Le Roman de la Rose

Chapitre VIII

____________________________________________________________________________

Ci parle l'Aucteur de Courtoisie

Qui est courtoise et de tous prisie,

Et par tout fet moult à loer:

Chascun doit Courtoisie amer.

Après se tenoit Cortoisie,

Qui mout estoit de toz proisie,

Qu'el n'iere orguilleuse ne fole.

1232

C'est cele qui a la querole,

La seue merci, m'apela

Ainz que nule, quant je vin la.

El ne fu ne nice n'ombrage,

1236

Mais sage e entre, senz outrage,

De biaus respons e de biaus diz;

Onc ne fu nus par li laidiz,

Ne ne porta autrui rancune.

1240

Ele fu une clere brune;

Le vis avoit cler e luisant:

Je ne sai fame plus plaisant.

Ele iere en toutes corz bien dine

1244

D'estre empereriz ou reïne.

A li se tint uns chevaliers

Acointables e biaus parliers,

Qui bien sot faire enor as genz.

1248

Li chevaliers fu biaus e genz,

E as armes bien acesmez,

E de s'amie bien amez.