Redentiner Osterspiel

Erster Teil

Zweite Handlung

______________________________________________________________________________

Die Altväter in der Vorhölle.

Post hec exultantibus animabus in inferno Abel dicit:         [Bl. 3b]

Ik vraghe ju alto male,

De dar sytten an desser quale:

Wat mach desse grote clarheyt beduden,

De we hebben vornamen huden?

265

Wat uns got nuwerlde an desseme elende

Alzo grot en licht sende?

Dat is en wunnechliker schyn.

Ik bun Abel, den syn broder Cayn

Mordede ane schult.

270

De martel hebbe ik gheleden myt dult.

Ik hope, des schole en ende syn,

Dat betughet desse schyn.

Adam:

Vrowet ju an desser stunt,

De dar sytten an desser dusteren grunt!

275

Wy scholen werden van pyne slycht.

Dyt is des ewighen vaders licht,

Dat van em scholde kamen [35]

Uns to allen vramen.

De vader an der ewicheyt

280

De schup my Adam in aller wunnicheyt,

De ik in deme paradise hebbe vorloren.

Nu hope ik, dat he sy ghebaren,

De uns al ghewis

Wedder glieven wyl dat paradis.

Isayas:

285

Ik bun Ysayas, en der propheten.

Gy scholen vor ware weten,

Dat dyt si des gotliken vaders schyn,

Dar af spreken de boke myn.

Ik sprak: „populus gentium qui ambulabat in tenebris,

290

Vidit lucem magnam: habitantibus

in regione umbre mortis, lux orta est eis.

Dat volk der heydenen wanderde an der dusternisse

Unde sach enen groten schyn ghewisse;

De dar wanderden an deme lande der dotliken schemen,

Eynen schyn se to sik nemen.“

295

Dat is desse, des love ik wol,

Unde uns drade losen sol.

Symeon:

Ik bun Symeon de alde.

Nu vrowet [ju] alle balde,

Lovet alle desseme heren,

300

Den ik myt so groten eren

In den tempel eyn kyndelyn nam,

Do he na syner myldecheyt to my quam.

Ik wart ghevrowet zere

Unde sprak an dem gheste: „gutlike here,

305

Vorlat my an dinen vrede,

Dat ik van desser werlde trede.

Myne ogen hebben beschowet dinen heil.

Got mynsche, lat my myt dy werden deyl.“

Dat heyl is aller lude:

310

He wil kamen hude

Unde losen syn volk van IsraeL

He is de rechte Emanuel.

Et cantent:

„Lumen ad revelationem [gentium et

gloriam plebis tuae Israel]“

We is desse vromede man,

De dit ruge clet heft an?

315

He is io to van der werlde komen.

Segghe uns, hestu van gade gycht vornamen? [36]

Baptista:

Werliken, ik bun eyn doper

Unde bun eyn vorloper

Jhesu Christi des ewighen gades

320

Unde en predeker synes bodes.

Ik hebbe em den wech an der wostenye

Bereydet mit der predekie.

Ik hebbe ene an der Jordanen doft:

Des en hadde he nycht bedroft,

325

Wen dat he alle dink vorvullen wolde

Alzo dat wesen scholde.

Ik wisede ene myt myner vorderen hand

Unde sprak: „se, dit is de heylant!

Dit is dat ware gades lam,

330

Dat dar van deme hemmele quam.

He is de der werlde sunde drecht.

He is myn here unde ik bun syn knecht.“

Nu bun ik to ju kamen,

Des moghe gy nemen vramen.

335

Lovet my des by gade,

Ik bun syn ware bade.

He is hir nagher by

Dede wil losen ju unde my.

Et cantent: „Ecce agnus dei,

[ecce qui tollit peccata mundi,

ecce de quo dicebam vobis:

Qui post me venit, ante me factus est.

Cuius non sum dignus

corrigiam calceamenti solvere.]“                                         [Bl. 4a]

Seth:

Myn vader Adam lach an groter krankheyt

340

Unde an des dodes arbeyt.

He sprak: „hore, sone, my,

Eynes dynghes bydde ik dy:

Ga to deme paradise

Unde sprek an desser wise:

345

‚Got vader alleweldich,

Adam myn vader biddet dich,

Dat du em willest gheven

Bi dime engele de[n olye der] barmeharticheit, dat he moghe leven.‘“

Dat warf ik na myns vaders boden.

350

Do sprak de enghel van gade –

Dat was de enghel Michael –,

He sprak: „Seth, lat dyn wenent snel!

De olye mach dy nycht werden.“

He sprak: „men pate dyt ris an de erden:

355

Wen vif dusent jar synt umme kamen

Unde sos hundert, dat mach dinen vader vramen

Unde alle syme slechte.“ [37]

Hebbe ik dat vornamen rechte,

So is de tyd al vullenbracht.

360

Got heft unser wol ghedacht.

He wil uns losen mit desseme schyne

Van der dusternissen pyne.

Ysayas:

Truwen, is dat alzo,

Des wille [we] wesen alle vro.

365

Ik hebbe gheprophetheret an der erden:

Van eyner juncvrowen schal en kynt ghebaren werden,

He wert ghenomet wunderlik,

Eyn vorste des vredes, got sterflik,

En vorste van allen vrede,

370

Syn rike heft nummer uttrede.

Des wille wy uns alle vrowen,

Wy scholen ewichliken myt em rowen.