Μῦθοι Αἰσώπειοι

___________________________________________________

249b.

Ἄλλως.

(C. p. 145. ex Diod. XVIII, c. 25.)

Ἐρασθέντα φασὶ λέοντα παρθένου διαλεχθῆναι τῶι πατρὶ τῆς κόρης ὑπὲρ τοῦ γάμου· τὸν δὲ πατέρα λέγειν, ὡς ἕτοιμος μέν ἐστιν αὐτῶι δοῦναι, δεδοικέναι δὲ τοὺς ὄνυχας καὶ τοὺς ὀδόντας, μή ποτε γήμας καὶ παροξυνθεὶς διά τινα αἰτίαν προσενέγκηται τῆι παρθένωι θηριωδῶς. Τοῦ δὲ λέοντος ἐκελόντος τούς τε ὄνυχας καὶ τοὺς ὀδόντας, τὸν πατέρα θεωρήσαντα πάντα δι᾿ ὧν ἦν φοβερὸς ἀποβεβληκότα, τύπτοντα τῶι ξύλωι ῥαιδίως ἀποκτεῖναι.