Προμηθεύς δεσμώτης

Στάσιμος βʹ (526-560)

____________________________________________________________________

Χορός

526

μηδάμ᾽ ὁ πάντα νέμων

θεῖτ᾽ ἐμᾶι γνώμαι κράτος ἀντίπαλον Ζεύς,

530

μηδ᾽ ἐλινύσαιμι θεοὺς ὁσίαις θοί-

ναις ποτινισομένα

βουφόνοις παρ᾽ Ὠκεανοῦ πατρὸς ἄσβεστον πόρον,

μηδ᾽ ἀλίτοιμι λόγοις,

535

ἀλλά μοι τόδ᾽ ἐμμένοι καὶ μήποτ᾽ ἐκτακείη.

ἁδύ τι θαρσαλέαις

τὸν μακρὸν τείνειν βίον ἐλπίσι, φαναῖς

540

θυμὸν ἀλδαίνουσαν ἐν εὐφροσύναις. φρίσ-

σω δέ σε δερκομένα

μυρίοις μόχθοις διακναιόμενον <.......>·

Ζῆνα γὰρ οὐ τρομέων

ἰδίαι γνώμαι σέβηι θνατοὺς ἄγαν, Προμηθεῦ.

545

φέρ᾽ ὅπως ἄχαρις χάρις, ὦ φίλος·

εἰπὲ ποῦ τίς ἀλκά;

τίς ἐφαμερίων ἄρηξις; οὐδ᾽ ἐδέρχθης

ὀλιγοδρανίαν ἄκικυν ἰσόνειρον,

550

ἇι τὸ φωτῶν ἀλαὸν γένος ἐμπεπο-

δισμένον; οὔποτε <.......>

τὰν Διὸς ἁρμονίαν θνα-

τῶν παρεξίασι βουλαί.

ἔμαθον τάδε σὰς προσιδοῦσ᾽ ὀλο-

ὰς τύχας, Προμηθεῦ·

555

τὸ διαμφίδιον δέ μοι μέλος προσέπτα,

τόδ᾽ ἐκεῖνό θ᾽, ὅ τ᾽ ἀμφὶ λουτρὰ καὶ λέχος σὸν

ὑμεναίουν ἰότατι γάμων, ὅτε

τὰν ὁμοπάτριον ἕδνοις

560

ἄγαγες Ἡσιόναν πι-

θὼν δάμαρτα κοινόλεκτρον.