m'aïst.

Ha! biau douz cuers! qui vos véist

Au mains une foiz la semaine,

A 5

Asez en fust mendre sa paine;

Mès je ne sai santier ne voie

Par où jamès nul jor vos voie.

En ce qu'estoie en tel tristece,

Si vi venir au chief de piece

A 10

Devers la Tour Dame Pitié

Qui maint cuer dolant a fait lié,

Si me commence à conforter

Et dist: amis, por deporter

Et por voz dolors alegier

A 15

Sui ci venue en cest vergier,

Si vos amain dame Biauté

Et Bel-Acueil et Loiauté,

Et Douz-Regart, o lui Simplece.

Issu somes à grant destrece

A 20

De cele Tour qui est moult haute;

Mès cuers loiax ne feroit faute

S'il en devoit perdre la vie.

Endormie s'est Jalousie,

Si nos somes emblés de lui.

A 25

Moult avons eu grant anui;

Car Paor qui toz jors se crient,

L'uis ot fermé, si va et vient;

De toutes parz va escoutant,

Por Male-Bouche est moult doutant,

A 30

Qu'el ne set qu'ele doie faire.

Mès bone amor la deboneire

Qui les siens adès reconforte,

A grant meschief ovri la porte

Maugré que Paor en éust.

A 35

Se Male-Bouche le séust,

N'en issisen por riens dou monde.

Mès Vénus la bele, la blonde,

Embla les clés, hors nos a mises.

Tantost delez moi sont asises;

A 40

Lors refu ma dolor pasée.

Dame Biauté en recelée

Le douz bouton m'a présenté,

Et je le pris de volenté,

Si en fis ainssi com du mien,

A 45

Qu'il n'i ot contredit de rien.

Iluec fumes à grant delit,

De fresche herbe fu nostre lit,

De beles roses de rosiers

Fumes covert et de besiers:

A 50

A grant soulas, à grant deduit

Fumes trestoute celle nuit,

Mès moult me sembla courte et briève.

Au matinet quant l'aube crieve

Nos somes en estant levé,

A 55

Mès de ce fumes moult grevé

Que si tost fu la departie.

Et Biautez si n'oblia mie

Le très-douz bouton à reprendre,

Maugré mien le me covint rendre.

A 60

Mès toutes fois la douce rose

Au departir ne fu pas close:

Mès ainçois que se departissent

Ne que congié de moi préissent,

S'en vint Biautez humeliant

A 65

Vers moi et dit tout en riant:

Or puet Jalousie gaitier,

Ses murs haucier et enforcier,

Face fort haie d'églantiers.

Face bien guetier ses vergiers,

A 70

Or i a gaagnié assez;

Ne s'est-il bien en vain lassez?

Biaus douz amis, car me le dites,

A tel servise tiex merites.

Pensez de servir sans trichier

A 75

Se cuer avez fin et entier:

Tous jours seroiz dou boton mestre,

Jà si enclos ne saura estre.

Droit à la Tour tout belement

S'en revont moult celéement.

A 80

Atant m'en part et prent congiet,

C'est li songes que j'ai songiet.