Μῦθοι Αἰσώπειοι

___________________________________________________

114.

Δειλὸς κυνηγὸς καὶ Δρυοτόμος.

(C. 175. F. 267. B. 92.)

Λέοντός τινος ἴχνη ἐζήτει κυνηγός· δρυοτόμον δὲ ἐρωτήσας, εἰ εἶδεν ἴχνη λέοντος, καὶ ποῦ κοιτάζει, ἔφη· «καὶ αὐτὸν τὸν λέοντα ἤδη σοι δείξω.» Ὁ δὲ ὠχριάσας ἐκ τοῦ φόβου, καὶ τοὺς ὀδόντας συγκρούων εἶπεν· «ἴχνη μόνα ζητῶ, οὐχὶ αὐτὸν τὸν λέοντα.»

Ὅτι τοὺς θρασεῖς καὶ δειλοὺς ὁ λόγος ἐλέγχει, τοὺς τολμηροὺς ἐν τοῖς λόγοις μόνοις καὶ οὐκ ἐν τοῖς ἔργοις.