Verfåten vun de Free un

Hansestadt Hamborg

2002

______________________________________________________________________________

V.

De Verwaltung

Artikel 55 [Wo de Senatorinnen un Senåters tostännig sünd]

De Senatorinnen un Senåters hebbt dat Leit in de Rebeeten vun de Verwaltung, för de se ok tostännig sünd (Artikel 42 Afsatz 2 Satz 1).

Artikel 56 [Wat dat Volk bidriggt]

Dat Volk schall bi de Arbeit vun de Verwaltung mitmåken. Dat passeert sünnerlich dör de Lüüd, de ehrenamtlich för en Behöörd arbeiden doot.

Artikel 57 [Woans sick de Verwaltung opboot]

Dat Gesett regelt den Opboo vun de Verwaltung. De Senåt leggt fast, wat to de enkelten Behörden toheurt.

Artikel 58 [Woans dat Amt uteuvt ward]

Wokeen bi de Free un Hansestadt Hamborg in Deensten steiht, deit den Deenst for all, mutt sien Arbeit an de Såk utrichten un dörf keen Partei oder Person trüchsetten oder vörtrecken.

Artikel 59 [Beamte ut Profession]

(1) Jeedeen Düütsche un Düütschen hett nå dat, wat he kann un lehrt hett, de glieken Chancen för en öffentlich Amt.

(2) Beamtinnen un Beamte ward för ehr Levenstiet beropen, wenn dat Gesett nich wat anners fastleggt. Dat Gesett regelt de rechtlichen Grundlågen för dat Deenstverhältnis vun Beamte, besünners den Verdeenst un de Versorgung. Wenn dat üm Geld un Verdeenst geiht, köönt Beamtinnen un Beamte den Rechtsweg inslågen.

(3) Dat Gesett leggt fast, wat vörliggen mutt un woans dat Verfohren aflöppt, wenn Beamtinnen oder Beamte ehr Amt wegnåhmen ward, se in Pension oder Töövstand schickt oder in en anner Amt mit en lütter Gehalt versett warrn schöllt.

Artikel 60 [Verdeenst ut Ünnernehmen]

Dat Geld, wat een vun en Ünnernehmen kriggt, wenn se oder he för de Free un Hansestadt Hamborg dor wat deit, dat steiht de Stadt to.

Artikel 61 [De Rechtsweg]

Ward een dör de öffentliche Gewalt in sien Rechten minneseert, so kann se oder he den Verwaltungsrechtsweg gåhn, wenn dat nich annerseen' Rechtsweg gifft.