Avianus novus

Liber I

____________________________________________________________

Fabula XII

[De pavone et grue]

Avianus XV

Pluribus est poenae nostrum dictare Camenae,

verbis nos laedunt nec ratione queunt.

talia vel fingant vel verbis laedere linquant,

si non posse dolent, nostra vel acta probent.

5

ingenii normae subsistit gloria formae,

forma cadit genii, vis manet ingenii.

haesitet ut nemo, ratione sequente docebo,

et quod Musa sonat, fabula nostra probat.

ore sub ignavo certavit cum grue pavo

10

submittendo suis livida terga gruis.

«par species stellis nostris est insita pennis,

tu palles alis, regia dicor avis.»

grus moderata satis dat verbis verba relatis,

«tu secus ima gravis picta manebis avis.

15

semper habes terras, licet alis sidera gestas,

tu stas pressa solo, cum super astra volo.

respuo picturas pennarum praeterituras,

te tua picta premit, me mea nigra vehit.»