Evangelistarium

fol. 17r-18r

Mc. 5:1-19

____________________________________________________________

Manuscriptum

Sequentia sancti evangelii

Feria VI

secundum Marcum.

5:1

In illo tempore. Venit Ihesus trans fretum maris in regionem Gerase­norum.

5:2

Et exeunti ei de navi, statim occurrit ei homo demonumento in spiritu inmundo,

5:3

qui domicilium habebat in monumentis, et neque catenis iam quisquam eum poterat ligare:

5:4

quoniam saepe compedibus et catenis vinctus, disrupisset catenas, et compedes comminuisset, et nemo poterat eum domare:

5:5

et semper nocte ac die in monumentis, et in montibus erat, clamans, et concidens se lapidibus.

5:6

Videns autem Ihesum a longe, cucurrit, et adoravit eum:

5:7

et clamans voce magna dixit: Quid mihi et tibi, Ihesu Fili Dei summi? adjuro te per Deum, ne me torqueas.

5:8

Dicebat enim illi: Exi spiritus immunde ab homine.

5:9

Et interrogabat eum: Quod tibi nomen est? Dicit ei: Legio nomen mihi est, quia multi sumus.

5:10

Et deprecabatur eum multum, ne se expelleret extra regionem.

5:11

Erat autem ibi grex porcorum magnus, pascens.

5:12

Et deprecabantur eum spiritus, dicentes: Mitte nos in porcos ut in eos introeamus.

5:13

Et concessit eis statim Ihesus. Et exeuntes spiritus immundi introierunt in porcos: et magno impetu grex praecipitatus est in mare ad duo millia, et suffocati sunt in mari.

5:14

Qui autem pascebant eos, fugerunt, et nuntiaverunt in civitatem et in agros. Et egressi sunt videre quid esset facti:

5:15

et veniunt ad Ihesum: et vident illum qui a daemonio vexabatur, sedentem, vestitum, et sana mentis, et timuerunt.

5:16

Et narraverunt illis, qui viderant, qualiter factum esset ei qui damonium habuerat, et de porcis.

5:17

Et rogare coeperunt eum ut discederet de finibus eorum.

5:18

Cumque ascenderet navim, coepit illum deprecari, qui a daemonio vexatus fuerat, ut esset cum illo,

5:19

et non admisit eum, sed ait illi: Vade in domum tuam ad tuos, et adnuntia illis quanta tibi Dominus fecerit, et misertus sit tui.