Verfåten vun de Free un

Hansestadt Hamborg

2002

______________________________________________________________________________

VI.

Dat Rechtspreken

Artikel 62 [Richter sünd free, mööt sick åver an de Gesetten holen]

Unafhängige Gerichte sünd tostännig för all de Rebeeten vun de Gerichtsborkeit; se mööt dat doon, wat dat Gesett verlangt. As dat Gesett dat vörsüht, sünd Manns– un Froonslüüd ut dat Volk bedeeligt, wo Gerichte Recht spreken doot.

Artikel 63 [Richter ut Profession]

(1) Richterinnen un Richter ut Profession ward vun den Senåt op Vörslag vun'n Richterwåhlutschuss bestellt. Artikel 45 gellt ok hier. De Richterwåhlutschuss besteiht ut dree Lüüd ut den Senåt oder Senåtssyndici, söss börgerliche Lüüd, dree Richterinnen oder Richter un twee Advokåtinnen oder Advokåten. Dat Gesett regelt dat genauer. Dat kann vorsehen, dat bi bestimmte Gerichte för de Advokåtinnen un Advokåten anner Personen insett ward, de sick mit disse Gerichte besünners goot utkennt.

(2) De Richterinnen un Richter ut Profession ward för jüm ehr Levenstiet bestellt. Se mööt nå dat, wat se sünd un wat se köönt, dorför garanteern, dat se de Opgåven vun ehr Amt op de Reeg kriegt un sünnerlich in ehr Amt un ok annerwogens nich gegen de Grundsatz vun dat Grundgesett för de Bundesrepublik Düütschland ver-steuten doot. De Senåt kann jüm, ehrder se op Levenstiet beropen ward, op Tiet oder op Wedderroop bestellen un so rutfinnen, wat se sünd un wat se köönt; dat is nich meuglich, wenn de Richterwåhlutschuss jüm för en Richteramt aflehnen deit.

(3) Wenn en Richterin oder en Richter in't Amt oder ok annerwogens gegen de Grundsätz vun dat Grundgesett för de Bundesrepublik Düütschland oder disse Verfåten verstött, so kann de Börgerschop gegen ehr oder em mit de Mehrheit vun de, de nå dat Gesett to de Börgerschop heurt, bi dat Bundesverfåtensgericht en Oordeel nå Artikel 98 Afsatz 2 vun dat Grundgesett för de Bundesrepublik Düütschland beandrågen. Dat gellt ok för ehrenamtliche Richterinnen un Richter. Ehrder disse Andrag meuglich is, mutt de Richterwåhlutschuss dor wat to seggen.

(4) Afsatz 3 ward ok för de Richterinnen un Richter anwennt, de al bestellt sünd.

Artikel 64 [Gesetten, de gegen de Verfåten versteut]

(1) Wenn de Gerichten dat Recht anwennt, mööt se de Landesgesetten un de Rechtsverordnungen, de in den Rahmen vun en Gesett tostannen kåmen sünd, inholen, wenn de nå de Ordnung bekannt geven worrn sünd.

(2) Wenn en Gericht meent, en Hamborger Gesett oder en Rechtsverordnung, de in den Rahmen vun so en Gesett tostannen kåmen is, verstött gegen disse Verfåten, so mutt dat Gericht dat Verfohren utsetten un dat Oordeel vun dat Hamborgsche Verfåtensgericht inhålen; dat is åver blots denn neudig, wenn dat bi dat Verfohren op de Frag, wat disse Vorschrift gellt, ankummt. De Artikel 100 vun dat Grundgesett för de Bundesrepublik Düütschland hett dor nix mit to doon.

Artikel 65 [Dat Hamborgsche Verfåtensgericht]

(1) Dat Hamborgsche Verfåtensgericht besteiht ut de Präsidentin oder den Präsident un acht anner Lüüd. De Präsidentin oder de Präsident un dree vun de annern Lüüd mööt hamborgsche Richterinnen un Richter op Levenstiet ween. Twee vun de annern, de to dat Hamborgsche Verfåtensgericht heurt, mööt to dat Richteramt torüst ween. Wokeen to de Börgerschop, den Senåt, den Bundesdag, den Bundesrat, de Bundesregeern oder to disse Organe in anner Länner oder vun de Europäsche Gemeenschop heurt, dörf nich Liddmåt vun dat Verfåtensgericht ween.

(2) De Börgerschop wählt de Liddmåten vun dat Verfåtensgericht op söss Johr. En Wedderwåhl is blots eenmål tolåten. För jeedeen Liddmåt mutt en Vertrederin oder Vertreder wählt warrn. De Senåt sleit de Präsidentin oder den Präsident un en anner Liddmåt vun't Hamborgsche Verfåtensgericht to de Wåhl för, de hamborgsche Richterin oder hamborgsche Richter op Levenstiet is un ok de ehr Vertrederinnen oder Vertreder.

(3) Wat dat Verfåtensgericht entscheden deit:

1. Op Andrag vun den Senåt oder een Föfftel vun de Måten in de Börgerschop över Striet, de sick dorüm dreiht, woans de Verfåten to verståhn is;

2. Woans de Verfåten to verståhn is, wenn dat Striet gifft över de Fråg, wo wied de Rechten un Plichten vun en Verfåtensorgan oder anner Bedeeligte gåht, de dör de Verfåten eegen Rechte hebbt;

3. Op Andrag vun den Senåt oder een Föfftel vun de Måten in de Börgerschop, wenn dor Striet oder Twiefel över opkåmt, wat dat Landesrecht mit de Verfåten oder dat herleit't Landesrecht mit de Landesgesetten övereen geiht;

4. Op Andrag vun den Senåt oder een Föfftel vun de Måten in de Börgerschop, wenn dor verscheden Meenen oder Twiefel över beståht, woans dat Landesrecht utleggt oder anwennt warrn mutt;

5. Op Andrag vun den Senåt, de Börgerschop, een Föfftel vun de Måten in de Börgerschop oder vun de Volksinitiatoren, wat en Volksbegehren un en Volksentscheid (Artikel 50 Afsatz 6) dörfeuhrt ward;

6. Op Andrag vun en Gericht, wat en Gesett oder en Rechtsverordnung (Artikel 64 Afsatz 2) vun de Verfåten tolåten is;

7. Över Klågen gegen den Besluss vun de Börgerschop, wat de Wåhl vun Måten to de Börgerschop rechtens is oder wat se ehrn Platz in de Börgerschop verleert (Artikel 9 Afsatz 2);

8. Op Andrag vun de Börgerschop, wat en Liddmåt vun den Rekenhoff in sien Amt oder butenvör gegen de Grundsätz vun dat Grundgesett för de Bundesrepublik Düütschland oder gegen de Grundsatz vun disse Verfåten verstött hett. Ok wat dat för Folgen hett, wenn hier den Sinn nå de Artikel 98 Afsatz 2 vun dat Grundgesett för de Bundesrepublik Düütschland anwennt ward (Artikel 71 Afsatz 5 Satz 2).

(4) Dör en Gesett köönt op dat Verfåtensgericht anner Opgåven överdrågen warrn.

(5) Wenn dat Verfåtensgericht wat entscheden deit, mööt sick de Gerichten un de Verwaltung dornå richten. Wat nå Afsatz 3 Nummern 1, 3, 4 un 6 entscheed worrn is, gellt as Gesett.

(6) Wat in Afsatz 5 Satz 2 as beslåten nöömt worrn is, mutt in dat Hamborgsche Gesett– un Verordnungsblatt afdruckt warrn. Wenn dat Verfåtensgericht annerswat beslütt, kann dat fastleggen, wat dat veröffentlicht ward.

(7) Dat Gesett bestimmt dor genauer över, woans sick dat Verfåtensgericht tosåmensett, un ok över de Frågen, wokeen wählt warrn kann, woans de Wåhl aflöppt, wo dat Gericht för tostännig is un op wecke Årt dat afhannelt warrn mutt.