Verfåten vun de Free un

Hansestadt Hamborg

2002

______________________________________________________________________________

VII.

Huushoolt un Finanzen

Artikel 66 [De Plån för den Huushoolt]

(1) All Innåhmen un Utgåven vun de Free un Hansestadt Hamborg mööt för jeedeen Rekenjohr veranslågt un in den Huushooltsplån instellt warrn. De Innåhmen un de Utgåven vun den Huushooltsplån mööt in de Wåg ween.

(2) De Plån för den Huushoolt ward de Börgerschop för jeedeen Rekenjohr vun den Senåt vörleggt un vun de Börgerschop faststellt. Artikel 49 ward anwennt.

Artikel 67 [Utgåven ohn faststellten Plån för den Huushoolt]

(1) Is bit an't Enn vun en Rekenjohr de Huushooltsplån för tokåmen Johr nich faststellt worrn, so kann de Börgerschop, solang en Huus­hooltsplån nich in Kraft sett worrn is, den Senåt de Vullmacht geven

1. all Utgåven to leisten, de neudig sünd, wat

a) Inrichtungen, de beståht, ünnerholen un Opgåven, de beslåten sünd, dörfeuhrt warrn köönt;

b) de Plichten, de rechtlich faststellt sünd, vun de Free un Hanse­stadt Hamborg erfüllt ward;

c) Bowarken, Anschaffungen oder anner Leistungen wiederfeuhrt oder dor Bihölp to geven warrn kann, wenn in den Plån för den Huushoolt vun't Vörjohr de Middel freegeven weurn;

2. dat he Innåhmen, de fastståht, un Innåhmen, de för en Rekenjohr an Stüern fasttosetten sünd un annere Afgåven wiederhen kasseert, wenn dör en Gesett nix anners fastleggt is;

3. dat he för de nå Nummer 1 tolässigen Utgåven Kassenkredite opnimmt, wenn dat beneudigte Geld nich dör Stüern un annere Afgåven, för de dat Gesetten gifft, oder noch anner Innåhmen deckt warrn kann.

(2) Ward in den Fall vun Artikel 36 de Vertroonsfråg mit en Vörlag nå Afsatz 1 verbunnen un wennt de Börgerschop keen vun ehr Rechte an, de in Artikel 36 Afsatz 1 Satz 1 optellt worrn sünd, dörf de Senåt nå Afloop vun eenen Månd, åver nich låter, as dat nee Rekenjohr anfangt, den Huushoolt in den Råhmen vun Afsatz 1 wiederfeuhren.

Artikel 68 [Middel för den Huushoolt achteran oder ut Noot bewilligen]

(1) Wenn Middel för den Huushoolt to den Huushooltsplån båbento bewilligt warrn mööt, so is dorför en Besluss vun de Börgerschop neudig.

(2) Wenn unvermodens un nich aftowiesen Geld bruukt ward, dörf mit Tostimmen vun den Senåt Geld utgeven warrn, wat nich in den Plån för den Huushoolt binnen steiht oder över dat rutgeiht, wat dor binnen steiht. De Senåt mutt denn achteran de Börgerschop bidden, to disse Utgåven „jo“ to seggen.

Artikel 69 [Heugere Utgåven dör de Börgerschop]

Op Beslüsse vun de Börgerschop, de op Andräg ut de Midd vun de Börgerschop trüchgåht un foors oder låterhen Utgåven mit sick bringen doot, de in den Huushooltsplån nich vörsehen sünd, un ok op Beslüsse vun de Börgerschop, de Andräg vun den Senåt op Nåbewilligung ännert, ward de Artikel 49 anwennt.

Artikel 70 [Afreken vörleggen]

De Senåt mutt de Börgerschop all Innåhmen un Utgåven in dat neegste Rekenjohr vörleggen, anners kann he nich entlast' warrn. To disse Huushooltsreken mutt he en Översicht över dat Vermeugen un de Schulden vun de Free un Hansestadt bileggen.

Artikel 71 [Rekenhoff]

(1) Över den Umgang mit den Huushoolt un dat gesamte Wirt­schaften wåkt en Rekenhoff. Disse Rekenhoff is vun nüms afhängig un blots an dat Gesett bunnen. Ehrder de Börgerschop den Senåt entlasten kann, mutt de Rekenhoff dor jeedeen Johr de Börgerschop över berichten, wat bi sien Ünnerseuken rutkåmen is; to glieke Tiet ünnerricht' he den Senåt.

(2) De Börgerschop, de Senåt oder de Senatorin oder Senåter, de för de Finanzbehörd tostännig is, köönt den Rekenhoff bidden, wat he as Gootachter sien Meenen seggt, wegen he dor wat vun versteiht. Wo dat in enen enkelten Fall wichtig is, köönt se oder en Föfftel vun de, de to de Börgerschop heurt, den Rekenhoff bidden, he schall enen Fall ünnerseuken un dor över berichten. De Rekenhoff kann sülvst entschieden, wat he disse Bidd nåkummt oder nich.

(3) De Rekenhoff besteiht ut de Präsidentin oder den Präsident, de Vizepräsidentin oder den Vizepräsident un anner Liddmåten.

(4) De Börgerschop wählt op Vörslag vun den Senåt mit en Mehrheit vun twee Drüttel vun de Tall, de nå't Gesett to de Börgerschop heurt, de Liddmåten vun den Rekenhoff. De Senåt beröppt de, de wählt sünd.

(5) Op de Liddmåten vun den Rekenhoff ward de Bestimmungen vun disse Verfåten anwennt, de för Richterinnen un Richter ut Profes­sion in disse Verfåten vörsehen sünd, åver nich de Artikel 63 Afsatz 1. So as Richter ok, köönt Liddmåten vun den Rekenhoff anklagt warrn; för so en Verfohren is dat Hamborgsche Verfåtensgericht tostännig.

(6) Anners as in den Artikel 45 beröppt un entlett de Präsidentin oder de Präsident de annern Beamtinnen un Beamten vun den Rekenhoff.

(7) Dat Gesett regelt dat genauer.

Artikel 72 [Kredite, Sekerheiten, Stååtsgoot]

(1) Blots wenn Geld överleidig neudig ward, un eegens blots bi Ut­gåven, wo mit worben warrn schall, dörf dat as Kredit beschafft warrn; dor mutt de Börgerschop över besluten.

(2) Wenn Sekerheiten to Lasten vun de Free un Hansestadt Hamborg övernåhmen warrn mööt, de över een Rekenjohr rutgåht oder de nich to den regelmäßigen to den Gang vun de Verwaltung heurt, denn mutt dor de Börgerschop över besluten.

(3) Wenn dat nich to den regelmäßigen Gang vun de Verwaltung heurt, dörf Stååtsgoot blots denn verköfft warrn, wenn dat vun de Börgerschop besloten is.

(4) Artikel 49 ward anwennt.