Redentiner Osterspiel

Erster Teil

Zweite Handlung

______________________________________________________________________________

Lucifer und die Teufel.

Lucifer:

Wol her, wol her, wol wol her,

Alle duvelsche her!

375

Wol her ut der helle,

Satana, leve gheselle!

[Sathanas:]

Lucifer, hir bun ik unde myne ghesellen,

De dar leghen an der hellen.

Lucifer:

Satana, wor hestu na ghesleken,

380

Dat ik di bynnen dren daghen ne konde spreken?

Sathanas:

Westu jeneghe nyghe mere?

A ha, Lucifer, myn leve here,

Ik hebbe ghewesen mank der joden schare,

Dar hebbe ik vor ware

385

Vorworven groten schat.

Lucifer:

Leve kumpan, wat is dat?

Sathanas:

Lucifer unde alle duvele slechte,

Du mochst di vrowen van rechte: [38]

Jhesus de prophete unde grote here,

390

De dar sprak, dat he got were,

Den wylle wy schyre untfangen:

He is an en cruce hanghen,

He is an groter not

Unde vruchtet sere den dot,

395

He sprak: „Tristis est anima m[ea] usque ad mortem.“

Helle, du scholt dy bereden to em!

Wo mochte he godes zone syn?

Wente he vruchtet des dodes pyn.

Lucifer:

Got de mach vorsterven nycht,

400

O Satan, bose wycht,

He mach nycht vorsterven,

He wil uns de helle vorderven.

He wil dy gans bedreghen,

Dat en kan nicht gheleghen.

405

Ik hebbe tekene van em vornamen,

De van neneme puren mynschen kamen.

Satana, du bedreghest dy.

Sathanas:

Here meyster, des love my:

Ik hebbe dar nicht verne wesen,

410

Dar he syn testament heft ghelesen.

He drank etik unde gallen,

He mot uns to dele vallen.

Jk richtede dat sper in syn herte,

Do let he des dodes smerte.

Crumnase:

415

Here, bi myner krummen nesen! –

De rede moghen wol alzo wesen.

Ik was dar ok nagher by,                                [Bl. 4b]

Dar ik ene sele vorwarf dy:

Ik brachte dy eynen, de het Judas,

420

De syner jungere en was,

Den sulven halp ik henghen

Vaste myt eyneme strenghen.

Do horde ik van Jhesu groten storm,

He want sik alzo en worm,

425

Dar na moste he sterven

Unde schal werden unse erven. [39]

Lucifer:

Leve Satan, heft he den ghest uppegheven,

Wor is denne de zele bleven?

Satanas:

Here Lucifer, ik hebbe rant unde lopen,

430

Nu scholdestu my to dime unheyle rupen.

Dar mede hebbe ik se al vorloren.

Lucifer:

Satan, he is uns ovele baren!

Zegge my nycht unnode:

Is he dat, dede Lazarum weckede van dode?

Satanas:

435

Ja, Lucifer, dat is de sulve man.

Lucifer:

To jodute, Satan!

So bede ik di by den helleschen krechten,

Datu se nicht bryngest an unse hechten!

Lazarus was uns an unse helle gheven,

440

To do dat Jhesus quam even

Unde wolde ene van dode up wecken:

Alto hant sik Lazarus begunde ut strecken

Van den benden der helle

Unde vor wech snelle,

445

Sneller wen de arn.

Owig! kumpt he here varen,

He deyt us unvorwinliken schaden.

Satanas:

Wy moten dar anders mede raden.

Wy willen myt eneme meynen kore

450

Wol bewaren unse dore.

Noyter:

Lucifer, my wundert wat dat bedude:

De zelen veler lude

Syn an groteme schalle,

Se synghen unde vrowen sik alle,

455

Se schrien al aver lut,

Dat se scholen drade ut.

Se hebben vornamen enen glans

Unde hebben eynes monke dans.

Is dat nutte, dat wy besen,

460

Wat dar nyes schole schen? [40]

Puk:

Lucifer, wo langhe schal dit waren?

Wille we nicht to der helle varen?

Unse gheste sint to samende laden:

Ik ruke, wat se braden!

465

Dar is Adam,

Isaac unde Abraham,

Jacob unde Noe myt der arken,

Moyses unde alle de patriarchen,

Ysayas unde Asarias,

470

David unde Ananias

Unde alle de propheten –

Ik wet wat se reten! – ,

Her Symeon de alde,

Se schrien alzo de vogele an deme grone walde!

475

Dar is en man myt eneme rughen cleyde,

He heft uns dan so leyde,

He is de sulve man,

Deme Herodes let syn hovet af slan,

He is ghekomen van der erden,

480

[He secht] dat se alle scholen loset werden.

Se hebbet vroude unde depen rat.

Ach unde ach, wat mach wesen dat?

Wer Jhesus gycht kome?

Gi heren, weset vrame!

485

Wy willen vleghen snelle                                 [Bl. 5a]

Unde sluten to de helle.