Evangelistarium

fol. 103v-104r

Mt. 22:34-46; 23:1-12

____________________________________________________________

Manuscriptum

Dominica.

Sequentia sancti evangelii

secundum Matthaeum.

22:34

In illo tempore. Accesserunt ad Ihesum Pharisaei

22:35

et interrogavit eum unus ex eis legis doctor, temptans eum:

22:36

Magister, quod est mandatum magnum in lege?

22:37

Ait illi Ihesus: Diliges Dominum Deum tuum ex toto corde tuo, et in tota anima tua, et in tota mente tua.

22:38

Hoc est maximum, et primum mandatum.

22:39

Secundum autem simile est huic: Diliges proximum tuum, sicut teipsum.

22:40

In his duobus mandatis universa lex pendet, et prophetae.

22:41

Congregatis autem pharisaeis, interrogavit eos Ihesus,

22:42

dicens: Quid vobis videtur de Christo? cuius filius est? Dicunt ei: David.

22:43

Ait illis: Quomodo ergo David in spiritu vocat eum Dominum, dicens:

22:44

Dixit Dominus Domino meo: Sede a dextris meis, donec ponam inimicos tuos scabellum pedum tuorum?

22:45

Si ergo David vocat eum Dominum, quomodo filius eius est?

22:46

Et nemo poterat respondere ei verbum: neque ausus fuit quisquam ex illa die eum amplius interrogare.

23:1

Tunc locutus est Ihesus ad turbas, et ad discipulos suos,

23:2

dicens: Super cathedram Moysi sederunt scribae et pharisaei.

23:3

Omnia ergo quaecumque dixerint vobis, servate, et facite: secundum opera vero eorum nolite facere: dicunt enim, et non faciunt.

23:4

Alligant autem onera gravia, et inportabilia, et inponunt in humeros hominum: digito autem suo nolunt ea movere.

23:5

Omnia vero opera sua faciunt ut videantur ab hominibus: dilatant enim phylacteria sua, et magnificant fimbrias.

23:6

Amant autem primos recubitus in caenis, et primas cathedras in synagogis,

23:7

et salutationes in foro, et vocari ab hominibus Rabbi.

23:8

Vos autem nolite vocari Rabbi: unus est enim magister vester, omnes autem vos fratres estis.

23:9

Et patrem nolite vocare vobis super terram: unus est enim pater vester qui in caelis est.

23:10

Nec vocemini magistri: quia magister vester unus est, Christus.

23:11

Qui maior est vestrum, erit minister vester.

23:12

Qui autem se exaltaverit, humiliabitur: et qui se humiliaverit, exaltabitur.