Περὶ ἑρμηνείας

________________________________________________________

5

Ἔστι δὲ εἷς πρῶτος λόγος ἀποφαντικὸς κατάφασις, εἶτα ἀπόφασις· οἱ δ' ἄλλοι πάντες συνδέσμωι ¹⁾ εἷς. ἀνάγκη δὲ πάντα λόγον ἀποφαντικὸν ἐκ ῥήματος εἶναι ἢ πτώσεως [10] ῥήματος· καὶ ²⁾ γὰρ ὁ τοῦ ἀνθρώπου λόγος, ἐὰν μὴ τὸ ἔστιν ἢ ἦν ἢ ἔσται ³⁾ ἤ τι τοιοῦτον προστεθῆι, οὔπω λόγος ἀποφαντικός. διότι δὴ ⁴⁾ ἕν τί ἐστιν ἀλλ' οὐ πολλὰ τὸ ζῶιον πεζὸν δίπουν· οὐ γὰρ δὴ τῶι σύνεγγυς εἰρῆσθαι εἷς ἔσται. ἔστι δὲ ἄλλης πραγματείας τοῦτο ⁵⁾ εἰπεῖν. ἔστι δὲ εἷς λόγος ἀποφαντικὸς ἢ [15] ὁ ἓν δηλῶν ἢ ὁ συνδέσμωι εἷς, πολλοὶ δὲ οἱ πολλὰ καὶ μὴ ἓν ἢ οἱ ἀσύνδετοι. τὸ μὲν οὖν ὄνομα ἢ ⁶⁾ ῥῆμα φάσις ἔστω μόνον, ἐπειδὴ ⁷⁾ οὐκ ἔστιν εἰπεῖν οὕτω δηλοῦντά τι τῆι φωνῆι ὥστε ⁸⁾ ἀποφαίνεσθαι, ἢ ἐρωτῶντός τινος, ἢ μὴ, ἀλλ' αὐτὸν προαιρούμενον. τούτων δ' ἡ μὲν ἁπλῆ ἐστὶν ἀπόφανσις, οἷον [20] τὶ κατά τινος ἢ τὶ ἀπό τινος, ἡ δ' ἐκ τούτων συγκειμένη οἷον λόγος τις ἤδη σύνθετος. ἔστι δὲ ⁹⁾ ἡ ἁπλῆ ¹⁰⁾ ἀπόφανσις φωνὴ σημαντικὴ περὶ τοῦ ὑπάρχειν ¹¹⁾ τι ἢ μὴ ὑπάρχειν ¹²⁾, ὡς οἱ χρόνοι διήιρηνται.

_____________

1) ἄλλοι πάντες συνδέσμωι] ἄλλοι συνδέσμωι M-P 

2) πτώσεως ῥήματος· καὶ] πτώσεως· καὶ M-P 

3) ἢ ἦν ἢ ἔσται] ἢ ἔσται ἢ ἦν M-P 

4) δὴ] δὲ M-P 

5) πραγματείας τοῦτο] τοῦτο πραγματείας M-P 

6) ἢ] καὶ τὸ M-P 

7) ἐπειδὴ] ἐπεὶ M-P 

8) ὥστε] ὥστ' M-P 

9) δὲ] δ' M-P 

10) ἡ ἁπλῆ] ἡ μὲν ἁπλῆ M-P 

11) τοῦ ὑπάρχειν] τοῦ εἰ ὑπάρχει M-P 

12) ὑπάρχειν] ὑπάρχει M-P