Le Roman de la Rose

Chapitre VII

____________________________________________________________________________

Ci parle l'Amant de Richesse,

Qui moult estoit de grant noblesse;

Mais de si grant boban estoit,

Que nul povre home n'adaignoit,

Ainz le boutoit tousjors arriere:

Si l'en doit-l'en avoir mains chiere.

Delez Biauté se tint Richece,

Une dame de grant hautece,

De grant pris e de grant afaire.

1020

Qui a li ne as siens mesfaire

Osast rien par faiz ne par diz,

Il fust mout fiers e mout hardiz;

Qu'ele puet mout nuire e aidier.

1024

Ce n'est mie ne d'ui ne d'ier

Que riches genz ont grant puissance

De faire e aide e grevance.

Tuit li graignor e li menor

1028

Portoient a Richece enor;

Tuit beoient a li servir

Por l'amor de li deservir;

Chascuns sa dame la clamoit,

1032

Car toz li mondes la cremoit;

Toz li monz iert en son dangier.

A sa cort ot maint losengier,

Maint traitor, maint envieus:

1036

Ce sont cil qui sont curieus

De desprisier e de blasmer

Toz ceus qui miauz font a amer.

Par devant, por aus losengier,

1040

Loent les genz li losengier,

E tot le mont par parole oignent;

Mais lor losenges les genz poignent

Par derriere jusques a l'os;

1044

Qu'il abaissent des bons les los

E desloent les alosez.

Mainz prodomes ont encusez

Li losengier par lor losenges,

1048

Car il font cens de cort estranges

Qui deüssent estre privé.

Mal puissent il estre arivé,

Icil losengier plein d'envie!

1052

Car nus prodon n'aime lor vie.

Richece ot d'une porpre robe,

Nou tenez ore pas a lobe;

Que je vos di bien e afiche

1056

Qu'il n'ot si bele ne si riche

Ou monde ne si envoisiee.

La porpre fu toute orfroisiee;

S'i ot portraites a orfrois

1060

Estoires de dus e de rois.

D'une bande d'or neelee

A esmaus fu au col orlee

Mout richement la cheveçaille.

1064

E s'i ot, ce sachiez senz faille,

De riches pierres grant plenté,

Qui mout rendoient grant clarté.

Richece ot un mout riche ceint

1068

Par desus cele porpre ceint;

La bocle d'une pierre fu

Qui ot grant force e grant vertu;

Car cil qui sor soi la portoit

1072

De nul venin rien ne doutoit:

Nus nou pooit envenimer.

Bien faisoit tel pierre a amer:

Ele vausist a un riche ome

1076

Miauz que trestoz li ors de Rome.

D'une autre pierre iert li mordanz,

Qui guerissoit dou mal des denz,

E si avoit un tel eür

1080

Que cil pooit estre asseür

Trestot le jor de sa veüe

Qui a jeün l'avoit veüe.

Li clou furent d'or esmeré

1084

Qui furent ou tessu doré;

Si estoient gros e pesant:

En chascun ot bien un besant.

Richece ot sus ses treces sores

1088

Un cercle d'or; onques encores

Ne fu veüz si biaus, ce cuit.

Li cercles fu d'or fin recuit;

Mais cil seroit bons devisierres

1092

Qui vos savroit toutes les pierres

Qui i estoient devisier;

Car l'en ne porroit pas prisier

L'avoir que les pierres valoient

1096

Qui en l'or assises estoient:

Rubiz i ot, saphirs, jagonces,

Esmeraudes plus de deus onces.

Mais devant ot par grant maistrise

1100

Une escarbocle ou cercle assise;

E la pierre si clere estoit

Que, maintenant qu'il anuitoit.

L'en s'en veoit bien au besoing

1104

Conduire d'une live loing.

Tel clarté des pierres issoit

Que Richece en resplendissoit

Durement li vis e la face,

1108

E entor li toute la place.

Richece tint par mi la main

Un vallet de grant biauté plein,

Qui fu ses amis veriteus,

1112

C'est uns on qui en biaus osteus

Maintenir mout se delitoit.

Il se chauçoit bien e vestoit;

Si avoit les chevaus de pris.

1116

Il cuidast bien estre repris

Ou de murtre ou de larrecin

Se en s'estable eüst roncin.

Por ce amoit mout l'acointance

1120

De Richece e la bienvoillance

Qu'il avoit toz jorz son espens

A demener les granz despens,

E el les pooit bien fornir,

1124

E ses despenses maintenir;

Qu'el li donoit autant deniers

Con s'el les puisast en greniers.

Après se fu Largece prise,

1128

Qui bien fu duite e bien aprise

De faire enor e de despendre.

El fu dou lignage Alixandre,

Si n'avoit tel joie de rien

1132

Con quant el pooit dire: «tien».

Nes Avarice la chaitive

N'iert pas si a prendre ententive

Con Largece estoit de doner;

1136

E Deus li faisoit foisoner

Toz ses biens, qu'ele ne savoit

Tant doner come el plus avoit.

Mout ot Largece pris e los;

1140

Ele ot les sages e les fos

Outreement a son bandon,

Tant avoit fait par son bel don.

S'ensi fust qu'aucuns la haïst,

1144

Si cuit je que ele en feïst

Son ami par son grant servise;

E por ce ot ele a devise

L'amor des povres e des riches.

1148

Mout est fos hauz on qui est chiches.

Hauz on ne puet avoir nul vice

Qui tant li griet come avarice;

Car avers on ne puet conquerre

1152

Ne seignorie ne grant terre,

Car il n'a pas d'amis plenté

Don il face sa volenté.

Mais qui amis voudra avoir,

1156

Si n'ait mie chier son avoir;

Mais par biaus dons amis aquiere;

Car trestot en autel maniere

Con la pierre de l'aïmant

1160

Trait a soi le fer soutilment,

Ausi atrait le cuer des genz

Li ors qu'en done e li argenz.

Largece ot robe toute fresche

1164

D'une porpre sarradinesche.

S'ot le vis bel e bien formé;

Mais ele ot son col desfermé;

Qu'ele avoit iluec en present

1168

A une dame fait present,

N'avoit guieres, de son fermal;

Mais ce ne li seoit pas mal

Que la cheveçaille iert overte,

1172

E la gorge estoit descoverte

Si que par outre la chemise

Li blancheioit la char alise.

Largece la vaillant, la sage,

1176

Tint un chevalier dou lignage

Le bon roi Artu de Bretaigne;

Ce fu cil qui porta l'enseigne

De valor e le gonfanon.

1180

Encore est il de tel renon

Que l'en conte de lui les contes

E devant rois e devant contes.

Cil chevaliers novelement

1184

Fu venuz d'un tornoiement,

Ou il ot faite por s'amie

Mainte joste e mainte envaïe;

Maint vert hiaume i ot descerclé

1188

E percié maint escu boclé,

E maint chevalier abatu

E pris par force e par vertu.

Après toz ceus se tint Franchise,

1192

Qui n'estoit pas brune ne bise,

Ainz estoit blanche come nois;

E si n'ot pas nés orlenois,

Ançois ot nés lonc e traitiz,

1196

Iauz vairs, rianz, sorciz voutiz;

S'ot les cheveus blondez e lons;

E fu simple come uns colons.

Le cuer ot douz e debonaire:

1200

Ele n'osast dire ne faire

A nului rien qu'el ne, deüst;

E s'ele un ome coneüst

Qui fust destroiz por s'amitié,

1204

Tost en eüst , ce cuit, pitié;

Qu'ele ot le cuer si piteable

E si douz e si amiable

Que, se nus por li mal traisist,

1208

S'el ne li aidast, el crainsist

Qu'el feïst mout grant vilanie.

El fu en une sorquenie

Qui ne fu mie de borraz:

1212

N'ot si riche jusqu'a Arraz;

E si fu si cuillie e jointe

Qu'il n'i ot une seule pointe

Qui a son droit ne fust assise.

1216

Mout fu bien vestue Franchise,

Car nule robe n'est si bele

Con sorquenie a damoisele;

Fame est plus cointe e plus mignote

1220

En sorquenie que en cote.

La sorquenie, qui fu blanche,

Senefioit que douce e franche

Estoit cele qui la vestoit.

1224

Uns bachelers juenes s'estoit

Pris a Franchise lez a lez.

Ne sai coment iert apelez;

Mais biaus iert e genz s'il fust ores

1228

Fiz au seignor de Guindesores.