Μῦθοι Αἰσώπειοι

___________________________________________________

115.

Δέλφαξ καὶ Πρόβατα.

(S. 86. C. p. 362. F. 72.)

Ἔν τινι ποίμνηι δέλφαξ εἰσελθὼν ἐνέμετο. Καὶ δή ποτε τοῦ ποιμένος συλλαμβάνοντος αὐτὸν, ἐκεκράγει τε καὶ ἀντέτεινε· τῶν δὲ προβάτων αὐτὸν αἰτιωμένων ἐπὶ τῶι βοᾶν, καὶ λεγόντων, «ἡμᾶς μὲν συνεχῶς συλλαμβάνει, καὶ οὐ κράζομεν,» ἔφη πρὸς ταῦτα· «ἀλλ᾿ οὐχ ὁμοία τῆι ὑμετέραι ἡ ἐμὴ σύλληψις· ὑμᾶς γὰρ ἢ διὰ τὰ ἔρια ἀγρεύει ἢ διὰ τὸ γάλα· ἐμὲ δὲ διὰ τὸ κρέας.»

[59] Ὁ λόγος δηλοῖ, ὅτι εἰκότως ἐκεῖνοι ἀνοιμώζουσιν, οἷς ὁ κίνδυνος οὐ περὶ χρημάτων ἐστὶν, ἀλλὰ περὶ αὐτῆς τῆς σωτηρίας.