Ἥμνοι

Textus:

Procli philosophi Platonici opera edita, p. 1315

ed. Victor Cousin,

Parisiis: Aug. Durand, 1864

____________________________________________________________

ΕΙΣ ΑΦΡΟΔΙΤΗΝ Δʹ.

Ὑμνέομεν σειρὴν πολυώνυμον Ἀφρογενείης,

καὶ πηγὴν μεγάλην βασιλήϊον, ἧς ἄπο πάντες

ἀθάνατοι πτερόεντες ἀνεβλάστησαν Ἔρωτες.

ὧν οἱ μὲν νοεροῖσιν ὀϊστεύουσι βελέμνοις

5

ψυχὰς, ὄφρα πόθων ἀναγώγια κέντρα λαβοῦσαι,

μητέρος ἰσχανόωσιν ἰδεῖν πυριφεγγέας αὐλάς·

οἱ δὲ πατρὸς βουλῆισιν ἀλεξικάκοις τε προνοίαις,

ἱέμενοι γενεῆισιν ἀπείρονα κόσμον ἀέξειν,

ψυχαῖς ἵμερον ὦρσαν ἐπιχθονίου βιότοιο·

10

ἄλλοι δ᾽ ἐγγαμίων ὀάρων πολυειδέας οἴμους

αἰὲν ἐποπτεύουσιν, ὅπως θνητῆς ἀπὸ φύτλης

ἀθάνατον τεύχωσι δυηπαθέων γένος ἀνδρῶν·

πᾶσιν δ᾽ ἔργα μέμηλεν ἐρωτοτόκου Κυθερείης.

ἀλλὰ, θεὰ, πάντηι γὰρ ἔχεις ἀριήκοον οὖας,

15

εἴτε περισφίγγεις μέγαν οὐρανὸν, ἔνθα σέ φασιν

ψυχὴν ἀενάοιο πέλειν κόσμοιο θεείην,

εἴτε καὶ ἑπτὰ κύκλων ὑπὲρ ἄντυγας αἰθέρι ναίεις,

σειραῖς ὑμετέραις δυνάμεις προχέουσ᾽ ἀδαμάστους,

κέκλυθι, καὶ πολύμοχθον ἐμὴν βιότοιο πορείην

20

ἰθύνοις σέο, πότνα, δικαιοτάτοισι βελέμνοις,

οὐχ ὁσίων παύουσα πόθων κρυόεσσαν ἐρωήν.