Als ich zum andern mal in der Potschafft gewest bin / hat der Großfürst deren vil gehebt / und in die Mosqua bringen lassen / die ich weib und man gesehen hab / ursach erdacht als wolten sy von jme abtretten / hat die gegen den Litischen Gränitzen außgethailt / darnach vil derselben in Littn gewichen / die völckher von der WIATKA und WOLOCHDA hintz zu dem fluß KAMA weit und prait wonen on alle heuser / seind al man und weiber resch / und behend im lauffen / maisterliche Pogenschützen / der Pogen khumbt selten auß der handt / geben auch jren etwas erwachsnen khindern die Speiß nit / sy haben dann zuvor geschossen / und sich damit wol gehalten.

     Die weiber haben von pamrinden wie ain Diadem den heiligen gemalt wirdt / Und geschnitten / in ain runden raiff eingelassen auf jren heubtern / und mit ainem leinen tuech bedeckht / Als ich sy fragte / weil sy so offt durch die pam und staudn lauffen muesten / wie sy mit solcher höhe durchkhämen? Antworten sy / wie khumt ain Hiersch durch / hat vil höhers auf dem khopf.

     Zwo meyl under dem Niderneugarten seind vil heuser als ain Stätl oder Dorff gewest / darinn man Saltz gemacht hat / aber von Tatern abgeprennt gleichwol verordent gewest wider zu erpauen.

     MORDWA auch ain volckh undterhalb Neugarten an der Wolga an dem gestat gegen Mittentag / den Czeremissen aller sachen gleich / allain das die in heusern wonen.

     Hiemit beschleuß ich des Moscoviter gepiet.

     Hernach wil ich von der Nachperschafft der Moscoviter sagen / und gleich die ordnung von Aufgang nemen / und dann nach Mittentag / und fürt wider gar herumb khumen.

 

Von Tatern.

     Von den Tatern und jrem ursprung / wie man das in der Polnischen Cronickhen und in dem Püchl von baiden Sarmacien vertzaichent findt / und jr vil darvon geschriben haben / wil ich der khains hie einleiben / wäre meer verdrießlich dann nutzlich.

     Sovil ich aber auß der Reissischen geschicht schrifften / und viler leüt undterweisen gehaben mügen / wil ich hie einbringen / Sy sprechen die völcker MOABITHENI die hernach Tatern genent seind / abgesundert wordn von aller anderer leut wesen / sprachen / Sitten / Klaidern / und gewonhaiten / haben sich bey dem fluß CALCA nidergelassen / von wannen die heerkhumen / was glaubens sy auch gewest sein / hat niemandts gewist / wiewol sy von etlichen TAURIMENI genant worden / von andern PICENIGI / ander sy anderst genent haben.

     Methodius Bischof Patantzkhi / sol sagen sy waren auß der wüeste IEUTRISKIE zwischen Mitternacht und Aufgang darkhumen / und gibt für die ursach jres uberziehens / ainer genant GEDEON der fürnembsten und weisesten ainer hat jnen ain forcht eingelagt mit anzaigen der welt zergängklichkait / als möcht die nahent sein / Mit solcher seiner red sy bewegt zu bedenckhen / damit die grossen Reichthumer der welt / sambt der welt nit vergiengen / sollen sy mit grosser menige außgezogen sein / die Länder zuberauben / und alles von Aufgang / biß zu dem fluß EUPHRATES und dem Persianischen Moer grausamlichen verwüstet / Und nach viler Land verwüstung / haben die völckher Polowtzi mit den Reissischen sich understanden denen zu begegnen / und habens bey dem fluß Calca geschlagen im Jar von anfang der welt / 6533.

     darbey versteet man das der in dem Püchel von baiden Sarmacien geschriben / und die Polowtzen jäger verteutscht / gejrrt hat.

     Die POLOWIZI seind die im veld / und nit in heusern wonen / Polle haist das veld / davon das gantz wort mueß verstanden werden / Lowatz oder Lowtzi seind ja Jäger / aber die maisten sylben Pollow geben den verstand Czi oder Ksi verandern an der rechten deuttung nichts / und seind vast alle Namen von Stetten / Schlössern / und Landen / die Herrn oder güter mit dem zuesatz / solcher letsten Sylben an den ortten außgesprochen / Die Reissen vermainen das die Polowtzi Gotten gewest sein / khan das auch hart glauben / Wer die Tartern beschreiben wolt / müste viler Nationen / Sitten und wesen auch der Land gelegenhaiten beschreiben / dann sy allain von jrem glauben yetzo den Namen in der gmain haben / und seind vil underschidlicher Nationen oder Völckher und ferr von einander gelegen / die all den Tarterischen namen angenomen / wie auch der namen Reissen vil Land darein gezogen / BATHI der Tartern Khünig ist von Mittag in Mittenacht mit grosser macht gezogen / und in Bulgariam die an der Wolga undter Casan ligt / khomen / und erobert / des nechsten jars darnach / das ist im 6745 Jar / seinen Syg nachgevolgt / gar in die Mosqua khomen / die Stat ain zeit belegert die jme nachmals aufgeben ist worden / gegebnen glauben nit gehalten / alles ertödt / dann weitters geruckht / Wolodimer / Pereaslaw / Rostow / Sußdali und vil ander Schloß und Stet verprent / alles tod geschlagen / oder in ewige dienstparkhait genumen / den Großfürsten Georgen der jme entgegen getzogen tod geschlagen / den Basilium Constantini Sun mit jme gefangen hingefürt / und auch getödt / das alles sol in obbemeltem Jar geschehen sein.

     Von derselben zeit seind die Reissen gemaingelich al der Tatern underthon gewest / Sy die Tatern haben auch die Fürsten gesetzt / und entsetzt / hintzt an Witolden den Großfürsten in Litten / der hat die Land sovil er der in Reissen uberkhumen / vor der Tatern gwalt vestigelichen beschützt / und ist allen Nachpern ain forcht gewest / Aber die Großfürsten zu Wolodimer und Mosqua seind hintzt an Basilium des Hannsen Sun / dartzue ich geschickht bin / in der Tatern gehorsam bliben.

     Disen Bathi sol ain Khünig zu Hungern Wlaslaw und nach der Tauff Ladislaus genant wardt / der auch geheilligt sein solt / als derselb Bathi in Hungern khriegt / des Khünigs schwester hingefürt / und der Khünig den ereilt / sein Schwester des Bathi wehr erwüscht / und wider den Brueder gefochten / also die baide / der Bathi und des Khünigs schwester erschlagen worden.

     ASBECK ist dem Bathi im Khünigreich nachgevolgt / und ist gestorben im 6834. Dem aber ist sein Sun SANABECK nachkhumen / hat seine gebrüder alle umbpracht / starb im 6868.

     Nach dem khamb BERDABECK der auch zwelf seiner brüder erschlueg / und starb im 6867 Jar. ALCULPA volgt nach denen / der hat nit uber ain Monat geherrscht / sonder von Narusch ainem Fürsten sambt seinen khindern tod geschlagen / Zu dem NARUSCH khamen alle Reissische Fürsten / und den willen oder gwalt erlangt yeglicher in seinem Fürstenthumb zu herrschen / seind also abgezogen / der ist erschlagen im 6868 / dem ist CHIDIR nachgevolgt von seinem Sun THEMIRORSA erschlagen / der hat khaum siben tag geherrscht / dann der ist von TEMNIKMANAI veriagt und uber die Wolga geflohn / ist ereylt und getödt worden im 6869.

     TACHTHAMISCH behielt das Reich / und im Jar 6890 am Sechsundzwaintzigisten tag Augusti hat er die Mosqua mit mordt und prant verwüst / der ist als dann von THEMICKUTLU geschlagen worden / und zu dem Witold in Litten geflohen / darnach hat der THEMICKUT LU das Khünigreich Sarai besessen im 6906 Jar / und drey jar darnach gestorben / dann so ist sein Sun SHATIBECK an des vaters stat khumen / Nach dem THEMIRASSACK / der nam sein zug nach Reßan und die Mosqua zu verderben / des erschrackhen die Fürsten dermassen das sy alle waffen verliessen / und flohen zu den heiligen / und schickhten eylend gehn Wolodimer / umb unser Frauen Maria pild / darbey hievor vil wunderzaichen geschehen sein sollen / Als man die gegen der Mosqua bracht / ist der Fürst mit aller menige entgegen gangen / und zum ersten gebetten / den feindt abzuwenden / darnach mit grosser andacht / und Ehrerbiettung in die Mosqua beglaidt / mit solcher andacht / sagen sy erlangt haben / das die Tatern für Reßan nit gezogen seind / Dem zu ewiger gedechtnuß haben sy an der stat daran sy das Pild emphangen und erwart haben / ain Khirchen erpaut / und den Sechsundzwaintzigisten tag Augusti zu ehrn gesetzt / den haissen sy STRETENNE das ist der entgegenkhunfft / das sol geschehen sein nach beschaffung der welt 6903 Jar.

     Sy sagen der Themirassack sey von geringer geburt und mit Rauberey zu solcher höhe khumen / sey auch ain maisterlicher Dieb in seiner jugent gewest / darvon jme sein namen heerkhumbt / Er stal ain Schoff / den erwischt des Schoffs Herr oder Hiert / hat jme mit ainem stain das Diech zerworffen / Darumb er mit ainem Eisen sich jeder zeit behelffen müssen / Also von Eisen und hingkhen ist jme der nam geschepfft / Themir ist Eisen / Assack hingkher / Diser hat den Constantinopolischen wie sy von Türckhen hart belegert waren / durch seinen Sun hilff geschickht / Als der Sun die Türckhen davon geschlagen / und die belegerten erledigt / ist er zum vater wider gezogen.

     Die Tatern nennen jre gepiet oder Khünigreich HORDA / under denen hat die Horda Sawolskhi den Eltesten und namhafftisten namen gehabt / dan die andern al sollen von der außgangen und heerkhumen sein / seind alle Mahumetisch / wöllen aber nit Türckhen genent werden / achtens für ain schmach / sonder BESERMANI, Die Türckhen nennen sich selbs auch mit dem namen / weil dann die Tatern weitte und villerlay Land besitzen / so khünnen sy auch nit al ainer monier oder wesens beschriben werden / Aber die nächsten im PRECOP seind ainer mittern leng / praites angesichts / als geschwoln / fleischig / claine eintochne augen / den obern khneblpart tragen sy / sonstn gar und am haubt geschorn / aber jre obristen tragen lange zotten von haar ob den ohrn herab schwartz hangend und eingedräet / starckhs leibs / aines freidigen gemüets / und in sonder verpotner unkheusch / alles selb sterbend Roß und Viech nemen sy zu jrer speyß / Schwein essen sy gar nit / man sagt das sy gantzer vier tag mügen der speiß unnd schlaffs geratten / darneben alle arbait verbringen / heerwiderumb so die zu essen khumen / so fressen sy sich unmäßlichen an / also das sy hinwider auch drey oder vier tag thuen schlaffen.

     Darumb wann die ain Raiß in Litten oder Reissen thuen / und sich abmüehen und mit dem Raub beschwären / so raist man jnen nach / und man waiß ungevärlichen den Platz zu jrem leger bequemb / so lassen die nachraissenden dieselb nacht khain feuer in jrem Leger anmachen / damit vermainen die Tatern gar sicher zu sein / So legern sy sich / und schlachten viech essen sich an / lassen jre Pherd auf das graß / und schlaffen / dermassen sein sy gar offt uberfallen und geschlagen worden / wan dann jr ainer so gar hungerig wirdt / schlecht seinem Pherd ain adern / unnd trinckht das pluet / vermainen auch dem Pherd khain schad / sunder nutz sein / So haben sy khain tribnen weg oder strassen / dann sy an khainer stat bleiblich seind / Raisen sy yeder zeit den Sternen und sonderlichen nach dem Polo den sy SZELESNICOL sovil als ain Eisnen Nagln nennen / Roßmilch achten sy für ain guete speiß / darvon die leut starckh und faist werden / Villerlay wurtzen haben sy zu jrer speiß / wenig seind die Saltz brauchen / wann man dann den raub oder ander Profand außtailt / gibt man auf viertzig personen ain Rind oder Pherd / und die ansehenlichern nemen das jngewaid / steckhen die fleckh oder khutlen und hertz / Lungl / Leber etc. an spissle zu dem feuer sovil das sy das khot etwas mit höltzln herdan bringen mügen / und fressens / Darnach leckhen sy nit allain jre finger / sonder auch die höltzl / die faist oder safftig seind worden / mit denen sy das khot abgeschaben haben / Die Roß heubter helt man für ain ehrlich essen / wie bey uns von Wildschweinen / Ire Pherd seind gemain gelichen al niderträchtig nit gar hoch / aber wol starckh und notleidig / den hunger wol leiden mügen / Nehrn sich von der Pamen laub / Esste und rindten / es sey Schnee oder nit / so graben sy in die erden nach wurtzeln / wo khain graß verhanden ist.

     Die Moscoviter sagen / wann ain Tater auf seinem Roß sitzt / sey dasselb undter jme vil rescher lauffend / dann under ainem andern / des sy auß erfarenhait haben / Ire Pherd nennen sy Pachmat / haben gemainglichen dickhe schwäntz / ire Sätl / stegraif und steigleder seind gantz von holtz / allain was sy von andern ortten rauben oder khauffen / für den Pambst [=Sattelpolsterung] nemen sy laub von pamen / ye auch graß / wo sy an die wasser khumen so uberschwemen sy / wan auch ain Feind denen so harrt obligt / so verwerffen sy die claider / auch den Satl machen sich gering / allain die wehr behalten sy / jre wehr seind Pogen und pfeil / gar selten haben sy Säbln / jr streit ist allain von ferrn mit schiessen dann sy ruckhen für als ob sy fluhen / wan man sy dann eylt / so thuen sy den grössern schaden mit hinder sich schiessen / sehen sy dann das sollich nacheylen mit unordnung geschiecht / wenden sy sich pald / wan sy mit grossen heuffen schlahen wellen / und den platz und die weit nach jrer gelegenhait haben / dann so füren sy den Tantz (also nennens die Moscoviter) jre weiser oder fürer / khumen mit jren hauffen neben jren veinden heer / und schiessen ab / pald ruckhen sy hinwegkh / aber ain ander hauffen dergleichen / und also ain hauffen auf den andern / der erste khumt dann wider nach dem letzten / wan sy das dermassen gehaben mügen / steet jr sach gwindlich / wan jnen aber die weisl so vor dem hauffen ziehen / erlegt / oder benumen werden / so seind sy bald in der unodrnung / wan man sy aber in ainer eng bekhumt / und der streit zu der hand und in die nahent khumt / gegen denen die Spieß unnd Tartschen auch seitten wehr haben / seind sy pald geschlagen / sitzen gar khurtz / damit sy sich zum schiessen auf baid seitten auch hindersich gerecht machen / auch allerlay von der erden am Roß sitzend heben mügen / das khunnen sy auch im lauff der Pherd thuen / so auch ainer mit dem Spieß an jne eylt / thuet als fal er vom Pherd / hintzt der Spieß ubergeet / dann ist er wider im Satl / behengt yeder zeit mit dem ainen fueß am Satl / / und mit der ain hand in der maan des Roß / ein yeglicher hat gemaingleichen ains oder zway Pherd neben dem darauf er sitzt / wan das ain müd wirdt / sitzt auff das ander / fuert das müed ledig an der hand / gar schlechte Zam / khain Sporn / sonder gaisln / haben alle verschnitne Pherd / vermainen dieselben mügen meer arbait und hunger ubersteen / Ain claid haben man und weib / alain das die weiber das haubt mit ainem leinen tuech bedeckhen / und haben von leinen tuech hosen / wie die Galeotn in gmain.

     Die Khünigin wan der aine herfürkhumbt / bedeckhen sy jre angesicht / Die gmain leüt haben allain von Schoffen oder andern thiern jre claider / tragens auch so lang / hintzt die gar erfaullen / sy achten ain grosse unbequemblichkhait an ainem ort lang zu pleiben / wan sy sich uber jre khinder ertzürnen sollen sy sprechen / das du dein aigen khot wie die Christen schmeckhen müst / Als pald sy ain ort abgeetzt / und abgehalten haben / uberziehen sy sich auf ain anders / jre weib / khind und anders / füren sy auf Khärnen / Gleichwol seind ander die auch in Fleckhen und Dörffern wonen / das seind die alten auch Khauffleut / die den khriegen nit nachziehen / und wan sy ain rayß thuen / schickhen die ansechliche jre weiber und khind an sichere ort / Es ist ain schmal Recht bey jnen / wan ainer dem andern was nimbt / und der ander das jnnen wirdt / und den darumb anspricht / gibt der zu antwort / Ich bin des notturfftig gewest / wan du was notturfftig wirdest so nimbs auch / So die sach gleich für die Obrigkhait zu clag khumbt / wirdt jme ain solcher gleichmässiger beschaidt / sy laugnen auch nit was sy thuen / Etlich schreiben sy stellen nit / man nens wie man wil / sy rauben und nemen haimlich und offendlich wo sy das ankhumen mügen / sy seind arm / so volgt hernach das nemen / was dan die nächsten Tatern von leuten sonderlichen fahen / verkhauffen sy den Türckhen / oder andern oder gebens zulöse[n] / allain die jungen weibs personen nit / Stet und Schlösser stürmen sy selten / haben ain freid wan sy schaden thuen / und wievil mer sy lands veröden / umb sovil mer vermainen sy jre gränitzen erweittert haben / sy selbs mörden oder erschlahen nit aneinander / allain wan die Khünig widereinander ziehen / so dan ye ainer ainen todschlag thuet und behendigt wirdt / nimbt man von jme Roß wehr und claider / last den lauffen / und der Richter spricht zu jm / gee hin und verricht dein sach / Ausserhalb der Khauffleut / brauchen sy selten Silber unnd Gold / es ist alles im tausch oder gleiches weerdts wahr zubekhumen / Uberkhumen sy dann etwo gelt / so khauffen sy pald in der Mosqua oder anderstwo claider / oder andere notturfft / under denen Tatern so im veld wonen ist gar khain gemerckh / ainem oder dem andern zuegetailt.

     Ain faister Tatter was gefangen / spricht der Moscoviter zu jm / woheer khumbt dir du hund die faist / weil du nit vil zu essen hast / Der Tater Antwort / warumb hab ich nit zu essen / weil ich mich von allem dem Ertrich von Aufgang hintzt dem Nidergang ernern mag / Euch mag aber wol essen mangeln / so jr klaine stuckh ertrich besitzend und täglichen darum zanckhet und khriegt.

     CASAN die Horda oder das Reich / Stat und Schloß aines namens an der Wolga der seitten gegen Mitternacht gelegen bey Sibentzig meyllen underhalb Niderneugarten / dann abwerts nach der Wolga seind öde und wüste Land / jr gemerckh aber gegen dem Sumer Aufgang seind Nachpern die SCHIBANSKI und KOSATZKI Tatern / Der Khünig zu Casan mag in dreyssigthausendt man aufbringen / und sonderlichen zu fueß / darundter seind die Czeremissen und Zuwaschi gewisse Schützen / Die ZUWASCHI seind erfarne Schiffleut / Von Casan hintzt geen Wiatkha zu dem namhafftigisten Schloß / seind bey Sechstzig meylln / Casan auf Tartarisch / haisst ain wellender Khessl / die seind menschlicher weder andere bewonen die heuser und erpauen die Agkher / treiben Khaufmanshandlung / selten Khrieg / Der Basilius hat die dahin getzwungen / das sy sich ergeben / und die Khünig von jme eingesetzt / angenumen / das hat auch vil dartzue gethon / das die wasser / als Mosqua und vil andere zusamen in die Wolga khumen / und also der Moscoviter täglichen ob jnen sein mag / darnach auch der Khauffleut hanttierung davon baiden Herrn grosse einkhomen gefallen / CHELEALECH was da ain Khünig und verließ sein wittib NURSULTAN one khinder / die nam ainer mit namen ABRAHEMIN, dem gepor sy zwen Sün / MACHMETEMIN und ABDELATIPH, er hette aber von dem ersten weib auch ain Sun ALEGA, der selb als erstgeborner trat in das Reich nach dem Vater / und ward dem Moscoviter mit aller sachen gehorsam / den haben die Moscoviterischen Räth / so yeder zeit daselbstn gehalten seind worden / bey ainem Nachtmal wol bezechten / in ain Schlitten gelegt / als wolt man den haim in sein wonung füren / seind mit dem der Mosqua zuegefarn / und gar dahin bracht / der Fürst hat den ain zeit in verwarung gehalten / hinnach geen Wolochda geschickht / daselbst er zu seinem ende pliben / sein Stiefmuetter und die zwen seine gebrueder Abdelatif / unnd Machmetemin geen Byeloyesero verschickt / des Alega brueder ainer hat sich tauffen lassen / und den namen Peter an sich genumen / dem hat auch der Basilius sein Schwester verheyrat / der ander des Alega brueder MENIKTAIR genant / blib in seinem glauben / hintzt in sein tod / und verließ sein wittib mit vil khindern / die alle nach seinem tod den Tauff angenumen und darin gestorben / allain der Dietrich den sy nach jrer sprach PHEODOR nennen / der ist nit getaufft worden / den hab ich noch daselbsten gesehen / Als der Alega hingefürt ward / MACHMETEMIN an sein stat in das Khünigreich gesetzt / der ist bliben hintzt auf das 1518 Jar / die NURSOLTHAN so zuvor CHELEALEKH und ABRAHEMIN zu manen gehabt / nam sy nach mals MENDLIGEREI der Khünig zu Precop / als sy aber bey dem khain khind gehabt / und die lieb jrer khinder sy bewegt / ist in die Mosqua zu dem ABDELATIPH khumen / und darnach zu dem andern Sun MACHMETEMIN dem Khünig zu Casan getzogen / Die zu Casan haben auch hievor dem Moscoviter kain glauben gehalten / und im 1504 Jar abgefallen / daraus vil grosses Kriegs erwachssen / Sich auch jr vil darein gemüscht / wie hernach gesagt wirdt / So pald dem Basilio jr abfaal verkhünt wardt / schickt ain groß Hoer sambt grossem geschütz / dem wasser nach ab / Die von Casan wissten das sy ainem solchen Hoer in vermessner Schlacht nicht gleich wären / haben sy bedacht mit lissten zu uberkhumen / und haben jr volck gegen den Feindten sehen lassen / als lägen sy da zu Veld / mit villen jren Hoerhütten oder getzelten / Sy aber zu gelegner zeit / als sy dan wissten / wan der Feindt ungefärlichen sy würde angreiffen / seind sy haimlich aus dem leger in ain halt getzogen / So dan Niemand meer da gesehen wardt / haben die Moscoviter dafür gehalten / sy wären vorcht halben entrunnen / seind on ordnung und sorg / in das Leger und Hoerhütten gefallen und geplündert / In dem die Tatern mit jren schützen den Czeremissen aus der Halt geprochen / in die gefallen / dermassen abgevertigt / das sy alles geschütz und anders flüchtig verlassen haben / in solcher flucht haben Zwen Puxenmaister jre stuck auch verlassen / und mit andern zu dem Großfürsten khumen / die hat er Ehrlich und mit gnaden emphangen / und den Bartholomeum ain Walhen / der auch den Reissischen glauben angenumen / mit sondern gnadn emphangen und begabt / mit dem ich auch geredt hab / Am ander Püchsenmaister / der hat mit seinem vleiß das stuck Püchsen so jme bevolhen was wider haim bracht / verhofft grosse gnad damit zu erlangen / aber der Fürst jne mit ungnadn angefarn / du hast mich und dich in groß gefar gestelt / villeicht hettest gern / das dich die Feindt sambt der Puxen hingenumen hetten / warumb hastu sovil mühe damit gehabt / und dich damit gesaumet / mir ist nichs an der Püxn gelegen / wan ich nuer leut hab / die giessen und schiessen khünnen / hat jme khain gnad noch ergötzligkhait darumb gethon.

     Als MACHMETEMIN starb / nam SCHEALE die wittib / hat mit hilff des Großfürsten das Khünigreich Casan uberkhumen / der hat das mit grössern der underthonen unwillen nit meer dan vier Jar besessen / Sein ungeschickter weibischer leib / neben andern unschickligkhaiten / machte jme meer unwillens / er hette ain fürhengigen pauch / ain schitters Pärtl und weibisch angesicht / zwen groß schwartz löckh von haar / uber die Orn abhengig / unnd zum Krieg gantz für unteuglich angesehen / darzue hat er seiner undterthonen gueten willen gar veracht / und sich nuer dem Großfürsten guet ertzaigen wöllen / und alle sachen mit außlendern gehandelt / Umb das seind die zu Casan zuegefarn / den SAPGEREI des MENDLIGEREI Khünigs im Precop Sun / zu ainem Khünig erpetten / und beruefft / So pald der new Khünig zuegetzogen / ist der Scheale gewichen / also ist er mit seinem weib und beyschlaffen in die Mosqua khumen / das ist geschehen im 1521 Jar.

     Uber das ist der Khünig aus dem Precop MACHMETGIREI mit ainem grossen Hoer hin gehn Casan getzogen / seinen Brueder SAPGEREI eingesetzt / dan wider zuruckh haimwerts gekheert / so pald er uber den Tanaim khumen / hat er sein weg der Mosqua zu gekheert / und geeylt.

     Der Basilius hat sich des gar nit versehen / als er aber des Feindt zuekhunfft vernam / versamlt sein Volckh / sovil er in der eyl gemügt / und Khnes Demeter Bielski Haubtman daruber gemacht / und an das wasser Occa verordent / den Tatern daruber zukhumen zu wehrn / Der Haubtman was jung / verachtet die Eltern / dieselben hetten des ain beschwärt / weil sy in vil Khriegen Haubtleut gewest / und yetzo khain ansehen hetten / damit von baiden thaillen / wie dan in der gleichen zwispalten geschiecht nit wol gehaust / Die Tatern khamen uber das wasser / das Landt jämerlichen verwüst / und seind khumen auf dreytzehen werst / von der Stat Mosqua / bey etlichen Teichten [sic - korrekte Parallelform] hat der MACHMETGIREI sich zu veld gelegert / weit und prait Prennen und Rauben lassen / sein Brueder SAPGEREI ist mit seinen Casanern auch her auf gehn Wolodimeria und Niderneugarten khumen / allenthalben jämerlichen verwüst / darnach sein baide gebrüder bey Columna zusamen khumen / Der Basilius hat gesehen / das er denen nit möcht widerstehn / gar vertzweiflt / das Schloß und al sachen seinem Schwager Petern / so sich Tauffen hat lassen / und etlichen andern Räthen bevolhen / er ist hin geflohen / und etliche zeit sich undter ainem schober Hey verporgen / am Zwaintzigisten tag Julij die im Schloß Mosqua nahent auch vertzweiffelt / ist ain jämerliche flucht von weibern und khindern in das Schloß geschehen und geeylt / das deren viel erdruckht und zertretten seind / und ist sovil Volckh in das Schloß khumen / das khain Platz gewest ist / sich zu lärn / ain yeglichs hat müssen nider geen lassen / da es gestanden ist / daraus ain solcher gestanckh worden / wan die Feindt wenig tag darvor gelegen / wäre gestanckhs halben ain sterb erweckht / Der zeit waren der Leiflender gesandn in der Mosqua / als die sovil Feur und Rauch im Landt sahen / seind sy in ainem tag Sechsunddreisig meyl geritten / gehn Twer uber das wasser Wolga / da sy dan sicher waren / Ain Teutscher Püxenmaister Niclas / wardt durch den Schatzmaister beruefft / und gar sonft mit im geredt / er sol ain groß alt Eisnen Stuckh (des in vil Jarn nit verruckht / auch unnütz ward) undter das Thor bringen lassen / daruber lacht der Püxenmaister / das befrembt den Schatzmaister / redt jne erstlichen an / ob er sein lachte / spricht der Püxenmaister in dreyen tagen / khan ich das zu khainem nutz under das Thor bringen / und so ich das dahin brächte / und nutz wäre / erschüttet es das Thor / wie thut man dan spricht Schatzmaister / ich hab geacht ye grösser ye besser / dan sucht man erst das khlainer geschütz / ward verr vom Schloß / und die Paurn truegen die Falckhanetlen auf den Achseln on alle gefäß / und der vil / so entsteet ain geschray / Tatern / Tatern / Die al werffen die Püxen von sich / unnd lauffen dem Schloß zue / also lagen die Püxen ain lange gassen heer / nach der zeil / wenig Pherdt hetten die gantz Stat leichtlich abprennen mügen / man hat uber ain Centn Pulver nit gehabt / aller erst muesst man stossen und Pulver machen / der Fürst hat vil geschütz giessen lassen / aber wie in Zeugheusern von nöten ist / nichts dartzue verordent / sonder alles beschlossen gehalten / und wan man jchtes bedarff / sol man das in eyl verrichten / die Rätte im Schloß Mosqua / hat für nottürfftig und guet angesehen / den MENDLIGEREI [Vg. Leitsch 264] Khünig mit eherungen zu sonfften und sonderlichen mit gutem medt / damit er nit weiter verruckhte / oder schaden thätte / Er nam die gaben an / vil sagt wolt die Mosqua nit belegern / auch aus dem Landt ziehen / soverr sich der Basilius verschreibe / sein Ewiger Tributari oder Zinßman zu sein / wie auch sein Vater und seine Vorvodern gewest waren / Solche Brief waren mit dem bessten gevertigt / und uberantwort / Darauff der Khünig Medlingerei mit seinem Hoer nach Rezan getzogen / da sich gelegert / die gefangnen zu lösen und aus zu tauschen / und den Raub zu khauffen geben / Der zeit was in des Tatern Hoer / Eustachi Taschcowitz des Khünigs zu Poln undterthon / mit etlich hundert Phärden dem Tatern zu dienst / Dan derselben zeit was weder frid noch anstand / zwischen Polen und Mosqua / derselb Eustachi kham zu dem Schloß zu Rezan mit etlichem plunder / als wolt er den verkhauffen / der mainung ob er und ander sich möchten in das Schloß eindringen / Der Khünig ging auch auf ainem gleichmessigen ranckh umb / schickht der seinen ainen zu dem Obristen im Schloß / mit solcher mainung / Der Großfürst war sein Tributarij und underthon / dar umb sol der Obriste im Schloß jme dem Khünig auch gehorsamen / Profandt unnd andere nottürfft dargeben / das er auch zu jme dem Khünig khäme / Der Oberste aber IWAN COWAR ain erfarner Khriegsman / und solcher anschleg verstendig / Antwort / jme wäre nit wissent / das sein Großfürst des Khünigs Zinßman ware / wan er aber des ain lautters wissen hette / wesste sich darnach zu halten / Pald waren jme des Großfürsten verschreibungen zuegeschickht / daruber jr vil gewaint haben / Der Eustachius nahnet ye lenger ye meer zu dem Schlos / Knes Pheodor Loppata ain ansehenlicher Man der under andern an diser Raiß gefangen und entrunnen / und etliche mit lissten ausgelassen / die in das Schloß khamen / solche entrunnene vorderten die Tatern wider / darumb auch die Tatern mit grossen heuffen zu dem Schloß nahneten / Die Reissen aus forcht wolten die entrunnene wider hinaus geben / und stunden in grossen angstn und verzweiflung / Ain Teutscher Püxenmaister Hanns Jordan / der sonsten ain Kuglschmid von Haal im Inntal / was im Schloß gewest / der merckhte den lisst / wan sy gar hintzue khomen wären / so hette man jnen mit dem grossen geschütz nichts mügen thuen / vermante des die Obern / und er vermaint zueschiessen / des sy aus forchten nit zuegaben / zu letst so thuet er ain schuß in hauffen / nit verr vom Khünig / mit dem ist ain solcher schrecken under die Feindt khumen / yederman nur davon / damit bracht er die vom Schloß hindan.

     Der Khünig bevalch dem Eustachi / er sol mit dem Obersten darvon reden / unnd jme dröliche wort geben / der oberste entschuldigt sich / der Püxenmaister hette wider sein verpot geschossen / daruber begert er den Püxenmaister / Nun waren sy so gar vertzagt / das die maisten denselben uberantworten wolten / alain der Oberste Hanns Cowar wolt das nit thuen / die Tatern eyleten darvon / was nun die ursach ist / villeicht das er lang ausgewest / oder seine leut mit vil plunder und Raub beladen / ist eylendt hingetzogen / und des Moscoviters verschreibung im Schloß beliben / darinnen er sich so hoch gegen den Tatern verschrieben hette / Datzumal ist ain unglaubliche antzal der gefangnen verfuert worden / sy haben thuern sagen / der wären in Achtmalhundert Thausendt gewest / die maisten verkhauffen sy zu CAPHA den Türcken / die sy nit verkhauffen mügen / als die alten oder kranckhen / die zu der arbait nit teuglich sein / geben sy den Jungen jren leuten / machen sy paissig wie die Jungen hundt / die werffens mit stain zu todt / werffens in das Moer oder uber ain höche ab / oder wie sy verlust / damit sy die tötten / welche aber bey jnen verkhaufft oder behalten werden / die dienen sich mit Sechs jaren frey / aber aus dem Landt thuern sy nit ziehen / dienen und wie sich ain yeglicher zu seiner weittern narung schickhen khan / sovil aber der Khünig zu Casan gefangner uberkhumen hat / die gehen ASTRACHAN zu verkauffen geschickht / das ist auch ain Khünigreich an der Wolga / nahent da die in das Moer felt / Als nun die zwen Khünig aus dem Landt getzogen / ist der Basilius wider gehn der Mosqua khumen / Da ersach er under dem Thor den Niclas Püxenmaister / under vil Volckhs des da zuelieff den Fürsten zu emphahen / Spricht zu jme mit lauter stimb / Nicolai dein trew und vleiß / die du zu erhaltung des Schloß bewisen hast / ist mir wissendt / ich sol dirs mit grossen gnaden vergelten / Als hernach der Hanns Jordan Püxenmaister von Resan khame / der mit dem schiessen die Tatern vom Schloß bracht / Spricht der Großfürst wie bistu gesundt / Gott gab uns das leben / dasselb hastu bestättigt / unser grosse gnad wirdt bey dir sein / die baid verhofften grosser gaben / wardt aber nichts daraus / ob sy gleich derhalben offt vermanung gethan / Darumb sy auch ursach namen zuebitten / sy zu jren freundten ziehen zuelassen / uber solches seind yeglichem mit zehen Gulden die Järlich besoldung gebessert worden / In der zeit entstuend ain red und zwitracht / wer der flucht von der Occa da die Tatern uberkhamen / ain ursacher oder anfenger gewest ware / Die Eltern legten die schuld auf Knes Demetri Bielski als öbersten / der ware Jung und hette der Eltern Rat veracht / Der Demetri aber legt die schuld auf Knes Andreen des Großfürsten Brueder / der ware der erst fliehend gesehn / dem die andern nachgevolgt hetten / damit aber Basilius ain straff thätte / und sein Brueder ubergienge / nam jme ain Haubtman für / der mit seinem Brueder geflohen ist / Knes Iwan Worotinski / ließ den verschmiden / entsetzt den seines ambts / und seines Fürstenthumbs / Basilius wolt die erlitten schmach wider verplenden / hat auf den Sumer darnach ain groß Hoer gesamblt / und vil grosser Püxen mitgenumen / der sy doch zuvor in khainem streit gebraucht haben / und legert sich wider an die Occa / er ist zu Columna bliben / schickht seine Potten zu MENDLIGEREI dem Khünig die jme ansagten / er wäre vergangnes Jars haimlich in sein Landt wie ain Rauber unentsagt gefallen / yetzo sol er khumen / da warttet der Großfürst sein / Der Khünig gab Antwort / er wüsste vil weg in die Mosqua / und auch sein bequembe zeit / wirdt nit yeglichem zu seinem gefallen den zug annemen / Uber solche emphange Antwort lasst der Moscoviter sein Hoer nach Nidern Neugarten verruckhen / das was im 1523 damit er möcht Casan berauben und verhörn / oder gar uberkhumen / von dannen zohe das Hoer an das wasser SZURA / daselbsten an Granitzen hat er das Schloß nach seinem namen Basilowgorod erpaut / und wider zuruckh getzogen / aber im Nachvolgenden Jar / hat er sein Rat Michaeln des Gregorn Sun / mit ainem merern Hoer weder vor nie / nach CAZAN Dasselb zu uberkhumen ausgevertigt / Der SAPGIREI ist gleichwol daran erschrockhen / und darumb zu seinem Brueder geschickht / Damit derselb seiner Jungen Sün ainen gehn Casan an sein stat schickhte / Er zoche zu dem Türckhen umb hilff / der jung ist khumen / und hat sich auf ain Platz gelegert / haisst GOSTINOWOSERO, ist ain Innsl oder weerd in der Wolga / da die Khaufleut zusamen khumen / ist nit verr vom Schloß / da ward er ehrlich von den jnnwonern emphangen / Darundter auch SEYT, das ist der Oberste Briester / wirdt in solchen Ehrn und wirden gehalten / so der khumbt / das jme die Khünig entgegen steend / jme sitzunden am Roß die hendt pieten / und mit dem Kopf naigen / des ist den Khünig zuegeben. Die andern aber als Hertzogen oder Haubtleut / greiffen dem nuer an seine khnie / die Edlen an die Füß / der gmain man beruert alein sein claid oder Pherdt / Diser seyt / hat des Moscoviter Parthey haimlich gehalten / Suechte weeg / wie er den Jungen möcht fahen / und in die Mosqua schickhen / ist aber daruber gefangen / und mit ainem messer offentlich getöd worden / Der Veldhaubtman Michael bracht sovil der Schif zusamen / das geschütz und die Profandt zuefüren / wiewol das wasser vasst prait und weit an den ortten / was doch zu sehen als gar mit scheffen bedeckht / eylt also gegen Casan / wie er gehn Gostinowosero khame / am Sibenden tag Julij / hat sich da gelegert / und Zwaintzig tag auff sein Reissisch volckh gewart / in der zeit ist durch sein anschifftung das Schloß Casan angefeuert / und in angesicht der Reissen gar ausgeprent worden / datzumal was ain grosse gelegenhait das Schloß zu uberkhumen / aber der Haubtman het khain erfarnhait noch schichligkhait / hat khain menschen an Püchl lassen antretten / so ist das Schloß auch sein unverhindert wider aufgepaut worden / ist alles Holtzwerch / am Achtundtzwaintzigisten tag / hat er uber di Wolga geschifft auf das Landt / daran das Schloß ligt / und bey dem fluß CAZANCA sich gelegert / Widerumb Zwaintzig tag auf ain guete gelegenhait gewart / Der Jung zu Casan / sein Veldtleger nit verr von den Moscovitern geschlagen / der hat seine Czeremissen offt an die Reissen geschickht / gleichwol nit vil geschaffen / in dem khumt der ausgetriben Scheale mit etlichen Schiffen / und schreibt dem Jungen / Er solle sich aus seinem erblichen Reich heben / dargegen entpeut jme der Jung / wildu dis mein Reich haben / muesst das mit waffen besuechen / wem dan das glück gibt / der habs / als die Reissen also lang ungethoner sachen vertzogn / haben sy die Profandt vergebens verzert / und hunger gelitten / dan die Czeremissen haben alles weit und prait verheert / und die paß und weg verhuet / das jnen nichts zuekhomen mügen / dermassen / das der Großfürst ir not und abgang nit wissen mügen / So hat er doch Zwen verordent / und nemblichen Khnes Iwan Palitzkhi der mit Profandtschiffen von undter Neugarten dem Hoer zufaren und pald herwider khomen sol / damit der Fürst wisste / was man doch thäte / Der ander ist mit fünff hundert Pherdtn am Land abgezogen / der ist von den Czeremissen erlegt worden / das nit mer dann neun Personen davon khumen seind / der Haubtman schwärlichen verwundt / am dritten tag bey den Feindten gestorben / So pald die mär der niderlag in das Hoer verkhundt / wardt ain solich schreckhen davon / dann man sagte der gantz geraisig hauffen wär erlegt / das khain anderer gedanckhen was / dan fliehen / und ward beschlossen abzuziehen / doch wussten sy nit / ob sy jren weg nach dem wasser auf nemen sollen / des doch gar beschwärlich was / oder ob sy abwerts Schiffen sollen / damit sy etwo zu ainem einrinnenden fluß khämen / nach demselben sy mit besser bequemlichkhait unverhindert der feindt uber sich khumen möchten / In der betrachtung so khumen die neün uberbelibne von den Fünffhundert erschlagnen / die sagten das der Hanns Palitzkhi mit vil Schiffen und Profandt abgeverttigt / und am weg wäre / der ist auch unglücksäliger mit wenig Schiffen den feindten entrunnen / und ankhomen/ dann er was von grosser arbait müd worden / sich aines nachts am gstat im Schiff zu rhue gelegt / so khumen die Czeremissen / mit grossem geschray / wer fert alhie / des Palitzkhi diener vermaintn es wären jre Schifleüt / droen denen sy morgens zu gaisln / umb das sy dem herrn Obristen sein rhue nit liessen / darüber sagten die Czeremissen / morgen wellen wir anderst mit euch handln / und al gepunden gen Casan füeren / Am morgens vor Sunnen schein / was ain dickher Nepl / fallen die Czeremissen in die Schiff / und erschreckhen die Reissen dermassen / das der Palitzkhi under seinen neüntzig der grössern Schiff verließ / in der jeglichen dreissig menschen waren / und verlast das gestat / gibt sich in die mitte des fluß / und in der finster des Nepls vasst plasser zu dem Hoer khomen / darnach hat er mit vilen Schiffen sein weg wider uber sich genumen / mit gleichem unglückh / den Czeremissen in die hend khomen / alle Schiffung verlassen / mit wenigen entrunen / in denen allen unglückhen und hunger / So ist der geraisig zeug am Land uber das wasser VIEGA / so von Mittentag heer / und acht meil under Casan in die Wolga rindt / khumen / und zwier von Tatern angegriffen / und zu bayder seitten vil erlegt / doch seind die Tattern gewichen / darnach seind die zu dem andern Hoer khumen / und am Fünffzehenden tag Augusti haben sy Casan belegert / Der jung hat sein leger an der andern seitten der Stat geschlagen / denen under augen / und seine Reitter außgelassen / der feinde Hoer zu besehen / und sy zu der Schlacht zu raitzen / damit seind villerlay scharmutzeln geschehen / uns haben namhaffte leüt / die auch darbey gewest sein / angezaigt / das sechs Reitter gegen der Moscoviter leger sich gelassen / die der SCHEALE mit hundert unnd fünfftzig Pherdten angreiffen wellen / aber durch den Obersten verbotten worden / dann zway tausent Pherdt waren verordent / damit wolten sy die Tatern umbritten haben / das die nit entrinnen möchten / Aber die Tatern theten gemachs fliehen / und so die Moscoviter nacheylten / stelten sich die Tatern wider zu wöhr / gleichermassen theten die Moscoviter / So sehen die Tatern der Moscoviter clainmüetigkhait / und schiessen in sy / haben auch in der flucht jr vil verwundt / Dan so sterckhen sich die Moscoviter / jagten die wider / und also ain zeit ainer den andern getribn / in dem seind zway Tatarische Phärd auß ainer Püchssen erschossen / Die ubrigen vier Reitter / haben die zwen deren Pherdt erschossen / under jnen allen hinweg gefüert / In der weil bracht man das geschütz an das Schloß / und beschoß das / die aber im Schloß haben sich auch nit faul gestelt / schossen seer wider herauß / in dem ward der Püchssenmaister im Schloß erschossen / sy hetten auch khain andern / So pald das erindert ward / hetten die Teütschen und ander besölte Diener oder khnecht gantzen trost / das Schloß zu gewinnen / aber der Haubtman hat den hunger seiner leüt bedacht / und haimlichen umb ain anstand gehandlt / damit er sein volck und geschütz von dannen bringen möcht / und den sturm nit wellen bewilligen / sonder sy mit sträfllichen worten angeredt / das sy an sein haissen sich des underfahen wolten / Die Tattern so pald sy des Haubtmans mainung vernamen / schickhten sich auch darnach / Namen die mitl so der Oberste fürschlueg an / nemlich das sy jre Potn zu dem Großfürsten schickhten / und des fridens zwischen jnen handlen / Nach solchem beschluß zoch Palitzkhi mit den Reyttern in die Mosqua / sy verdachten den Obersten / als hette er gaben von Tatern genumen / solchen verdacht merckhte ain Püchssenmaister Sophoier / der wolte mit seiner Püchssen zu den Feinden gefallen sein / und ist darüber gefangen und schwaerlichen gefragt worden / hat bekhent seinen willen / und das er gaben darumb emphangen hette / gegen dem der Oberste nichts weitters gehandlt / sonder also bleiben lassen / wie das Hoer wider abgezogen / als man sagte / waren hundert und achtzig tausendt / Des Khünig zu Casan gesandte ainer zu dem Großfürsten in die Mosqua khamen / und noch der zeit / wie ich zum andern mal khame / da gewest / was noch khain frid zwischen jnen beschlossen / Der Moscoviter hat auch den tag und platz wie die grossen märgkht zu GOSTINOWOSERO hievor gehalten worden / geen Niderneugarten gesetzt / und benent / zu grossem der Casaner abpruch jres einkhumens und narung / auch bey grossen peenen gepotten / das der seinigen khainer weitter hinab ziehen sol / mit dem unnd von wegen mangl des Saltz verhoffte der Großfürst sy zu bezwingen / sich wider zu ergeben / Aber auß solcher uberlegung des Marckhts / hat der Moscoviter nit minder schaden / dan die Casaner genumen / wan villerlay sachen die man von ASTRACHAN auch Persien und Armenia nach dem Moer und wasser hievor heraufbracht / seind in grosse staigerung und abgang khumen / und for auß der Edlen Visch Beluga die undter und ober Casan gefangen werden / geraten müessen / hab auch zu der andern meiner ankhunfft khain erfragen mügen / Sovil von Casanischen handlungen.

     NAGAI, (so man den namen außspricht / wirdt NAHAI geredt) die Tatern khumen nach Casan die yenhalb der Wolga wonen am CASPIO Moer an dem fluß IAYCK der auß dem Land SIBIER herfleust / dieselben Tatern haben khain Khünig / sonder Hertzogen oder Fürsten / der seind zu unsern zeitten drey gewest / das volckh und gegent gleich gethailt / Der ain hieß SCHIDAK der hat ain Stat genent SARAITZICK gegen dem Aufgang yent der Volga sambt dem thail am Jaick / COSSUM hieß der ander / der hat sein thail zwischen den flussen KAMA Jaickh und Wolga / SCHICHMAMAI der dritte besaß ain thail des Landts Sibier und die umbligende Länder / Schichmamai wirdt sovil gesprochen / als heilig oder geweltig / Dise Land seind vasst alle sehr wäldig / ausser der geen Scharaitzikh ligend / die seind etwas plosser.

     Zwischen der Wolga und Jaickh bey dem Moer CASPIO wonten vor zeiten die namhafftigisten Tatern SAWOLSKI ain mechtiges Khünigreich / Ein ehrlicher Moscoviter hat mir und andern glaubhafftig gesagt / wie sein Vatter zu derselben Khünig ainem geschickht sey worden / habe daselbsten ain Samen gesehen / etwas clainer und runder dan Melaun Sam / davon sol ain frucht erwachsen sein ainem Lämplen gleich / und der Stam wurde als fünff span hoch / nach derselben sprach nente man dieselb frucht BORANETZ / sovil als ain Lample / dann es hette glider wie ain Neugefallen Lämpl / die frucht sol bluet aber khain fleisch haben / sonder wie die Krebssen / zum hindersten ain materi haben an des fleischs stat / die füssl hetten nit hürnene khloe / sonder nur haar oder wollen / der Stam steet wie am napl oder mitten am pauch / sol so lang leben / als lang des die narung umb sich erraichen mag / die heytl seind subtyl / soln sy prauchen under jre Colpagkhen oder hüetle / jr vil haben Khundtschafft geben / die der selben heytle gesehen haben / die Lämple sollen gar süeß zu essen sein / darumb streichen jnen die Wölff und das gefügl seer nach / Hernach in Teütschen landen vor wenig zeiten hat mir Doctor Guilhelmus Postellus ain weit erfarner man gesagt / er hab auf mein Lateinische beschreibungen dem Lämplen nachgefragt / und vom Michael der Venedigischen herrschafft Türckischen und Arabischen Tulmätschn / der in vasst vil und ferren landen gewandert vernomen / das er in ainer Tatarischn Stat SAMARCANDA die sich mit der Nachperschafft an das Caspysch Moer und die ort davon ich schreib erstreckht / gesehen hab / gar subtile pelgl die man von ainem gwächs daselbstn hin und weitter bringt die MUSSULMANI prauchen die auff jren geschornen khopfn auch an plassen leib / Er Michael hab das gewächs nit gesehen / aber vernomen / das von ainem gwächs auß der erden ainem Thier gleich furmüg sein / soltn daselbsten SAMARCANDEI genent werden / Ich schreibs wie sy gesagt haben jm sey wie jm welle / man mag sich der warheit erfragen.

     Von SCHIDAK in Aufgang zwaintzig tagraisen / khumbt man zu den völckern / welche die Moscoviter nennen IURGENCZI uber die herrscht BARACK SZOLTHAN, sol des Großfürsten CHAN oder Khünig von Cathaia brueder sein / und von dannen sollen noch zehen tagraisen sein / zu dem BEBEYD Chan / das sol der groß CHAN zu CATHAIA sein.

     ASTRACHAN ain namhaffte grosse Stat / darinnen grosser Khauffmans handl gephlegen wirdt / die gantz gegent oder herrschafft behelt denselben namen / und ist zehen tagr aiß undter Casan / an der Wolga dißhalb gegen Mittag / nahend am gmund / wiewol etlich schreiben / sol etliche tagraisen von gmundt ligen / des ainer oder der ander ursach mügen haben / wie jr vil sagen und schreiben / sich der fluß in Sibentzig arm außthailt / und vil weerd oder Insseln macht / auch mit sovil gmunden einfelt / das alles wie ain Moer ain ansehen hat / jr vil schreiben und nennen dise Stat Citrachan.

     TUMENSKI, SCHIBANSKI und COSACZKI / die Tatern wonen uber die Wiatkha und Casan / rainend an groß Permia / Tumenski hat vil wälder und uber zehentausent man nit.

     KALMUCHI seind Tatern auch uber die Wolga hinüber / die allain under den Tatern lange haar tragen / Darnach ist ain Stat dißhalb der Wolga am Caspischen Moer / Sechs tagraisen von Astrachan / haisst SCHAMACHIA da arbait man villerlay Seiden / die sol der Khünig von Persia nit vor lengst erobert und eingenumen haben.

     ASOPH ain Stat am wasser Tanais / sol Siben tagraisen von Astrachan ligen / und von Precop der Stat fünf tagraiß / von Asoph ghen Schamachia zwelf tagraisen / zwischen Casan und Astrachan / nach der Wolga / zu baider seitz ab / und gar herüber an Nieper / seind alles ungepaute Land / da dennocht vil volckhs wonent / Allain was Asoph und ACHAS welche zwelf meil ob Asoph am Tanais ligt / und etliche wenige Tatern so am clain Tanais das veld pauen und in heusern wonen.

     APHGASI seinn völckher / so man sich von Aufgang nach Mittag wendt / bey den gemösen Meothis / unnd dem Moer bey dem wasser CUPA des auch in die gemöß einfleust / wonend / daselbsten seind gepürg hintzt an das wasser MERULA, welches in das Pontisch oder Schwartz (die Walhen nennen diß das groß Moer) felt / in denselben gepürgen wonen die völckher CIRCASSI oder CYKY / haben ain solch vesst Land / das sy weder in der Türckhen noch der Tatern gewalt oder gehorsamb seind / Nach der Reissen sag / seind dieselben Christen des Griechischen glaubens / und verrichten allen Gotsdienst / in jrer als Windischer sprach / torsse Moerrauber / sy haben vil flüß die auß den gepürgen in das Moer fliessen / da sy jre Schiff halten / und auff die Khaufleut die von Capha nach Constantinopl schiffen / jr aufsehen halten / Uber die Cupa ist MENGARLIA das wasser ERACLEA entzwischen / hinfur COTATIS, des etlich COLCHIS vermainn sein / Darnach khumbt PHASIS das wasser / unnd ehe das in das Moer felt / nit verr von dem gmund / SATABEL macht es ain Innsl oder weerdt / da nach etlicher mainung des IASON Schiff gestanden sein sollen / uber den Phasis khumt TRAPESUNT.

     Das Moer so man ain gmöß Meothis nent / darein der Tanais fleust / sol drey hundert Wälhisch meyl in der lenge sein / hintzt an das gepürg bey sant Johanns / dan so khumbts in ain enge zwayer Welhischer meyl / furt auß so veraint es sich mit dem Moer.

     PRECOP das Land yetzo also genent Lateinisch THAURICA CHERSONESUS ligt mit dem ainen thail an den gemösen MEOTIS das merer mit dem Moer umbflossen / als man vom Land hinein zeucht / ist vom Moer an das gemöß nit verrer dan Tausent zweyhundert schriet / In denselben umbgebnen Khraiß ligt ain Schloß oder Stat genant KRYM da zuvor die Khünig jre gesäß gehabt / davon sy auch KRYMSKI den namen gehabt / Ainer auß denen hat wellen die wasser zusamen bringen / mit durchgraben der ennge des Ertrichs / damit ain Innsl dar auß wer worden / Der graben ward zum thail gemacht / aber nit so tieff / als fürgenomen und von nöten was / von solchem grabm / als auch ain Stat daran gepauen / hat das Land und die Stat den Namen genumen / dan KOPAT haist grabm / PRECOP als durchgrabm / nach windischer sprach. Die Khünig daselbstn werden heut darnach PRECOPSKI genant / Es hat ainer geschriben / als ob zu Kayser Maximilian etc. zeitn ain Khünig da geherrscht mit namen Procopius / Gleichermassen yenthalb der Wolga so Windisch Savolski haist vermaint Sawolhius geregiert haben / der seer betrogen / Diß Land ist auch nach der leng mit ainem wald gethailt / das thail so gerad an das Moer raint / helt der Türckh / darin ist die Stat CAPHA etwan THEODOSIA genant / die Genueser habens etwan besessen / Der MACHUMETES Türckischer Kayser hat jnen die Stat genumen / Den andern thail dißhalb des walds so das Ertrich berürt / halten die Tatern / dieselben Tatern alle khumen heer / von den Sawolhensern / als sy ainmal in zwitracht khamen / seind die daheer geratten / und darum seind sy noch füro in der feindtschafft beliben / vil Kriegs gehabt / und noch zu unserm gedenckhen / als Alexander Khünig in Poln und Großfürst in Litten herrschte / kham SCHEACHMET der Khünig von Sawolchen dahin zu dem Großfürsten in Littn / mit samht weib und seinem volckh / der maynung / das sy paid solten wider den Khünig in Precop khriegen / des sy sich mit ainander verträgen und verpunden hetten / der Khünig belib in Heusern sein weib und volckh lagen zu veld im Schnee / der khelten waren sy nit gewont / dan der orten sy heer khamen / pleibt khain solcher Schnee / und der Khünig zu Poln Großfürst / gieng langsamb mit seiner zuberaittung umb / die Khünigin und das volckh ward verdrossen / Sy schickht jren Potn zu dem Khünig in Precop / Soverr Er sy zu seinem weib nemen / so wel sy sambt jrem volckh zu jme khumen / des also angenumen wardt / mit der besterckhung schickht der selb Precopski die ubermaß des volckhs / so bey dem SCHEACHMET beliben was / zu uberfallen / Der Scheachmet sach sein unglückh / nam seine leüt die er noch hette / als Sechshundert Pherdt / wolt den Litten nimer trauen / zeucht hin gen Weissenburg das man MONCASTRO nent / am NISTER, Lateinisch TYRAS dem fluß / gehört dem Türckhen / verhofft vom Türckhen hilff zu erlangen / weil er sich aber mit den Christen wider jres glaubens feindt verpunden hette / bevalch der Türckh den zu fahen / des er war genumen und khaum mit halben volckh von dannen entritten / khumt wider ghen Chiow / wont im veld / der ist durch die Litten umbgeben / unnd in jren gwalt bracht worden / wie man mit dem ghen der Wild nachnete / kham Khünig Alexander jme entgegen / emphieng und beglaittet den eerlichen zu Herberg mit gueter vertröstung / fuert den auch mit sich in die zusamenkhunfft der Poln / da solte man des Khriegs halben wider MENDLINGEREI in Precop hanndlen / Als sich das lang verzoch / und der Tater vernam die Hoerfart were bewilligt und beschlossen / Fragt er / was man nunmals thuen welle / sagt / man würde das Khriegsvolckh aufnemen und schicken / darzue spricht er / wolten die Herrn nit auch mit ziehen / vermaint on die wurde nit vil guets gekhriegt / und trachtet dan wider darvon / Darüber er gefangen / und zu TROKI in ainem Schloß vier meil von der Wild erlichen verhüet und gehalten worden / der Waivoda daselbstn zu Trokhi hat mich zu gast gehabt / und denselben Khünig auch an Tisch gesetzt / ist hernach gleichwol ledig gelassen / aber pald erschlagen / Also haben die Savolhischen Khünig ain ende genumen / mit den seind die Khünig zu Astrachan / welche aines geschlechts gewest auch vergangen / damit seind die zu Precop gewachsen / also das derselb den Khünig zu Poln dahin bracht hat / das er jme järlichen ain gelt gibt / als die Poln sagen / ain diennst gelt / damit zu allen des Khünigs notturfften leüt zuschickhen und dienen sol / zu besorgen ainen Tribut gleich / Der Moscoviter gleichermassn denselben Tatern stätes mit gaben versünen mueß / khumt auch auß dem / weil die paid Großfürsten Litten und Mosqua in stäter Feindtschafft gegeneinander steen / vermaint yeglicher welle den Tatern zu hilff haben / So begibt sich das er von baiden nimbt / yeglichem gueten trost gibt / und betreugt sy baid / wie dan der zeit als ich erstlich in Litten und Mosqua geschickt wardt / der Moscoviter zu khainem gleichen friden oder anstand bewegt möcht werden / Der Polnisch Khünig vermöcht den Tatern wid[er] den Moscoviter / des er auch bewilligt / Als aber der Polnisch Khünig dem Moscoviter für OPOCZKA in sein Land zoch / der Moscoviter handlt aber mit dem Tatern / die mainung / weil der Khünig sein volckh ausser seines Lands hette / müge der Tater in des Khünig zu Poln Land als unversehen seinen willen schaffen / dem Rat volgte der Tater / ist also mit der Nachpern zwitracht so groß gewachsen.

     Derselb MENDLIGEREI Khünig zu Precop hat ainen Taterischen Fürsten / auß NAGAI mit namen MAMAI auf sein seitten bracht. Als der / im 1524 Jar zu Precop außgezogen / und den Khünig zu ASTRACHAN uberfallen / ist jme aber empflohen / der Precopski die Stat eingenumen / etliche tag darin gewont / So schickhet ain ander Nahaiski Fürst mit namen AGIS zu seinem brueder MAMAI und strafft den / warumb er jnen allen zu schaden ainen so mächtigen an die ort brächte / der sich auch ain Herrn uber sy undternemen werde / Auf das haben sich die paid gebrüder entschlossen / der AGIS sol mit wievil er müge volckh khumen / so wellen sy sich baid der gehabten sorg erledigen / Agis bestimbt die zeit seiner zukhunfft / der Mamai sagt zu dem Khünig das volckh sey nit in Steten zu halten / wurde damit verderbt / nachdem die yeder zeit im veld zu ligen gewont seind / man sol sich zu veld legern / Der Khünig volgt / der Mamai legert sich an das ort da sein Brueder zu jme khumen möchte / die uberfielen den Khünig sambt seinem Sun BATHIR Fünffund zwaintzig järigen am essen / schluegen die baid zu tod / und das maist sein volckh / sovil des nit mocht entrinnen / und haben den fluchtigen nachgehengt / gar uber den Tanais und zu der Stat Precop / die belegerten sy ain zeit / als sy die mit bedroen oder betaidigen nit mochten erobern / seind sy abgezogen / damit ist der Khünig von ASTRACHAN wider in sein reich khumen / und die Khünig in Precop an jrer macht ernidert / Als MACHMETGIREI erschlagen / SADACHGIREI mit hilff des Türckhen dem er lang gedient hat / das Khünigreich uberkhumen / wie aber der nach Türckischen gewonhait sich gehalten / sich wenig sehen lassen / ist er wider außgetriben worden / und seins Brueder Sun eingesetzt / derselb hat den SCHADACHGIREI zu fängkhnuß bracht / der pat den Jungen / damit Er in seim pluet nit wüttet / seines alters sich erparmbte / und vergundte jme als ainer ainschichtigen person etwo in ainem Schloß zu leben / und des Titl aines Khünigs lassen / Er welle sich alles gepiets entschlahen / hat das also erlangt.

     Die Namen der wirdigkhaiten seind ungevärlich die / CHAN ist Khünig / SOLTAN aines Khünigs Sun / BY als ain Hertzog / MURSA aines Hertzogen Sun / OLBOUT ain Edl oder Ratsman / OLBOADULU aines Edlmans Sun SEYT wierdt der Obrister Briester genent / KSI ist ain gemainer man / Der ämbter namen / ULAN ist der nechste nach dem Khünig / dan die Khünig haben vier / mit denen sy alle sachen beratschlagen / Der erst haist SCHIRNI, der Ander BARNI, der Drit GARGNI, der Viert CZYPTZAN, Sovil von Tatern.
 

Von Litten.

     LITHEN das Großfürstenthumb mit seinen zuegehörigen Fürstenthumen und Landen / stoßt an das Moscovitisch gepiet / von Czircassn / nit die an de[m] Moer / davon hievor gesagt / sonder am Nieper undter Chiow / hinab sitzen / untzt an das Leifflendisch Land / so sich zu Dunenburg an der Duna / welche die Reissen Dwina nennen / anhebt. Dise Czircassen sein Reissen denen was hievor fürgesetzt / Eustachius Taschcowitz ain anschlegiger listiger Khriegßman / der mit den Tatern vil handlungen und gemainschafft gehabt / und sy doch offt auch geschlagen / und erlegt.

     So ist er auch bey dem Moscoviter gewest / die alle auch seinen herrn Khünig offt uberfüert / Des Jars als wir in der Mosqua waren / hat er etliche Tatern auff Littisch geclaidt / auff des Moscoviter Land raisen lassen / er wisste wol die Moscoviter wurden nit underlassen / denen nachzueyllen / hat sich mit seinen leüten in ain halt gestelt / die eyllende Moscoviter zu emphahen / Als die Tatern ain grossen raub in dem Land SEVERA bekhumen / und auf Litten jren abtzug namen / Moscoviter pald denen nachgeeylt / und ain Raub in Litten gethon / und sich gerochen damit uberladen / und beschwärdt / am wider ziehen hat der Eustachius die emphangen / und alle erschlagen / der Großfürst schickht sein potn zu dem Khünig in Poln / beschwärdt sich des unrechten / so jme wider den anstand beschehen wär / der Khünig antwort / Seine leüt hetten jme khain unrecht gethon / die Moscoviter aber hetten in Litten schaden gethon / des hetten die seinige gerochen / Also het der Großfürst den schaden sambt dem spot.

     Undterhalb der Reissischen CZIRCASSN ist khain Christen wonung meer / aber viertzig meil undterhalb am Nieper / und nit verr ob dem einfaal in das Moer oder gmundts / ist in Stat genent OZAKOW an dem gestat gegen der Walachei welche die Tatern nit gar lengst von dem Großfürstenthumb Litten genumen / yetzo aber hat der Türck dieselb jnnen / Von Ozakow untz gehn Weissenburg / das am gmundt des Nister den man Lateinisch TYRAS nent ligt / dieselb Stat nent man auch MONCASTRO hat auch der Türckh innen / seind viertzehen meil / Von Ozakow in Precop viertzehen / von Czircassn gehn Precop viertzig meil / von Czircassen uber sich nach dem wasser syben meil ist KAYNOW / aber uber sich achtzehen meyl ist KYOW / die alte Edle der Reissen etwan Haubtstat / wie die gewest ist / mag man noch von den uberblibnen stumpfen und den wunderbarlichen grebnussen in den pergen und unvertzerten leihen abnemen / an vil ortten daselbstn umb / werden vil öder Clöster und Khirchen gesehen / Ich hab von glaubwirdigen personen vernomen / das die Maidlen daselbsten selten uber syben Jar kheusch bleiben / khain glaubliche und vernünfftige ursach hab ich nit gehört / den Khaufleuten ist nit verpotten dieselben zu jrem willen zu bringen / aber nit zu verfüren / dan welcher aine understeet zu verfüeren / und betretten wirdt / verleust leib und guet / Daselbstn haben sy das Recht / welcher frömbder Khauffman daselbstn stirbt / desselben guet gefelt der Herrschafft in gleichen faal herwider / Welcher Khauffman von Chiow bey dem Tatern oder Türckhen stirbt / so beleibt das guet so bey jme gefunden / auch dersel[ben] Herrschafft darin er gestorben ist / Es ist ain perg daselbst / wan die Khaufleut darauf / als sy dan müssen faren / und ichtes am wagen pricht / das er nit faren mag / so ist das guet auf dem wagen der Herrschafft verfallen / Das alles hat mir Herr Albrecht Gastold derselben zeit Waivoda zu der Wild / und Stathalter des Großfürstenthumbs Litten / selbs gesagt / Noch für auf von Chiow dreissig meil ist MOSIER an dem fluß PREPETZ / der zwölf meil ober Chiow in Nieperg laufft / THUR ain ander Vischreicher fluß / khumbt in Prepetz / Von Mosier gehn BOBRANSCO dreyssig meil / mer uber sich Fünffundtzwaintzig meil / ist MOGILEW das ligt Sechs meil undter ORSSA / die Fleckhen alle / untzt heer / ligen am Nieper heer dißhalb gegen Nidergang gehörn gehn Litten / was aber an der andern seitten des Nieper ligt / gegen Aufgang ist des Moscoviter / allain DOBROWNA und MSTISLAW / zwischen Orsa und Dobrowna geschach die schlacht / davon hievor geschriben ist / in wenig Jarn erwuechs solch groß holtz / das niemandt glauben möcht / das da sovil platz gewest wör / sovil volgkhs mit jren hauffen sich da zusamen zu thuen.

     BORISOW ist ain Stat Zwoundtzwaintzig meil von der Orsa heerwerts gegen Nidergang an dem wasser BERESINA des undterhalb Bobransco in Nieper felt / das wasser an dem ort nach meinem ansehen / ist grösser und praiter dan der Nieper zu Smolensco / und ich acht das dises wasser von den alten der BORISTENES genent ward / dan die baide Namen haben schier ain außsprechn oder laut / so man des PTOLOMEI beschreibung sicht / wirdt man nachend befinden derselben ainen vrsprung umb die ort gesetzt haben.

     Der Litten sachen seindt hintzt zu des Witolden zeitn wol gestanden / wan man yetzo zu veld ziehen sol so khumen sy gleich wol gerüst / auf den bestimbten platz / aber so man weitter verruckhen sol / khumbt ainer nach dem andern zu dem Obersten / suecht ain ursach / damit er sich außreden mag / gibt dem Obersten gelt / und bleibt anhaimbs / die armen und die Dienner sollen alles thuen / und welche selbs raysen schickhen das beste von Rossen und Khlaidern widerumb haim / und das geschiecht nit haimlich oder mit schandn / Man läst das offendtlichen also berüeffen / ob sich yemandt mit gelt von solcher rayß entledigen welle / und geet also zue / das sy sich der guete jrer Fürsten und Freyhaiten nicht allain prauchen / sonder mißprauchen / sy haben der Fürsten einkhomen so gar in jren henden ain zeit gehabt / Also wan der Khünig Sigmund in dasselb Land khumen ist / sein aigen gelt des mitbracht[t] ward / zeren müste / allain die Herrn oder Landleut hetten was auß guetem willen dargeben / gebrauchen sich langer claider / mit dem Pogen auf Tatarisch / Spieß oder Copien und Tartschen / auch Säbln / auf Hungerisch / guete verschnitne Pherdt / unbeschlagen mit geringen pyssen oder Mundstuckhn.

     WILD / Lateinisch und Windisch WILNA ist die Haubtstat in Litten / ligt zwischen Pühlen / do die zway wasser VELIA und WILNA zusamen fliessen / die Welia behelt den namen / und felt etliche meil undter der Wild in fluß MUML / also nennen den die Preysen / auf Reissisch NEMEN / Ich acht bey dem Ptolomeo CRONON genent / der schaidt Preissen (des so yetzo Margraf Albrecht von Brandenburg sider er den Teütschen orden abgethon / und sich dem Khünig zu Poln undtergeben / Erblichen als Hertzog jnhat) Von SAMEITEN / da der auch in das Teutsch Moer felt / Die Stat ist jetzmals mit ainer mauer umbgeben / hat vil ansehenlicher Khirchen / und Clöster gemaurt / und ain Bischofflicher stuel / der zeit was Herr Hanns des Khünigs Sigmunden natürlicher Sun Bischove / hielt uns an unserer widerkhunfft wol / In dem einfang da der Khünig oder Fürst sein wonung hat / ist ain Thumbkhirchen / heervornen ain Pharrkhirchen / etliche Clöster und sunderlichen der Parfuesser wol erpaut / aber vil meer seind der Reissischen dann Römischen Khirchen in der Stat / In dem Fürstenthumb und zuegehörigen Landen / seind drey Römische Bischoff da zu der Wild / zu Samathein / unnd zu Chiow / Die Reissischen aber seind in dem / und im Polnischen gebiet / der Ertzbischofe wont yetzo in d[er] Wild / Bischove zu Polotzkho / Wolodimer / Lutzkho / Pinsco / zu Khelm / und Premissl / Die Litten haben jr narung von Hönig / Wachs / Pech / Traid / dartzu machen sy vil Aschen / Preter und manigerlay holtz / zu Schiffen / und anderm gepeu / des sy zu der See oder Moer und am maisten Dantzkha zue füeren verkhaufen / und vertauschen umb Saltz / das bringt man auß Brithania daheer / Der zeit wie Khünig Cristiern auß Denmarck gewichen / und dasselb Moer der Rauber halben unsicher was / hat man angefangen das Saltz auß Reissen dahin zu füeren / des man sich noch gebraucht / Bey unsern gedenckhen seind zwen namhaffte Fürsten in der Land ort gewest / der Khnes Constantin Ostroski der gleichwol aines mals von den Moscovitern geschlagen und gefangen worden / aber zuvor und hernach vil glückhs und uberwindung wider die Moscoviter / Walachen / und Tatern gehabt / Ich bin so glückhsälig nit gewest / das ich den / wie offt ich der zeit Er noch gelebt / in Litten gewest bin / hette mügen sehen / Dan Khnes Michael Linskhi der in seiner jugent bey Hertzog Albrechten von Saxen der zeit derselb den Khrieg in Friesland füerte / gedient / derselben zeit sich khain Knesen / sonder Pan Michael lassen nennen / hat sich aller ehrlichen sitten und Ritterspyl angenumen / und was Khriegßsachen / Rennen / Stechen / Ringen / Springen / auch zu khurtzweil mit Tantzen und aller höfligkhait undterfangen / und damit für ander den rhuem gehabt / bey dem Großfürsten Alexander / der nach seinem Brueder Hanns Albrechten Khünig zu Poln worden / ist dermassen gehalten / das er die vorderist und höchste steel / und das vertrauen gehabt / So hat es sich begeben / das auß seinem bevelch umb Habern des Khünig Pherdten gehn Trokhi geschickht ist worden / des Hanns SAWORSINSKI als VOIWODA daselbstn (vier meil von der Wild) des zum ersten gestatt mit betroung dem Wagenkhnecht / sol nimer khumen / oder er wurde geschlagen / Solches was dem Khnes Linski gesagt / der schickht hinwider der Fuerman ward geschlagen / und bracht khain habern / Der Woivoda kham geen der Wild / wie er in des Khünig zimer geet / so ist der prauch der Großfürsten daselbsten / wan solche grosse Ambtleut khumen / das sy gegen jnen auf stehen / und etliche trit entgegen khomen / Alexander aber kheert sich umb / und legt sich in ain fenster. Der Hertzog Michael stuend auch im zimer / da redt der Saworsinskhi laut / Er merckhte die ungnad / wiste doch nit / mit wen er die verschuldt hette / dan sagt der Knes Linskhi / wie es mit des Khünigs Wagenkhnecht und Habern ergangen was / der wolt sich vil entschuldigen / der mainung / als hette er des Khünigs nutz damit betracht / Darauf spricht der Khünig / Ich bedarf khains Gerhaben / hab meine jar / darnach gieng der Saworsinskhi wider auß / und die ungnad blib dermassen / das er der Woyvodschafft und noch aines Ambts entsetzt ward / so doch die Woyvodschafft auf lebenlang on verwürchung bleiben / der Sawersinskhi hette noch das dritte Ambt / er und seine freundt sorgten / wurde auch davon gestossen / fanden in Rat / sol sich mit Hertzog Michaeln vertragen / das geschach / damit ist er bey dem dritten Ambt / aber der grol in seinem hertzen bliben / Es begab sich das der Khünig khranckh was / und die Tatern khamen / mit grossem Hoer in das Land / der Khünig muest nach jrer gewonhait antziehen / wardt mit gefürt / Al sachen warden Knes Michaeln / und ainem herrn Schißkha genant bevolhen / der selb erkhranckht auch / also das alle handlung auf den Knes Michaeln fiel / in Summa die sach ward wol und glücklich verricht / Die Tatern waren so harrt als vor nie geschlagen / den Khünig fürt man wider nach der Wild / starb aber undter wegen. Da erschin das Sawersinskhi erhaltner haß / schalt den Knes Linskhi ainen verräter des Vatterlands / Er und seine freundt schickhten auch zu des abgestorbnen Khünigs brueder Hertzog Sigmunden zu grossen Glog / dem zaigten sy an / Knes Michael stelte nach dem Großfürstenthumb / derhalben sol er eylen und khumen / als auch Hertzog Sigmund nit feyrte / und raist nach Litten / Knes Michael kham dem entgegen / als mit Achthundert Pherdten / erkhent da sein natürlichen Herrn / und thet als recht und billich was / Wie Hertzog Sigmund das Großfürstenthumb eingenomen / Rüfft Knes Michael wider den Sawersinskhi umb verhör und Recht an / Der groß Hertzog verschub die sachen gehn Craccaw / dan der was nunmals zu Khünig in Poln erwelt / Als der Khünig gehn Craccaw kham / ruefft Michael widerumb verhör an / die sach wardt aber auß etlichen fürgebnen ursachen wider gehn der Wild verschoben / des sich der Knes Michael zum höchsten beschwärdt / und derhalben gehn Hungern zu Khünig Wladislao umb befürderung zum Rechten gezogen / Derselb Khünig hat ain sondere ansehenliche Potschafft zu seinem Brueder geschickht / gleichwol nichts außgericht / Knes Michael sprach zu seinem Khünig / wirdestu mir nit des Rechtens gestatten / und verhelffen / so würde ich thuen das mir und dir layd wurde / solche reden seind mit ainem muff in windt geschlagen worden / darüber hat Knes Michael seinen Potten zu Basilio dem Großfürsten in die Mosqua geschickht / mit antzaigen der ursachen / warumb er sich jme sambt den Schlössern die er in Litten hette oder uberkhäme ergeben wolt / mit bit jme glaidt und sicherhait zu geben / damit er frey undter jme wonen möcht / die Brief mit bestättung des Ayds / waren nach dem pösten gestelt / und geschickht. Der Basilius was erfreidt / das er ain solchen man uberkhomen möcht / Nach emphangnen brief / beruefft Knes Michael seine Brüeder und Freundt / gab denen sein vorhaben zu vernemen / und beschlossen / auf welche des Sawersinski freund ain yeglicher ziehen und erschlagen sol / Er selbs name den Rit auf den Sawersinski / den betrat er in ainem offnen Hof zu Grodno am Nemen / (Ich bin wol in demselben Hof darnach beherbergt gewest) stösst die thüer an seiner Camer auf / und last ainen Tater hinein / der dem das haubt im Pett abschlueg / seine Freund verrichten nichts / Auf das wiste Knes Michael wol / wie es volgen wurde / Er legerte sich für ain Schloß MIENSCO genant / bin auch selbsten durchgetzogen / als Er aber das mit dronussen und thadingen nit mocht bekhumen / und das Land wär im antzug wider jn / verließ das Schloß / und zohe in die Mosqua / der Großfürst emphieng den ehrlichen / dan Litten hette der zeit seines gleichen nit / verhoffte durch jne gantz Litten zu bekhumen / pald ward beschlossen / SMOLENSCO widerumen zu belegern / die dienstleut darinnen / khendtn Knes Michaeln wol / Er khundte auch mit jnen handlen / und bracht sy dahin / damit sy dasselb auffgeben haben / er prauchte auch umb sovil meer vleiß die dienstleut zu solchem zu bewegen / dann der Großfürst sagte zue / wolte jme das Fürstenthumb erblichen geben / Nach ubergebung Smolensco hat Knes Michael etliche mal den Großfürsten des zuesagens vermant / und umb voltziehung angehalten / aber allain mit guetem trost den undterhalten / das den beschmertzte / und die guete seiner vorigen Fürsten noch in der gedechtnus hette / verhofft durch seine guete freundt bey Khünig Sigmunden noch gnad zuerlangen / schickht umb glaidt / mit erpiettung sein verschulden mit treuen zu erstatten / die Potschafft was dem Khönig angenäm / [u]nd sagte Herrn Georgen Wispeckhen / und Herrn Hannsen von Rechenberg / die neben jme des Khünigs brüeder gedient hetten / solch glaidt zue / das sy jme solche sicherhait bestättn sollen / Der Potte warde zu jme abgeferttigt / und ainer auß des Khünigs Räten / der dem Knes Michael gram was / und besorgte / möcht in sein vorige wirde khumen / schickht ain haimlichen Potten zu dem Moscoviter / und verkhundt jme die handlung / der Pot so zu dem Knes Michael geschickht was ain Polnischer Edlman des namens TREPKA ward auf solche verkhundtschaftung gefangen / jämerlichen gemarttert / auch getödt / aber der potschafften khaine offenbaren [-waren] wellen / sonder auf dem bestanden / er wäre auch vom Khünig abgezogn / wolt Knes Michaeln dienen / Knes Michael rüst sich zu der Rayß / wardt aber in der flucht gefangen / für den Großfürsten gehn Smolensco bracht / sprach der Fürst du untreuer oder monaidiger / ich wil dir nach deinem verdienst den lohn geben / Darwider spricht der gefangen / Ich bekhenn mich khainer untrew oder monayds / hettest du mir dein Ayd gehalten / du hettest ain treuen undterthon an mir gehabt / Als ich aber gesehen / das du mich darneben auch verspottet hast / so ist mir laid / das ich mein fürnemen wider dich nit verbringen mügen / ich hab den tod nie gefürcht / und noch nit / ain mal mueß ich ye sterben / die seel aber steet in deiner macht nit / Darnach wardt er gehn Wiesma gefüert / da ain grosser thail des Hoers lag / wardt undter die menig bracht / so khumbt der Oberste Haubtman / dem trueg man groß Eisnene Khetten nach / der spricht / Michael weil du dem Großfürsten wol gedient hast / hat er dich mit gnaden bedacht / yetzo aber so schickht er dir seine gaben nach deinem verdienst / und last die Khetten vor sein niderwerffen / So redt Knes Michael offendlichen gegen dem volckh / damit jr ware ursachen meiner gefengkhnuß wissen habt / Ertzelte die gantz History und schleust / das zaig ich darumben an / das jr eurn Herrn / wie er ist erkhennet / und was Ewr yeglicher von jme gewartund sein mag / so er mir sein Ayd und zuesagen nit gehalten / hab ich mich fliehender gegen haimwerts gericht / und also an der flucht gefangen worden / Ain mal waiß ich wol / das wir alle sterben müssen / daran mir gar nit graust / Er was nach Reissischem sitten getaufft / aber den Römischen glauben in Teutschen Landen angenumen / In der fängkhnuß verhofft er ain gnad zu erlangen / nam wider den Reissischen glauben an / in Erster Potschafft hab ich bevelch gehabt / seiner erledigung halben zu handlen / und sein person dem Khaiser Maximilian zu erlangen / ward mir geantwort / weyl er den Reissischen glauben wider angenumen / wolt dem Fürsten nit gebüren den in ain andern glauben zugeben / man vergont mir auch nit mit jme zu reden / oder den zu sehen / Als ich aber zum andern mal hinein geschickht ward / und der Großfürst sein Ehelichs weib von sich schaiden / und in ain Closter stossen lassen / des Knes Michael brueder / Knes Basily des plinten Tochter genumen hette / handlet man seiner erledigung halben / Ich was von etlichen Erlichen leuten in Poln erpetten / dem gefangnen was guets so ich möchte zu thuen / bin offt seinethalben gefragt worden / ob ich jne Knes Michaeln khente / hab meines verstands dem nichts pessers thuen khünnen / dan das ich gesagt / ich khente den nit / hab gleichwol hievor zu Khaiser Maximilians zeiten bevelch gehabt / von seind wegen zu handln / aber jetzmals nichts / damit ich jme sein sach nit verhinderte / unnd khain verdacht machte / Er was ledig gelassen / und jme vil personen zuegeordent / die meer sein gehuet / weder das sy jme dieneten / und die ursach seiner erledigung was / das der Großfürst bedacht / wan er khinder uberkhäme / so wurden seine brueder der er noch zwen hette / seine khinder nit Eelich sein / und zu der herrschung wellen khumen lassen / Die khinder möchten durch schickhlichkait jres vettern Knes Michaeln darbey erhalten werden / hat auch jne neben etlichen andern zu Gerhaben verordent.

     Nach absterben des Großfürsten hat die witbe sich nit rechtgeschaffen gehalten / darum er sy als sein nahende Muem etlich mal angeredt hat / Sy jne für ain verräter jrer khinder angetzaigt / und damit wider in fängkhnuß genumen / darinn er armklichen gestorben / Nit lang darnach hat man jr auch mit gifft hingeholffen / und jren anhang OWTZINA in stuckhe zerhackht.

     Litten hat vast grosse wälder vil See und gemöser / darauß grosse wasser / der Bog / Prepetz / Thur / und Berisina lauffen / in Aufgang und in Nieper / Aber die Boh / Nemen / Narew / und Dwina gehn Mitternacht in das Preissisch Moer / hat ain unbarmhertzigen himel / alles jr viech ist vast clain / Traidt haben sy wol vil / khumbt aber nit alle mal zu rectzter zeitigung / also das man die garben in Stubnen dartzue gericht drugkhnen und zeittigen mueß lassen / ain armbs volckh mit herter dienstperkhait behaltan / Wann ain geweltiger in aines armen Paurn hauß khumt der nimbt was essend sachen sein / und was er wil / umb sonstn schlecht dartzue den armen man / wan der nit herfuer geben wil / darumb seind die Dörffer gemaingclichen ab von der strassen / der Undterthon thar[f] zu seinem Herrn on ain vereherung nit khumen / so sy dan bringen / schafft man die / an die NAMESTNICK / das seind Phleger oder die ansehenlicher aber recht genent Stathalter / den müssen sy auch geben / Solches ist auch nit allain undter den Paurn / ja die armen Edlleut / wan sy zu den mechtigen khumen one gaben / werden selten gehört / oder fürgelassen / Ich hab von ainem Khünigclichen Hofmaister gehört / der sprach / ain jeglich wort in Litten ist gold / also zu versteen / man hört khain / man fürdert khain / on gab / Die armen leüt geben dem Khünig oder Großfürsten järlichen den vierdung / nemen sy zwelff groschen von ainer hueben / die Gränitzen darvon zubewaren / jren Herrn den ordenlichen Zinß / wan dann der Herr gesst oder Hochzeit hat / gehn Hoff oder anderstwohin raysen sol / legt man auf ain Dorff sovil Gens / Huener / Lemper / oder anders / Sechs tag in der wochen dem Herrn arbaitten / Darumb seind gemaingclichen zween wirt im hauß / der ain dem Herrn / der ander für das hauß arbait / dem Pfarrer mueß er geben wan er [es] ain weib nimbt / oder jme die stirbt / wan jme ain khind geborn wirdt oder stirbt / dan zu der peicht / das gleich ainen verwundern / oder für unglaublich halten sol / wie die armen also bleiben mügen / Morgen so hebt der Tater oder Moscoviter den mit weib und khind / es ist ain so schwäre dienstperkhait / uber das arm volckh / Von zeitten des grossen Witoldts khumen / Wan ainer zum todt erkhent wirdt / so mueß er sich selber hengkhen / thuet er das nit so wirdt er so jämerlichen geschlagen / das jme der tod ringer ist / dennocht mueß er sich henckhen / so dan ainer langsam darmit umbgehet / spricht ainer / sol eylen / der Herr sey zornig / damit so thuets der arm mensch / fürcht die schleg und hengt sich.

     Wilde thier so man in dem Littischen zuegethonen Landen / ausserhalb der so in Teütschen Landen seind / die sy nach jrer sprach nennen SUBER / der in Latein BISONS genent wirdt / aber wir Teutschen wellen den ain Aurochsen nennen / So ist doch in der maß ain thier / des sy nennen THUR in Latein URUS / des wir Teutschen Bisont / gleichwol unrechtlich nennen / dann dasselb ain rechter Wilder Ox ist / aller gestalt nach / seind gantz guet schwartz / allain am ruckhgrad ainen grablaten strich nach der leng.

 

Die gemain nent den Auroxen /
ich aber den Bisont.

     Der SUBER aber hat khain gleichnuß mit dem Oxen das haubt khurtz / ain gar praite stiern / die hörner weit ausgeworffen / und dan wider hertzue / zu der wehr oder khampff gericht / man hats so groß gefunden / das jr drey grosser mannen entzwischen sitzen mügen / so sein die hörner khürtzer und dickher / und ist der Suber vornen vil höher weder am hindern thail / vornen mit langem haar / auch undter der khin / als partet / und am kamp auch langhärig / hat ain grobs herts haar / nit so schön schwartz als der Thur / darumb acht ich der Suber sey der Bisont / wie der auch in Latein genent wirdt / das ander Thier der Thur des namen sich mit Lateinischen und Moscovitischen sprachen vergleicht. AUR oder UROX sey / wie dan in Schweitz das ort Uri genant / desselben Thiers khopf auch Schwartz mit gleichen Oxenhörnern füert.

 

Die gemain nent den Bisont /
ich aber den Aurox.

     So man den Suber jagt / stelt man Personen an die Pam ainer gleichmässigen größ / die nit zu dün noch zu dickh sein / wan dan die hund die jagen / und ertzürnen / So tritt ainer neben des Pam herfür / und schreit lu / lu / lu / dan laufft er den zue der tritt hinder den Pam am furlauff / sticht der mit dem Spies / der wendt sich herwider / understeet den vom Pam zu bringen / darumb mueß der ain gelegnen Pam haben / wan das mit der scharphen zungen sein khlaid begreifft und bekhumen mag / ist der gewiß todts aigen / wan sich schickhen khan / gibt dem vil stich / der es vill ehe es felt erdulten mag / so der aber müed wirdt / mag sein rottes huettl von sich werffen / so wuet das Thier in huet / der ander so auch an ainem Pam gestelt / gibt sich wie der erst herfür / dan so laufft es den selben an / mit solcher mas felt man das Thier man sagt das es Roß und man in alle höhe seiner sterckhe nach würfft.

     LOSS ist auch ain Thier / nit allain in Litten / sonder auch in Preyssen und Reyssen / das wier Teutsche ELLEND nennen / in der Latein vermainen / etliche als Poln sol ONAGER haissen / der nam hievor ain wald oder wilder Esl verteutscht wardt / das ist nit / dan dasselb umb der gespalten khloen und hörnern willen nit sein khan / es ist bey mein zeitten aines gefangen worden / mit gantzen oder ungespaltnen khloen Aber ander wöllens ALCES achten / ist meines achtens auch nit / dan Alces sollen sich nit mügen legen / weil die wie davon geschrieben ist khain gengig glyd haben / da findt man das widerspil / den sy haben alle glider wie die Hirschen / des khloen praucht man für den hinfallenden Siechthumb / es ist resch / laufft aber nuer den Zellt.

     Wilde Pherdt find man auch / die nimmer zu der arbait mügen ertzogen werden / der gemain man isst die / seind gemainclich alle falb / mit Schwartzn strichen nach dem ruckhen.