Ἀνθολογία Παλατινή

3. Τὰ ἐν Κυζίκωι ἐπιγράμματα

______________________________________________________________________

10.

Ἐν δὲ τῶι κατὰ δύσιν πλευρῶι ἐστὶν ἐν ἀρχῆι τοῦ ιʹ πίνακος

Εὔνοος γεγλυμμένος καὶ Θόας, οὓς ἐγέννησεν Ὑψιπύλη,

ἀναγνωριζόμενοι τῆι μητρὶ καὶ τὴν χρυσῆν δεικνύντες ἄμπελον,

ὅπερ ἦν αὐτοῖς τοῦ γένους σύμβολον, καὶ ῥυόμενοι αὐτὴν τῆς

διὰ τὸν Ἀρχεμόρου θάνατον παρ᾽ Εὐρυδίκηι τιμωρίας

Φαῖνε, Θόαν, Βάκχοιο φυτὸν τόδε· ματέρα γάρ σου

ῥύσηι τοῦ θανάτου, οἰκέτιν Ὑψιπύλαν·

ἃ τὸν ἀπ᾽ Εὐρυδίκας ἔτλη χόλον, ἦμος ἀφαυρὸν

ὕδρος ὁ γᾶς γενέτας ὤλεσεν Ἀρχέμορον.

στεῖχε δὲ καὶ σὺ λιπὼν Ἀσωπίδος ἀφνεὸν οὖθαρ,

γειναμένην ἄξων Λῆμνον ἐς ἠγαθέην.

Ἀνώνυμος