Evangelistarium

fol. 97v-98v

Lc. 10:23-37

____________________________________________________________

Manuscriptum

Dominica XIIII post pentecosten.

Sequentia sancti evangelii

secundum Lucam.

10:23

In illo tempore. Dixit Ihesus discipulis suis: Beati oculi qui vident quae videtis.

10:24

Dico enim vobis quod multi prophetae et reges voluerunt videre quae vos videtis, et non viderunt: et audire quae auditis, et non audierunt.

10:25

Et ecce quidam legisperitus surrexit temptans illum, et dicens: Magister, quid faciendo vitam aeternam possidebo?

10:26

At ille dixit ad eum: In lege quid scriptum est? quomodo legis?

10:27

Ille respondens dixit: Diliges Dominum Deum tuum ex toto corde tuo, et ex tota anima tua, et ex omnibus virtutibus tuis, et ex omni mente tua: et proximum tuum sicut teipsum.

10:28

Dixitque illi: Recte respondisti: hoc fac, et vives.

10:29

Ille autem volens iustificare seipsum, dixit ad Ihesum: Et quis est meus proximus?

10:30

Suscipiens autem Ihesus, dixit: Homo quidam descendebat ab Hierusalem in Hiericho, et incidit in latrones, qui etiam despoliaverunt eum: et plagis impositis abierunt semivivo relicto.

10:31

Accidit autem ut sacerdos quidam descenderet eadem via: et viso illo praeterivit.

10:32

Similiter et Levita, cum esset secus locum, et videret eum, pertransiit.

10:33

Samaritanus autem quidam iter faciens, venit secus eum: et videns eum, misericordia motus est.

10:34

Et appropians alligavit vulnera eius, infundens oleum et vinum: et imponens illum in iumentum suum, duxit in stabulum, et curam eius egit.

10:35

Et altera die protulit duos denarios, et dedit stabulario, et ait: Curam illius habe: et quodcumque supererogaveris, ego cum rediero reddam tibi.

10:36

Quis ergo horum trium videtur tibi proximus fuisse illi, qui incidit in latrones?

10:37

At ille dixit: Qui fecit misericordiam in illum. Et ait illi Ihesus: Vade, et tu fac similiter.