Μυθιάμβοι

Αἰσώπειοι

Προοίμιον βʹ

___________________________________________________

Ἀρχὴ

τοῦ βʹ τμήματος

Μῦθος μέν, ὦ παῖ βασιλέως Ἀλεξάνδρου,

Σύρων παλαιῶν ἐστιν εὕρεμʹ ἀνθρώπων,

οἳ πρίν ποτʹ ἦσαν ἐπὶ Νίνου τε καὶ Βήλου.

πρῶτος δέ, φασίν, εἶπε παισὶν Ἑλλήνων

5

Αἴσωπος ὁ σοφός, εἶπε καὶ Λιβυστίνοις 

λόγους Κυβίσσης. ἀλλʹ ἐγὼ νέηι μούσηι

δίδωμι καθαρῶι χρυσίωι χαλινώσας

τὸν μυθίαμβον ὥσπερ ἵππον ὁπλίτην.

ὑπʹ ἐμοῦ δὲ πρώτου τῆς θύρης ἀνοιχθείσης

10

εἰσῆλθον ἄλλοι, καὶ σοφωτέρης μούσης

γρίφοις ὁμοίας ἐφέρουσι ποιήσεις,

μαθόντες οὐδὲν πλεῖον ἤ με γινώσκειν.

ἐγὼ δὲ λευκῆι μυθιάζομαι ῥήσει,

καὶ τῶν ἰάμβων τοὺς ὀδόντας οὐ θήγω,

15

ἀλλʹ εὖ πυρώσας, εὖ δὲ κέντρα πρηύνας,

ἐκ δευτέρου σοι τήνδε βίβλον ἀείδω.