Γεωγραφικὴ ὑφήγησις

Βιβλίον αʹ

________________________________________________________________

{35}

Κεφ. ιςʹ.

Ὅτι παρῆλθέ τινα αὐτὸν καὶ κατὰ τοὺς

τῶν ἐπαρχιῶν περιορισμούς.

§ 1. Παρῆλθε δέ τινα αὐτὸν καὶ κατὰ τοὺς περιορισμούς, ὡς ὅταν τὴν μὲν Μυσίαν πᾶσαν ἀπ᾽ ἀνατολῶν ὁρίζηι τῆι Ποντικῆι θαλάσσηι, τὴν δὲ Θράικην ἀπὸ δυσμῶν Μυσίαι τῆι ἄνω, καὶ τὴν μὲν Ἰταλίαν ἀπ᾽ ἄρκτων μὴ Ῥαιτίαι καὶ Νωρικῶι μόνον, ἀλλὰ καὶ Παννονίαι, τὴν δὲ Παννονίαν ἀπὸ μεσημβρίας Δαλματίαι μόνηι καὶ μηκέτι τῆι Ἰταλίαι, καὶ τοὺς μὲν μεσογείους Σογδιανοὺς καὶ τοὺς Σάκας γειτνιάζειν ἀπὸ μεσημβρίας τῆι Ἰνδικῆι, τοὺς δὲ βορειοτέρους τοῦ Ἰμάου ὄρους, ὅ ἐστιν ἀρκτικώτατον τῆς Ἰνδικῆς, δύο παραλλήλους, τόν τε δι᾽ Ἑλλησπόντου καὶ τὸν διὰ Βυζαντίου μὴ γράφηι διὰ τῶν εἰρημένων ἐθνῶν, ἀλλὰ πρώτως τὸν διὰ μέσου Πόντου.