Le Roman de la Rose

Chapitre VI

____________________________________________________________________________

Ci dit l'Amant des biax atours

Dont iert vestus li Diez d'Amours.

A li se tint de l'autre part

Li deus d'Amors, cil qui depart

Amoretes a sa devise.

868

C'est cil qui les amanz jostise,

E qui abat l'orgueil des genz,

E si fait des seignors sergenz,

E des dames refait baesses,

872

Quant il les trueve trop engresses.

Li deus d'Amors de la façon

Ne resembla mie garçon;

De biauté fist mout a prisier.

876

Mais de sa robe devisier

Crien durement qu'encombrez soie;

Qu'il n'avoit pas robe de soie,

Ainz avoit robe de floretes,

880

Faite par fines amoretes.

A losenges, a escuciaus.

A oiselez, a lionciaus,

E a bestes e a leparz

884

Fu la robe de toutes parz

Portraite, e ovree de flors

Par diverseté de colors.

Flors i avoit de maintes guises,

888

Qui furent par grant sen assises.

Nule flor en esté ne naist

Qui n'i fust, nes flor de genest,

Ne violete ne parvenche,

892

Ne flor jaune n'inde ne blanche.

S'i ot par leus entremellees

Fueilles de roses granz e lees.

Il ot ou chief un chapelet

896

De roses; mais rossignolet,

Qui entor son chief voletoient,

Les fueilles jus en abatoient;

Qu'il estoit toz coverz d'oisiaus,

900

De papegauz, de rossigniaus,

De calandres e de mesenges.

Il sembloit que ce fust uns anges

Qui fust tot droit venuz dou ciel.

904

Amors avoit un jovenciel

Qu'il faisoit estre iluec delez;

Douz Regarz estoit apelez.

Icil bachelers regardoit

908

Les queroles, e si gardoit

Au deu d'Amors deus ars turcois.

Li uns des ars si fu d'un bois

Don li fruiz est mal savorez.

912

Toz pleins de neuz e bocerez

Fu cil ars desoz e deseure,

E si estoit plus noirs que meure.

Li autres ars fu d'un plançon

916

Longuet e de gente façon;

Si fu bien faiz e bien dolez,

E si fu mout bien pipolez.

Dames i ot de toz sens pointes,

920

E vallez envoisiez e cointes.

O ces deus ars tint Douz Regarz,

Qui ne sembla pas estre garz,

Jusqu'a dis des floiches son maistre.

924

Il en tint cinc en sa main destre;

Mais mout orent ices cinc floiches

Les penons bien faiz e les coiches,

Si furent toutes a or pointes;

928

Forz e trenchanz orent les pointes

E agües por bien percier;

Mais il n'i ot fer ne acier:

Onc n'i ot rien qui d'or ne fust,

932

Fors que les penons e le fust,

Car eus furent encarrelees

De saietes d'or barbelees.

La meillor e la plus isnele

936

De ces floiches, e la plus bele,

E cele ou li meillor penon

Furent ente, Biautez ot non.

Une de celes qui plus blece

940

Rot non, ce m'est avis, Simplece.

Une autre en i ot, apelee

Franchise; cele iert empenee

De valor e de cortoisie.

944

La quarte avoir non Compaignie;

En cele ot mout pesant saiete;

El n'estoit pas d'aler loing prete;

Mais qui de près en vosist traire,

948

Il en peüst assez mal faire.

La cinquieme ot non Biaus Semblanz:

Ce fu toute la moins grevanz;

Neporquant el fait mout grant plaie;

952

Mais cil atent bone menaie

Qui de cele floiche est plaiez;

Ses maus si est bien empleiez,

Car il puet tost santé atendre,

956

S'en doit estre sa dolor mendre.

Cinc floiches i ot d'autre guise,

Qui furent laides a devise;

Li fust estoient e li fer

960

Plus noir que deables d'enfer.

La premiere avoit non Orguiauz;

L'autre, qui ne valoit pas miauz,

Fu apelee Vilanie:

964

Cele si fu de felonie

Toute teinte e envenimee.

La tierce fu Honte clamee,

E la quarte Desesperance;

968

Noviaus Pensers fu senz doutance

Apelee la derreniere.

Ces cinc floiches d'une maniere

Furent e toutes resemblables.

972

Mout par lor estoit covenables

Li uns des ars, qui fu hisdeus

E pleins de neuz e bocereus;

Il devoit bien teus floiches traire.

976

Ces cinc floiches force contraire

As autres cinc orent senz doute;

Mais ne dirai ore pas toute

Lor force ne lor poesté;

980

Bien vos en iert la verité

Contee e la senefiance,

Nou metrai pas en obliance,

Ainz vos dirai que tot ce monte,

984

Ançois que je fine mon conte.

Or revendrai a ma parole:

Des nobles genz de la querole

M'estuet dire les contenances

988

E les façons e les semblances,

Li deus d'Amors se fu bien pris;

A une dame de haut pris

Se fu de mout près ajostez.

992

Icele dame ot non Biautez,

Ausi come une des cinc floiches.

En li ot mout de bones toiches:

El ne fu oscure ne brune,

996

Ainz fu clere come la lune,

Envers cui les autres estoiles

Resemblent petites chandoiles.

Tendre ot la char come rosee;

1000

Simple fu come une esposee,

E blanche come flor de lis.

Ele ot le vis cler e alis,

S'estoit graillete e aligniee.

1004

Ne fu fardee ne guigniee,

Car el n'avoit mie mestier

De soi tifer ne afaitier.

Les cheveus ot blondez e lons,

1008

Qui li batoient as talons.

Nés ot bien fait e iauz e bouche.

Mout grant douçor au cuer me touche,

Si m'aïst Deus, quant il me membre

1012

De la façon de chascun membre,

Qu'il n'ot si bele fame ou monde.

Briement el fu jonete e blonde,

Sade, plaisant, aperte e cointe,

1016

Grasse, graillete, gente e jointe.