Des grossen Alexander altärn wievil darvon geschrieben ist worden / hab ich gar nichts khunnen erfragen / das doch nur ain antzaigen darvon gesehen möcht werden / Der halben ich vil mit denen / die derselben ort offt umbgeraist sein / geredt und gefragt hab / die weder gesehen oder davon ye gehört hetten / geantwort / Es ist ain wasser genant der clain Tanais / da derselb drey tag raisen ob Asoph in den rechten Tanais felt / sagt man wol von etlichen Märbelstainen Seuln und Pildwerchen / so an dem ort genant WELIKI PREWOS zu den heilligen pergen genent sollen sein / Der clain Tanais entspringt in dem Land Severa / darumb wirdt er genant SEWERSKI DONETZ.

     So dan die von der Mosqua nach Asoph raisen / faren zu Donco uber / und wenden sich etwas gegen dem Aufgang / Darumb wan ain Liny von dem ursprung zu dem gmund des Tanais getzogen wurde / möcht man sagen / das die Mosqua in Asia und nit in Europa läge.

     MSCENEK ligt an ainem gemösigen ort / ist gleichwol ain Schloß da gestanden / als man an etlichen uberbleiblingen sicht / Es haben auch neulichen etliche leut in clainen hütlen da gewont / die jr flucht in der veindts not in das gemöß genomen / aus der Mosqua daher zeucht man in Mittentag ungeverlichen sechtzig meyl. Von Tula seind bey dreissig meyl / OCCA das namhafft wasser entspringt von Msceneckh bey achtzehen meyllen / das nimbt sein lauf / Erstlichen in Aufgang darnach gegen Mitternacht / und fürt wider in Sumer Aufgang / wie sy sprechen / und beschleusst den Msceneckh nahend rund umb / und an dem selben fluß / sein vil Stet als Vorotin / Coluga / Cirpach / Corsira / Columna / Rezan / Casinowgorod / und Murom / und felt under nidern Neugarten / in die Wolga / und hat vil wälder an baiden ortten / darauß man vil Hönig / Feech / Härml / und Märder bekhumt / Alles Ertrich das diser fluß beruert / ist fruchtbar in sonderhait vil visch / die Edler dan khainer in der Moscoviter gepiet sein / unnd sonderlich die umb Murom gefangen werden / man findt auch darinnen visch BELUGA genant / vasst groß / haben auch khain pain / nur kruschpeln / wie die Hausen / ain grossen kopff und maul wie ain Schaidn / die man an etlichen ortten Waller nent / darnach auch STERLED, SEWRIGA, OSSETER die drey geschlecht möchten sein als Styerl / Schuerggen / unnd Tückh / Darnach BIELA RIBITZA das ist weiß vischl / hat gar khlaine liechte wie silberene schieppen / ist vasst ain guetter visch / man vermaint die alle khumen aus der Volga / und in die VOLGA aus dem Moer / ausserhalb der weissen vischl.

     Aus dem ursprung der Occa solln noch zwen flüß außfliessen SEM und SCHOSNA. Der Sem rind durch das Land Sewera / und fürt neben Potiwlo felt in die DESNA / die aber neben Ctzernigo / und darnach under Chiow in den Nieper / Schosna aber eylt gerad dem Tanais zue.

     CORSIRA ligt am gestat der Occa / Sechs meyl oberhalb Columna / die Stat hat zuvor ainen aignen Herrn gehabt / ist fürgeben worden / als wäre dem Basilio angetzaigt / derselb Herr stelte im nach seinem leben / Darumb ervordert jne der Großfürst / auf ain geiadt ist der guet Herr durch ainen beret worden /das er bewertter zu dem Fürsten khumen ist / aber für den Fürsten nit gelassen worden / Sonder Michael des Georgen Sun des Fürsten Secretari / hat den in das nächst Stätlen Ctzirpach mit sich genumen / und bevolhen sich außtzuthuen / hat jme der Secretarj ainen Trunckh bracht / nach jrem brauch umb des Fürsten gesund / Der hat pald verstanden / wie sein sach ain gstalt würd haben / begert aines Briesters / und den Trunckh angenumen / pald gestorben / Dermassen hat der Großfürst auch CZIERPACH so acht meyl von Corsira / uberkhumen / daselbstn seind Eysnene Berckhwerch in der ebne.

     COLUGA ain Stat ligt an der Occa / und Sechsunddreissig meyl von der Mosqua / von Ctzirpach viertzehen / da macht man schönes holtzwerch / Schüssln / Trinckhgeschier und dergleichen / von dannen fürt mans in die Mosqua / Litten und andere ort / da helt der Fürst Järlichen seine leut / wider der Tattern einfal.

     WOROTIN das Fürstenthumb / Stat und Schloß aines namens / drey meyl oberhalb Coluga / nit ferr von dem gestat des fluß Occa gelegen / dasselb Fürstenthumb hat hievor besessen Khnes IWAN WOROTINSKI ain streitparer und des Khriegs geübter Man / durch den der Großfürst Basilius vil Sigs von sein Veintn erhalten hat / im 1521 Jar.

     Als der Tatterisch Khünig von Precop sich uber den fluß Occa mit seinem hoer gegen der Mosqua begeben / wie hernach darvon gesagt wirdt / und den Demetri Khnes Bielskj / ainen jungen wider den Tattern mit seinem Hoer gesant hette / der den Khnes Worotinskj / und die andern eltere veracht. So pald die veindt sich dißhalb des wassers sehen liessen / sich in die flucht begaben / und so man erkhündigung hielt / wer solcher flucht ursacher ware / gieng alles antzaigen auf Khnes Andreen des Großfürsten brueder / Nichts minder muesst Khnes Worotinski die schuld und ungnad tragen / ja dartzu gefangen worden / jme auch sein Fürstenthumb genumen / und sich verpinden muessen / von der Mosqua nit zu verruckhen / wir haben den noch datzumal daselbsten gesehen.

     SEVERA ain Großfürstenthumb darin ist der gewesnen Fürsten gesäs NOVOGRODEK gewest / aus der Mosqua zeucht man gegen Mittag / doch wol zu der rechten hand / durch Coluga / Worotin / Serensko und Bransko / hundert und fünfftzig Teutsch meyl / geraicht gar an Nieper / nach der braidt / hat vil oden / zu Branskj ain vasst grossen wald / In dem selben land sein vil Schloß und Stät / Staradub / Potiwlo / Ctzernigo / seind die namhafftigisten / ain fruchtpar Ertrich und reich von Hönig / Harmln / Fechn / und Mardern / das volckh ist aus täglicher ubung gegen Tattern geschickht zu khriegen.

     Der Basilius des Hannsen Sun / wie der andere Fürstenthumber / Also auch dises under sich bracht / Es sein zwayer Brueder zwen Sün gewest / der ain hat sein zuenamen gehabt SEMETZITZ hat hof gehalten zu Novogrodek / der ander zu Staradub / zu Potiwlo saß ain ander Fürst DEMETER.

     Der Basilius Semetzitz war ain Kriegsman / den auch die Tattern seine Nachpern forchten / Der wolt ain ainiger Fürst sein / veriagt sein veter Basilium von Staradub / darnach den Demeter mit andern lisstn angriffen / bey dem Großfürsten angeben / als wolt der von jme abfallen / Darumb befalch der Großfürst / jme dem Semetzitz / das er DEMETRIUM fahe / und jme zubringe / den hat er an einem geiadt zugeeilt / und zuvor etliche pferdt fuer geschickht / wo Demeter die flucht zu hauß näme das sy dem undter augen khämen / und fiengen / Ist also gefangner in die Mosqua gefuert / und in gefenckhnuß gelegt worden.

     Desselben Demetri Sun / uber solche beschwärung und unrecht / ist zu den Tattern geflohen / ob er sein Vattern rechn möchte / hat sich beschneiden lassen / In dem hat sich der selb sein Sun in aine verliebt / und weil er die anderst nit gehaben möcht / hat die wider jrer Vatter und Muetter willen haimlich empfiert / Des haben seine diener / die sich mit jme beschneiden lassn / der empfierten freundtn angetzaigt / die haben jne in der nacht uberfallen / und sambt dem weibspild aus handtpögnen erschossen / wie der Großfürst des entweichen erindert / umb sovil beschwärlicher / hat er den Vatter halten lassen / aus dem und wie der seines Suns Todt vernumen / ist er pald gestorben / jm 1519 Jar / des ist der Semetzitz ain ursacher gewest / wie auch vor mit des Herrn zu Corsira / und seinen Brueder / die baide in Fancknussen gestorben / Er Semetzitz ain anschifter was / so khumt offt in gleichen fällen / wie ainer andern Netz fürspant / das er eben gleich in solche fallen thuet / des dem Semetzitz auch zuegestanden ist / dann man ain gleiche ursach gegen jme gefasst / und ist betzichtigt worden / als wolt er vom Großfürsten / abfalln / ist etliche mal ervordert / aber nit khumen wöllen / er hette dan ain versicherung und glaidt / mit des Großfürsten / und mit des Metropolitn geschwornen Aydn bekhrefftigt / auf dasselb ist er am achtzehendten tag Aprilis / im 1523 jar ghen der Mosqua khumen der ist im anfang erlichen emphangen auch begabt / aber wenig tag darnach gefencklich eingesetzt worden / da er dan zu unsern zeitten noch gesessen ist.

     Die ursach seiner fäncknuß hat man fürgeben / Er hette brief an Khünig zu Poln geschrie ben / darin er sich erpotten hette zu jme zu fallen / die selben Brieff sol er zu dem Haubtman zu Chiow geschickht / derselb die eröffnet / und dem Großfürsten ubersendt haben.

     Ain andere ursach sagen andere die glaublicher ist / weil khain Fürst mehr im gantzen des Großfürsten gepiet gewest ist / der ainigerlay bevestigung hette / dan der / damit dan der auch hingenumen / und des Großfürsten Herrschafft dester sicherer wäre / ist das dermassen erdacht worden / dem macht auch ain glauben ain Schalchsnarr / der mit denen / so dem Semetzitz entgegen geritten / auch mit gangen / ainen poesen und schaufl mit getragen / ye ain heuffl zusamen gekhert / und mit der schaufl vom weg geworffen / So man den fragt / was er doch thette: Gab Antwort / die Mosqua sei zimblich gerainigt / und gekhert / es sei noch ain uberblibne unsauberkhait / ist gleich zeit / das die gar gerainigt werde.

     Dises Fürstenthumb hat der Großfürst Hanns / wie Khünig Alexanders zu Poln Großfürstens in Lithen hoer geschlagen worden / mit ergebung der Fürstn uberkhumen / Die geweßne Fürsten seind von Demetrio Großfürstn in der Mosqua heerkhumen / dann er ließ drey Sün / Basilium / bliebe Großfürst / Andreen unnd Georgen / von denen zwayen waren die / darvon yetzo gesagt ist / heerkhumen / und von jrem aignen Pluet hingenomen.

     CZERNIGO dreissig meyl von Chiow / auch soverr von Potiwlo / dises Potiwlo ist hundert und viertzig meyl von der Mosqua / und von Chiow Sechstzig / von Branskj Achtunddreissig / ligt uber den grossen walt / der Vierundtzwaintzig meyl prait ist.

     NOVOGRODEK Achtzehen meyl von Potiwlo / von STARADUB Viertzehen / Staradub von Potiwlo dreyundtzwaintzig.

     Aus Potiwlo ghen Procop so man Lateinisch TAURICAM nent / raist man durch wildnussen / uber die Flüß SVA [SNA], SAMARIA und ARIEL / die letzten zwen / seind praiter und tieffer / offtermallen werden die raisenden / die sich an den pächern saumen uberfallen.

     Nach denen khumt man an die flüß KOINSKA WODA und MOLOSCHA daselbstn haut man von Paumen Esst und werden in puoschen gepunden / darauf legen sy die leyth mit jrer haab / und lassen sy abrinnen / mit etlicher hilff / damit sy an das ander gestat rinnen / Etliche pinden solche puschn jren pferdtn an die schwäntz / und treiben die in das wasser / schwimendt ziehen sy die mit jnen uber.

     UGRA ain tieffs wasser loettig / nit ferr von Drogobusch / entspringt in ainem wald / zwischen Coluga und Worotin / felt in die Occa / vortzeit was die Granitz zwischen Lithen und Moscovitter gepiet.

     DEMETRIOWITZ Schloß und Stat zwischen Mittentag und Nidergang / Achtzehen meyl von der WIESMA / von Worotin bey Zwaintzig meyllen.

     SMOLENSCO ist ain Schloß und Stat / des so nit eingefangen ist / haisst man die Stat / was aber eingefangen / wie dann Smolensco ain grossen Platz / mit vil heusern eingeschlossen / mit holtzwerch und mit stain und Erttrich außgeschüt / nennen sy GOROD des nach gmainer Windisch ain Schloß / aber nach jrer deittung was bevestnet ist / als umbtzeint / verstanden wirdt / ist ain Fürstenthumb / und Bischofflicher stuel / ligt an dem namhafften wasser Nieper / auf Latein BORISTENES, Solich Schloß ligt vom wasser uber sich nach ainem Pühl / und oben auf dem pühl unser Frauen gemaurte Khirchen / das ander alles hültzen / umb das Schloß ist ain grabm / nit vil uber khme tieff / darin seind steckhen geschlagen / wie in Osterreich weingartnen / allein das die steckhen khürtzer / sterckher / und enger geschlagen sein/ damit sy den anlauff zu verhuetten vermainen / Basilius wie vermelt / hat das mit gewalt nit mügen gewinnen / aber mit ubergeben der dienstleut zu handen bracht / was man aber die Stat haisst / seind vil heuser uber das wasser zwischeu Püheln / neben der Stat / sicht man etliche vil gemeuer stehn / da zuvor Clöster gewest sein / Dasselb Fürstenthumb ligt zwischen grossen wäldern / daraus man auch gefül und sonderlich vil guets hönig hat / von Smolensco ghen [D]obrowna [statt klein iO] seind die wälder vasst mit Linden besetzt / darvon die Peyn oder Imen jre narung nemen / und gar guet hönig machen / als man aus der Mosqua nach Smolensco raist / ist der weg zwischen Mittag und Nidergang / khumbt man ghen MOSAISCO ain Stat achtzehen meyll weitter / Sechsundtzwaintzig meyl ghen WYESMA und furt achtzehen meyl gen drogobusch / und wider achtzehen ghen Smolensco / also das achtzig meyl bringt / Wiewol baid Litten und Moscovitter sagen von hunderten / ich bin aber den weg dreymal geraist und nit mer gefunden.

     Dises Fürstenthumb hat Witold oder Witowd (man findt die baide namen) geborner Großfürst in Litten / ainem Basilio / der hinnach sein tochter nam abgewunnen / hat im 1413 jar / diser Basilius hat das wider erobert im 1514 jar am dreissigisten tag Julij / zu den zeitten Khünig Sigmunds in Poln / und Großfürsten in Litten.

     DROGOBUSCH und Wießma / Schlösser und Stät hültzen / baide am Nieper gelegen / seind vortzeitten auch undter Litten gewest / nit ferr von Wießma rint ain Pach / desselben namen etwo zwo werst von der Stat felt in Nieper / daselbstn lädt man die Schif an / und nach Smolensco / von Smolensco wider daselbstn hin / als auch unsere guetter jüngstlichen hinauf / und wider abgefuert sein worden.

     MOSAISCO ist auch ain Stat und Fürstenhof / alles hültzen / dahin hat der Fürst järlichen sein lust und hetz gehabt / sein gar vil Hasen manicherlay farben / der ich nie dermassen gesehen hab / zu der zeit / als wir jungstlichen fridens halber gehandlt / und umb die Littischen Potte geschickht / ist der Großfürst dahin gen Mosaisco getzogen / und fürgeben / welle die Litten in sein Haubtstat nit lassen / uns auch dahin ervordert / und daselbstn den anstand beschlossen / uns zu baider seitten abgeferttigt / in solcher abfertigung ließ der Großfürst uns fragen / welchen weg wir anhaims nemen würden / Sprechen die Secretarien / Darumb hat der Herr fragen lassen / dan jme sein Khundtschafften von seinen Granitzen khumen / das der Türck zu Ofen gewest ist / wisse aber nicht / was er außgericht hab / Des Mosaisco und noch sechs meyl hinfur gegen der Mosqua ist bey Witold zeytten die Littisch Granitz gewest.

     BIELA ist auch ain Fürstenthumb / mit Schloß und Stat / an ainem wasser OPSCHA genant / zwischen grossen wäldern / mer gegen dem Nidergang von Mittag gewent / Sechtzig meyl von der Mosqua / von Smolensco sechsunddreissig / von Toropetz dreissig meyl / die Fürstn so daselbstn etwan gewont / seind von Gedemin herkhumen / und vor den Litten zugethon gewest / aber zu den zeitten CASIMIRI Khünig zu Poln / und Großfürsten in Litten / sich Basilius der Fürst zu Biella / davon sy genent werden Bielskj / zu dem Hannsen Großfürsten in der Mosqua ergeben / hat und sein jungs weib wie vor gesagt verlassen / sein Sun der eltter / Demetri ist in grossen ehrn bey unsern zeittn gehalten worden / aber das Fürstenthumb behellt der Großfürst / und setzt das in sein Titl.

     RSOWA Demetry ist ain Schloß und Stat / gerad im Nidergang / von der Mosqua dreyundtzwaintzig meyl / das Schloß so auch der Fürst in seinem Titl hat / ligt an dem grossen und nambhafften wasser Wolga / das man in alten Püchern Rha geschrieben findt / hat ain groß weit gepiet / Es ist gleichwol ain andere Rsova / ligt hundert und viertzig meyl von der Mosqua / und von VELIKILUKI zwaintzig / und sovil gen Plesco / die wirdt als öd genant / so man von der Rsova Demetri fürauß gegen Nidergang etliche meyl zeucht / ist ain wald WOLKONSKI genant / daraus fliessen vier nambhaffte wasser / darin ist ain gemöß / das nent man FRONOW Von dem fleusst ain pach / khumbt pald als nahent zwo meyl in ain See genant WOLGO Von dem fleusst wider etwas grösser der pach / und wird also Wolga genant / durch fleusst vil gemöß und See / und von vil andern zufliessenden pächern / wiert groß / rint in Aufgang und felt in das Moer / so die Moscovitter CHWALINSCO und die Lateiner CASPINUM und HIRCANUM nennen / etliche sagen mit Fünffundtzwaintzig / etlich von Sibentzig armen / die Tattern deren Lande er vil durch fleusst / nennen disen fluß EDEL Diser fluß und Tanais khumen an ainem ort auf siben meyl nahent zusamen / wievor gesagt ist / von Fronowo dem gemöß ist ain dorff DNIEPERSKO genant / zu nechst darbey entspringt der NYEPER, Dnyerper genant / der ist den man Lateinisch BORISTHENES haisst / Nahent daselbstn ist ain Closter / zu der heiligen Drivaltigkhait genant / da entspringt ain pach NYEPRETZ, als der khlain Nieper / und ist doch grösser dan der ander / die paide Pächer khumen zusamen / und werden pald schiffreich / und der enden lädt man die schiff mit Kauffmans waarn / so die Moscovitter oder ander Kauffleut von Clopigorod darbringen / und nach Litten fueren / bey demselben Closter haben daselbstn jr gemaine herbergen.

     Das aber Rha oder Wolga und Boristhenes oder Nieper nit aus ainem ursprung khumen / wie etliche davon geschrieben / hab ich von villen Kaufleutten und andern die daselbstn umb gehandlt / und gewandert glaublich befunden.

     Der Nieper hat den lauf am ersten ghen Viesma gegen Mittentag / wendt sich etwas in Aufgang nach Drohobusch / Smolensco / Orsa / und Mogilew / khert sich dan wider in Mittentag / nach Chiow / Circassen / Otzakhow / und fellt dan in das schwartz Moer Lateinisch PONTUS genant / wie der das Moer erraicht / erprait sich / als wäre es ain See / darumb jr vil betrogen sein / die gesagt haben / der fiel in ain See wie hievor gesagt / Als wir von der Orsa ghen Smolensco khumen sein / daselbstn wir unsere sachen auf ain schiff geladen / das uber sich triben / hintzt nahent zu der Wiesma / wir aber in Osterfeyern zu Smolensco außgetzogen / Nach dem der schne zergangen / seind die wasser vasst groß worden / also das bey ainem Closter / an ainem clainen vischer Zillelen ain Münich den Graffn und mich am ersten durch die wälder so vol wasser worden / ferr widerumb zu der Strassen gefuert / da wir gewartt / hintzt unsere Sätl und dergleichen an dem selben Zillelen nacheinander bracht sein worden / Die pferdt aber drey oder vier mal von ainem Pühl zu dem andern schwemen muessen / dan derselben ende khumen vil Pühl nach der leng / gegen dem Nieper und albeg zwischen zwayen Pühln rint ain Pächl / die seind aber so groß worden / dan sich der Nieper hinein geschwelt hat / dardurch muessten unsere pferdt schwimen.

     DWINA ist ain See als zehen meyl weg / von des Nieper ursprung / und sovil von Fronovo / daraus entspringt ain wasser desselben namens / khert sich in Nidergang / rint auf Zwaintzig meyl von der Wilde hin / darnach khert es sich in Mittenacht / und bey Riga d'haubtstat in Leiffland felts in das Teutsch oder Leifflendisch Moer / das die Reissen Waretzkhoye nennen / fleusst neben VITEPSCO und POLOZKHO Khumt nit gen Plesco / wie ainer geschrieben hat / sonder für Dunenburg (gehört den Leifflendern) und hat den namen von dem fluß / den sy DUNA nennen / an dem fluß bin ich erster raiß mehr dan zwölff meyl im schlitn nach Polotzko ubersich gefarn / an ainem ort gefunden / da die praite des wassers plos on Eys gewest ist / allam das örtle daran die strassen getriben worden / davon erhertnet / hat sich noch zwischen baiden obern und undtern Eys gehalten / auf Fünff schriet lang ungeuerlichen / die praidt ist sovil die gemainen schlitten begriffen / darüber bin ich mit allem gesind nit on sorg khumen / Gott lob.

     LOWAT der viertte fluß / ist den andern nit gleich mit d[er] grösse / entspringt zwischen dem See Dwina / und Fronowo / oder doch aus dem selben gemöß / hab des aigentlich nit erfragen mügen / nach dem fluß wie die Reissen schreiben / sol Sant Andre wie der nach dem Nieper oder Borsthenes auf zu desselben ursprung khomen / ab nach groß Neugartten gefaren sein / wan der bey viertzig meylln geflossen / khumt gen Velikhilukhj / und darnach weitter in den See Ilmen oder Ilmer WOLOKHI Stat und Schloß zu mitten Nidergang vierundtzwaintzig meyl von der Mosqua / von Mosaisco bey zwölff / von Twer Zwaintzig / in des Fürsten Titl wirdt das Fürstenthumb auch benent / hat järlichen seinen lust daselbsten / mit Valckhen hetzen.

     WELIKILUKI, Schloß und Stat in Nidergang der Sunnen / von der Mosqua Hundert und viertzig meyl / von groß Neugartten bey sechtzig / von Polotzkho Sechsunddreissig meyllen / daheer nimpt man auch ye den weg aus der Mosqua in Litten TOROPETZ, Schloß und Stat / zwischen Smolensco und Welikhilukhj gegen den Littischen Granitzen / achtzehen meyl von Welikhilukhj.

     TWER oder OTWER, ain Großfürstenthumb / hat etwan weitte gepiet gehabt / ligt an der Volga / von der Mosqua sechsunddreissig meyl in Sumer Nidergang / das Schloß ist hültzen an dem gestat gegen der Mosqua / und die Stat und andere vil heuser stehen an baiden gestatten / gegen dem Schloß uber / felt ain fluß darein / genant TWERTZA, Nach dem selben bin ich in erster meiner raiß / in die Volga geschifft / Den andern tag darnach in ain grösser schiff gesessen / der mainung etliche meyl nach der Wolga abtzufarn / als wir aber nit gar ain meyl gefarn waren / Ersahen wir an ainer umbraib das Eys noch gantz von ainen gestat zu dem andern wir muessten mit grosser muehe und arbait / die grossen dickhen Eys stuckh / die am gestatten lagen aufwegen / und hin rinnen lassen / damit wir zu Landt khamen / und austratten / giengen zu ainem Closter Sant Helias / bliben etliche stundt / hintzt man uns pferdt zu wegen bracht / Es hat auch das Fürstenthumb sein Bischove / der nägste Fürst alda was Boris genant / desselben Tochter Maria / nam des Großfürst Hanns des Basilijvatter / sein erste gemachl darvon er auch seinerst gebornen Sun Hannsen uberkhamb / von dem dan der Demeter geborn wardt / davon hieoben meldung geschehen / So derselb Boris starb / verließ ain Sun Michael / pald hat jne sein Schwager veriagt / und das Fürstenthumb genumen.

     TERSAK ain Stätl zehen meyl von Twer / ist halber thail under dem gepiet Großneugarten und halber thail undter Twer etwan waren zwayerlay Ambtleut da / So entspringen daselbsten zwen pach / der ain SNA zum Nidergang der ander TWERCZA in Aufgang fliessend.

     NEUGARTN das groß / da vor zeitten die Reissischen Fürssten jren Stuel und hoffhaltung gehalten / und haisst Reissisch Novigorod das ware Neustat oder Neuschloß / dan wievor gesagt / was eingefangen / oder vervestnet ist / haissen sy Gorod / ist ain grosse weitte Stat / gleichwol nur ain thail eingefangen / dardurch fleusst das wasser WOLCHOW des auß dem See Ilmen khumbt zwo wersst oberhalb der Stat entspringt / ist Schifreich / und felt in ainen See von alter genent NEOA / jetzo aber nach dem Stätl so darbey ligt / nent man den auch also LADOGA / da her raist man von der Mosqua / in Sumers Nidergang und man rait hundert und zwaintzig meyl / ander nur hundert / ligt von Plesco Sechsunddreyssig meyl / und von Velikhilukhi viertzig / von Iwanowgorod auch sovil / als viertzig / dieweil die Stat in jren Freihaiten gewest ist / het ain groß weit gepiet / das maist in Mittenacht / und Aufgang der Sunnen / in funff thail gethailt / Also das ain jeglicher thail sein sonderliche Obrigkhait in der Stat gehabt hat / dabey sy recht und beschaid in gemain und sondern sachen genumen / von denselben Obrigkhaiten oder Magistrat / ist khain dingnus weitter gangen / der zeitten seind grosse gewerb und niderlagen der Khauffleut von allen Landen da gehalten / davon sy auch reich worden.

     Es seind der zeit Ich da was Teütscher Khauffleut handler oder Factores gewest / die haben ainen Schlittn den ich von Augspurg dahin pracht von mir erpetten zu ainer gedechtnuß / den in die Khirchen zu setzen / Ire anrainer waren Leiflender / Finlender / und auch an andern meer ortten den Schweden zuegehörig / darnach auch die Nordweder / Sy hettn auch Fürstenthumber under jnen gegen Aufgang / als Dwina und Wolochda / in Mittentag Tersackh / wiewol solche Fürstenthumer und Land von wegen vil Wälder und gewässer nit wol besetzt mügen sein / So haben sy doch grossen genieß von Wildprät / raucher waar / hönig / wachs / und vil Vischen.

     Die fürgesetzten Regierunden personen daselbstn / haben jre Nachpern mit allem fleiß zu jrer freundtschafft unnd guettem willen getzogen / auch mit grossen gaben uberkhumen / als jre beschützer / aus dem ist ervolgt / das sich die Moscoviter berüemen / als hetten sy jeder zeit jre für gesetzten Obrigkhaiten bey jnen / den Neugartnern gehalten / die Litten sagen die wären jre Tributarij oder dienstbare gewest / ein Ertzbischof hat ain zeitlang da grosses ansehen gehabt / und vasst Regiert / hat der Großfürst Hanns den Khrieg siben jar wider sy gefuert / darnach im Herbst Monat des 1477 jars an dem wasser Scholona sy geschlagen / haben sy sich mit etlichen Conditionen oder beschaidenhaiten jme ergeben / und ain Stathalter darein genumen / da aber der Großfürst / noch nit völligen gwaldt uber sy hette / und solches on waffen zu bekhumen nit verhoffte / hat er den weg erdacht / und für geben / Sy die Neugartner wolten ain newen glauben an sich nemen / und ist mit seinem hör dahin khumen / als wolt er sy im glauben erhalten / unnd damit in die Stat khumen / sy in die ewige dienstperkhait genumen / den Ertzbischof / Burger / Khaufleut und außlender gantzlich beraubt / wie Ich von vilen vernumen / mehr dann dreyhundert wägen mit Gold / Silber / Edlgestain und khöstlichen sachen und anderm geladen / den Ertzbischoff und Burger auch mit in die Mosqua gefüert / jre heüser andern zu bewonen geben / sy die Burger in der Mosqua behalten / und jme ain groß einkhumen gemacht / Ainen neuen Bischoff dahin gesetzt / dem er ain khlains von dem einkhumen verordent.

     Nach desselben todt / ist das Ertzbisthumb lang on ain Bischove gestanden / darnach auff der Burger und gemain bit / wider ainen dahin geschickht.

     PERUN ainen Abgot also genent / haben die Neugartner vor zeitten gehabt / an dem ort / da yetzmals ain Closter steet / das noch den Namen darvon hat Perunskhi / Als sy aber den Tauff angenumben / haben sy den Abgot in das wasser Wolchow geworffen / sagen sey uber sich gerunnen / und bey der Pruckhen sol man ain solche stimb gehört haben / habt euch jr Neugartner zu meiner gedechtnus / und sey ain prügl auf die Pruckhen geworffen worden / begibt sich noch ye im jar das ain stimb oder geschray gehört wirdet Perun / Perun. So laufft die gemain zusamen / und schlahen mit prügln und feustn aneinander / und wirdt ain gantzer auflauff / das die öbersten mit müehe stillen müssen.

     In jren geschicht schrifften findt man das die Neugartner sollen in Griechenland gezogen sein / Corsun siben gantze jar belegert / Ire weiber sich jrer mannen nimmer getröst / haben jre Khnecht zu mannen genumen / Als aber Corsun gewunnen / und die mannen wider haim gezogen / haben sy Khupferene thür und glockhen mit sich als zaichen jres sygs bracht / solche thür steet jetzo an jrer Khirchen da zu Neugarten die sy mir gezaigt haben / Die glockhen sol in dem Khirchthurn hengen / Die Khnecht haben jre Herrn zu veld emphangen und geschlagen / Sol ainer zwischen den Herrn den Rath geben haben / das man nit mit der wehr / sonder mit prügln und gaysln gegen jren Khnechten ziehen soll / so werden sy der alten dienstperkhait gedenckhen / und darob verzagen / das auch also geschehen / die Khnecht geflohen / und auf ain Stat die heuttigs tags obgleich wol khain bevestigung daselbstn mer ist CHLOPIGOROD genent wirdt / (als khnechts Schloß oder Stat) khumen / daselbst uberwunden und jämerlichen getödt.

     Die weiber sich selbs erhangen.

     Der lengste tag zu Großneugarten im Jar / hat Achtzehen stund und meer / ain vasst khalts ort meer dan in der Mosqua / sol ain Eerlichs unnd gar menschlichs volckh daselbstn gewest sein / Es ist aber vermischt worden.

     ILMEN der See den man in den alten Reissischen püechern oder schrifften Ilmer genent findt / Etlich der Lateiner nennen den Limidis See / ligt zwo wersst ober Großneugarten hat in die leng zwelff in die prait acht meillen / darein fliessen zwen namhaffte ausser der andern khlain flüß Lovat unnd Scholona dieselb khumbt auß ainem andern See / Auß dem aber Ilmen fleusst nur ain fluß die Wolchow durch Neugarten und furt Sechsunddreissig meyl / felt dann in Ladoga den See / wie oben geschriben ist / Derselb Ladoga sol sein nach der lenge hundert / nach der prait sechtzig meyl / hat gleichwol etliche plosse flegkhen und werden darinn / auß demselben fleusst ain groß wasser Neoa genant / gegen dem Nidergang / und felt dann in das Leiflendisch oder Finlandisch Moer / im einfal daselbstn hat Moscoviter ain Schloß nach seiner sprach ORESCHAK und auf teütsch Nitenburg / genent.

     RUS ain alt Fürstenthumb etwan alt Reissen genent / ain Stätl under dem gepiet Neugarten / und zwelf meyl davon / von dem See aber dreyzehen meyl / hat ain gesaltzen wasser das die Burger in ain grueben zusamen bringen / wie ain Teicht / von dan lassen sy solch wasser durch Rörn in jre heuser und sieden das Saltz.

     IWANOWGOROD hat der Großfürst Hanns nach seinem namen genent / und erpaut an dem gestat des wassers NERWA und ist gemaurt / Gegen dem schloß uber auch am gestat ist der Leifflender Schloß / nach dem wasser Nerwa genent und dasselb wasser ist das geschaid der zwayer Herrschafften / Der fluß aber Nerwa khumbt auß dem See / den sy nach jrer sprach Zutzkho oder Czudin nennen / Lateinisch BICIS oder PELAS / die Teutschen Peyfueß / darein khumen zwen flüß die Plesca und Velikhareca der von Mittentag heerkhumbt / fleüsst fur OPOTZKA, da ich die erst Prugkhen am wasser ligund ubertzogen bin / lasst Plesco die Stat an der rechten hand / man mag von Plesco / nit gar in das Moer faren / dann es hat hohe felsen / und hohe faal im wasser nahendt bey Iwanowgorod.

     PLESCO welches sy auch PSKOW nennen ain namhaffte Stat / ligt an ainem See auß demselben khumbt ain wasser des namens wie die Stat fleusst / mitten dar durch / und dan sechs meyl in dem See Zutzkho genant / das ist die ainige umbgemaurte stat in allen des Moscoviter gepiet / und ist in vier abgesunderte örter getailt / darumb jr vil gesagt die Stat hette vier Maurn umb sich und hat vor zeitten gehaissen Pskow und OBSKOW / ain groß gepiet gehabt / und ain freye Stat gewest / Aber der Hanns Großfürst im 1509. jar durch etlicher geistlicher ubergeben / eingenumen / und die Glockhen damit sy der zeit was den gemain nutz zu betrachten dem volckh zusamen geleit / hinwegkh gefürt / und sy in ewige dienstperkhait bracht / die Inwoner darauß genumen und außgethailt / Die Moscoviter an jrer stat darein gesetzt / und damit die sittigkhait / menschait und guette sitten gantz verendert / sy sein hievor der erwerkhait gewest / mit wenig wortten jr sachen beständigclichen gehandlt / khain waar uberpotten / sonder mit ainem wort verkhaufft / und khaufft / Die ubrigen in der Stat halten noch die manier mit dem haar am hiern außzuthailn und khainen schopff zu machen / Die Stat ligt von Großneugarten in Nidergang / sechsunddreissig meyl / von Iwanowgorod viertzig / auch sovil von Welikhilukhi von dannen und der Mosqua hieheer ist der weg geen Riga in Leiffland noch sechstzig meyl.

     WOTZKHA ain gegent zwischen dem Nidergang und Mitternacht / von Neugarten Sechsundzwaintzig oder dreissig meyl / und lasst Iwanowgorod an der lingkhen seitten / ist die gemain sag / was viech in dieselb gegent khumbt / das wirt weiß.

     Alhie wil ich die Stet und flüß am Moer von hie auß / hintzt an Schweden erzellen.

     NERWA der fluß wievor gesagt / ist die Gränitz zwischen der Leiflender unnd Moscoviter. Nach dem gestatt des Mores von Iwanowgorod in Mittenacht raisend khumbt man an PLUSSA das wasser / wie des in das Moer felt / Ein Stat IAMA genant zwelff meyl von Iwanowgorod von der Jama gleich sovil / dann furt auß auf vier meyl ist der fluß und Stat aines namen COPOROYA genant / hinach sechs meyl zu dem fluß Neoa / und dem Schloß Oreschackh / Von disem Schloß zu dem fluß darvon auch die Stat den namen genumen / CORELA, siben meyl und meer zwelf meyl zu dem wasser POLNA / des gibt das gemerckh zwischen dem Moscovitern und Finlendern / des die Moscoviter nennen CHAINSKA Semla / ist ain stugkh von Schweden gepiet.

     CORELA ist ain grosse Land gegendt (und nit die davon vorgesagt) hat sein sundere sprach / bey Sechstzig meyl von Großneugarten in Mittenacht / und wiewol die in derselben gegendt von etlichen andern umbsassen Tribut einnemen / Nichts minder so geben sy auch Tribut dem Khünig in Schwedn / auch dem Moscoviter / als dem herrn zu Großneugarten / etlich nennen dises land Carela.

     SOLOWKI ist ain Innsl gegen Mitternacht / zwischen den Lendern Dwina und Corela / und ligt vom Land im Moer acht meil / wie ferr die von der Mosqua sey / ist mir nit müglich gewest zu erfragen / weil sovil öder wälder / gemöser und unschickhligkhaiten des Landts der ortten ist / gleichwol nach gemainem bedunckhen sollen drey hundert meil sein / aber von Bieloyesero zway hundert / man seut vil Saltz daselbstn / darin ist ain Closter / darein sol khain weib geen / Grosse vischerey der visch den sy Szelgi nennen / acht man seien Häring / sagen auch das die Sun daselbsten in khurtzen tagen nit meer dann zwo stund scheindt.

     DIMITRIOW, Schloß und Stat von der Mosqua in Nidergang sich etwas naigent in Mittenacht zwölff meil / dasselb was des Großfürsten Brueder Georgen außgetzaigt / zu seiner underhaltung / das wasser daselbstn haisst IACHROMA, und fellt in SEST / der Sest in die Dubna / und die in Wolga / von solcher der wasser bequemligkhait / handlen die Kaufleut die selb strassen / dan sy bringen jre waarn gar von Chwalinsco moer am wasser daheer / und furtter in weittere Landt.

     BIELOYESERO haisst der weiß See / Stat und Schloß an dem See / desselben namens / die stat ist nit im See wie etlich geschrieben / aber seindt sovil gemöser darumb / das man die ungewindlich acht / darumb sagt man die Großfürsten behalten jren schatz / und haben jr letste zuflucht daselbsten hin / ligt von der Mosqua hundert meil / gleich sovil von Großneugarten / und sein zwen weg von der Mosqua dahin der nechste durch Uglitz winters zeitten / der ander durch Jaroslaw / baid aber seindt durch sovil wälder gemöß / und fluß gantz unbequemb / darumb seindt auch die meil umb sovil khlainer gesetzt.

     Die obern ursachen geben auch / das Stät / fleckhen noch Dörffer der ennden enttzwischen gefunden werden.

     Der gemelt weiß See sol zwölf meil in der leng / gleich sovil an der praidt haben / darein sollen Drey hundert und Sechstzig Pächer oder wasser fliessen / daraus nur ain fluß Schoksna der felt Fünfftzehen meil ob Jaroslaw / und vier undter Mologa in die Wolga / welche visch aus der Wolga in die Schoksna khumen / sovil lenger sy darinn bliben sein / umb sovil sein sy pösser worden / des wissen die vischer / so pald der visch gefangen wie lang der darin gangen ist.

     Die jnnwoner derselben gegent / haben auch jr aigne sprach / gleich wol reden sy yetzmals al Reissisch / der lengste tag bey jnen sol Neuntzehen stund haben / mir hat ain ehrlicher man gesagt / er sey umb die zeit als die paumb und esste das laub herfür gelassen auß der Mosqua dahin geschickht worden / und geritten / biß an die Wolga. So pald er uber das wasser khumen / hat auf der gueten wintterpan sein Raiß mit dem Schlitten gar in die Stat Weissensee volbracht / wiewol der Wintter der ortten lenger / so zeittigen doch die frucht gleich also / das man ungeverlichen zu ainer zeit in der Mosqua und daselbsten das Traid schneidt / von dem Weissensee ain armprustschuß ist ain anderer See / sol Schwebl geben / und der fluß so daraus geet / bringt solchen Schwebl als ai[n] faimb mit sich khunnen aber den nit zu fruchten bringen.

     UGLITZ Schloß und Stat am gstat der Volga / von der Mosqua vierundtzwaintzig meil / von Jaroslaw dreissig / von Twer viertzig / die schlösser yetzo genent / ligen an dem gestat der Volga gegen Mittentag / die heuser der Stat an baiden gestatten.

     GHLOPIGOROD ist ain Platz da hievor ain Schloß oder Stat gestanden ist darein der Neugartner khnecht die jrer Herrn weiber genumen hetten / geflohen waren / ist zwo meil von Uglitz / nit gar ferr davon sicht man das Purgstal / da das Schloß gestanden ist / an dem wasser Mologa / des aus dem gepiet von Großneugarten heer achtzig meil geflossen in die Wolga felt an dem einfal / ist ain stat und Schloß dem wasser gleich genennt / von dann zwo meil an desselben fluß gestat ist ain Khirchen des namens Chlopigorod / darbey ist ain solcher grosser Marckh / der in gantzem Moscoviter gepiet nit ist / da auch Gold und Silber in geschlechtem weerdt wievor auch davon gesagt ist.

     PEREASLAW Schloß und Stat von Mitternacht sich etwas gegen Aufgang kherend / von der Mosqua vierundzwaintzig meyl / ligt an ainem See / darinnen man auch die visch Selgi wie in der Inssel Solowkhi hat / darvon auch oben gesagt / ain wol fruchtpars Ertrich darin auch der Fürst nach dem schnit khumbe zu paissen / In der selben gegendt ist auch ain See / darauß man Saltz seut / daheer ziehen die so nach dem Niderneugarten / Castroma / Jaroslaw / und Uglitz raisen thuen / da hie umb khan man die meyl nit so gleich der grossen und vil wälder und gemöß halben raitten / ist auch ain fluß Nerel der auß ainem See sein ursprung hat / und oberhalb der Uglitz in die Wolga felt.

     ROSTOW, Schloß und Stat / da wont auch ain Ertzbischof der eltisten Fürstenthumber ains / neben Byeloyesero und Murom ausser groß Neugarten / daheer zeucht man von der Mosqua gerad auf Pereaslaw zehen meyll / [l]igt an ainem See darauß laufft Catoroa der fluß der neben Jaroslaw hin / und in die Wolga rinnt / ain fruchtparer podn / reich an Vischen und Saltz / vor zeitten ist dises Fürstenthumb des Großfürsten gebrüedern verordent gewest / des seind sy aber jüngstlichen durch Großfürssten Hannsen entsetzt worden.

     IAROSLAW Schloß und Stat an der Wolga / von Rostow zwelf meyl / den geraden weg von der Mosqua / hat ein guet Ertrich / sonder das gegen der Wolga. Das Fürstenthumb was gleichermassen der Großfürsten gebruedern / erblichen zugethailt / die aber gleichermassen entsetzt / und seind noch dieselben Knesen oder Fürsten / die solche Fürstenthumer erblichen gehabt haben / Der Großfürst aber gibt jnen etliche einkhumen davon / er aber behelt den Titl sambt dem Fürstenthumb und dem mererm einkhumen.

     So seind derselben drey / die auß der Großfürsten gebrüedern khomen seind / der ain Basilius / der hat uns auß unser Herberg zu dem Großfürsten / und her wider beglaidt / Der ander Simeon Pheodorowitz Khurba / von ainem guet also genandt Khurbskhi ain alter nüchter unnd mässiger man / hat sich von jugent also gehalten / nun in vil jarn khain fleisch geessen / Visch aber allain am Suntag / Erchtag und Sambstag / Am Montag aber Mitwoch und Freytag in der vassten aller speiß sich gar enthalten.

     Der Großfürst hat den als ain Haubtman durch groß Permia auff die volckher Juhra oder Jugritzn weitligende Land zu erobern gesant / ainen grossen thail des wegs zu fueß geund volbracht von wegen der grossen Schnee / So die aber zergangen auf den Pächern in schifflein vollendet / Der dritte ist Hanns Khnes Posetzen den hat der Großfürst in Hispanien zu Khaiser Carolen geschickht / und am widertzug ist er zu Ertzhertzog Ferdinanden etc. nachmals Römischen Khünig meinem aller genedigisten Herrn khumen / mit dem ich dann zu seinem Herrn geschickht bin / der ist arm gewest / also das er seine claider und hüetl Kholpackh genant zu der Rayß entlehnen müessen / Darumb hat der größlich geirrdt / der geschriben hat / er möchte seinem Herrn zu yegclicher notturfft mit dreissig thausendt zu Roß auß seinem Erbgüettern dienen.

     WOLOCHDA das Land / Schloß und Stat aines namens daselbsten wonen die Bischove zu Permia / aber nit als herrn / das wasser daselbsten hat auch den namen / ligt zwischen Mitternacht und Aufgangs / daheer von der Mosqua zeucht man durch Jaroslaw / von dann noch fünfftzig meyl / von Bieloyesero viertzig / das Land ist gar gemösig und waldig / Darumben auch die Raisende die meylln nit khünnen außthaillen / der fluß rindt fur die Stat gegen Mitternacht / bekhumbt in Suchana / so auß ainem See Khoinskho genant fleusst / khumen also acht meyl under der Stat zusamen / Die Sachana behelt den namen / unnd rindt zwischen Mitternacht und Aufgang / die Stat was hievor under dem gepiet der Grossen Neugartner / das Schloß ist vesst / darumb der Fürst ain thail seines Schatz da behalten sol.

     VVAGA [WAGA] ist ain fluß vasst vischreich zwischen Bieloyesero unnd Wolochda / entspringt in grossen dickhen wäldern und gemosen / felt in die Dwina / die leüt daselbesten / gebrauchen sich nit des brots / sonder Visch und Wildprät / daselbstn feche man schwartze Füchs / deren pälger man theur verhandlt / dahin durchkhumt man am füeglichisten in das Land / Dwina / Ustyug das Land hat den namen von der Stat und Schloß an der Suchana gelegen / ist hundert meyl von Wolochda / von Byeloyesero hundert und viertzig / Die Stat was hievor an dem gmund des wassers Jug / der von Mittentag in Mittenacht fleusst / von besser bequemblichkhait auf ain halbe meyl uber sich gesetzt / behelt noch den namen Reissisch Ustye / ist aines fluß gmundt / und so man spricht Ustyug als des Jug gmundt / hat auch undter Neugarten gehört / des prodts gebraucht man sich da auch nit / Visch und Wildprädt dartzue Saltz von der Dwina genueg / haben jr aigne sprach / der Zöbl sindt man da nit vil / auch selten guet / aber wol anders gefüll unnd sonderlichen die schwartzen Füchs.

     DWINA das Land und wasser gleich genent / wie man sagt / das wasser habe den namen geschöpfft von zwayen zusamen fliessenden wassern Jug und Schuchana / dann Reissisch Dwe haissen zway / also das man khainem derselben wasser sein namen genumen / sonder genent zwifach oder zway / laufft als bey hundert meyllen / und felt in das Mitternächtisch Mör / des Schweden / Nordweden / von dem Land darvon man sagt und schreibt Engronen Land schaidt / Ich hab nur von ainem gehört / Niemand gesehen / der in demselben Land gewest wär / Dis Land Dwina sol auch geen Neugarten gehört haben / von der Mosqua hintzt das wasser in das Mör felt / sollen dreyhunder meyl sein / gleichwol ungewiß. Auß vorertzelten ursachen / möchten villeicht khaumb zwayhundert sein / dann man rayst auß der Mosqua dahin geen der Wolochda von dan gen Ustyug etwas gegen Aufgang darnach an die Dwina / gerad in Mittenacht / In dem land hat man khain Schloß allain Colmogor und die Stat Dwina / vasst in der mitte zwischen Aufgang und ende dises fluß / Als der aber in das Mör felt ist ain Schloß Pienega genant / andere Schloß und Stet seind nit darin / wol etliche Döffer aber schitter / von wegen des Ertrichs unfruchtparkhait / die ernehrn sich allain der Visch / Wildprädt und von dem gefügl / des gar vil daselbstn ist / vil Saltz haben sy in dem Land.

     Weisse Peern findt man an demselben Mör / sollen auch am maisten im Mör wonen / man bringt der heyt vil von denselben Peern in die Mosqua / Ich hab der etliche mit mir geen Wienn / als ich von erster Potschafft widerkham / bracht.

 

Die Raiß gehn Petzora / Jugra /
und zu dem wasser Obi.

     Des Großfürsten gepiet erstreckt sich verrer in Aufgang / und etwas gegen Mitternacht / auf die örtter wie hernach gesagt wirdt / davon mir ain Reissische beschreibung des wegs oder Rayß zu handen khumen / die ich auch verteutschen hab lassen / und darauß die nachvolgunde Rayß beschriben / Wiewol die so von der Mosqua dahin ziehen / haben den füeglichern weg von Ustyug und Dwina nach groß Permia / als den gemainen weg von der Mosqua gen Wolochda fünffhundert wersst / von der Wolochda nach dem wasser ab / hintzt die Suchana darein khumbt / sein gen Ustyug fünfftzig wersst / dasselb wasser felt undter dem Schloß Streltze zwo wersst in Jug / der von Mittentag heerkhumbt / und fleusst bey fünffhundert werst, So dan die zwen fluß Suchana unnd Jug sich vermischen und ain fluß wirdt Dwina genent Nach derselben Dwina ab / fünffhundert werst geen Colmogor / undter demselben Schloß oder Stat sechs tagraiß nach / felt die Dwina in das Mör in sechs arm außgethailt.

     Solcher weeg oder Rayß wirdt am maisten von Pächern uber sich unnd nach / schiffendt vollendt / dann so man am Land zuge / und uber das wasser Waga / waren von Wolochda hintz gen Colmogor wol Tausendt werst / Nit verr von Colmogor an der rechten seitten von Aufgang / khumbt der fluß Pyenega / und so der sibenhundert werst geflossen / felt in die Dwina / von der Dwina raist man zu ainem ort haist Nicolai / und dan nach dem wasser Pienega ubersich / als zwaihundert werst / darnach zeucht man die schifl uber land als auf ain halbe werst in das wasser Kuluyo genant / dasselb wasser khumbt auß ainem See in Mitternacht auch des namens Kuluyo / von dem ursprung hintzt an sein gmund bey dem Mör seind sechs tagraiß / So dann feert man nach dem gestat des Mörs der rechten hand nach für Stanowische / Caluntzo / Apnu / und so man das gepürg des sich der ortten in das Mör erstreckht / genant Chorogoskhinoß unnd Stanowische / Camenckh und Tolstigkh umbgefarn ist / khumbt man zu dem fluß Metzen / nach dem auff sechs tagraisen / khumbt man zu ainem Fleckhen auch des namens Metzen / da der fluß Piessa darein felt / Nach dem selben widerumb auf nach der linckhen seitten / gegen dem Aufgang seind zwaintzig tagraisen / khumbt man zu dem fluß Piscoya / von dem zeucht man die Schiff fünff werst uberland / so bekhumen zween weeg / der ain zur lingkhen hand / in das wasser Rubicho / von dem in Circho.

     Der ander weg und der nächner / auß dem See gerad in Cyrcho uber gefuert / von dann wo man mit ungewitter nit verhindert wirdt / in zwaintzig tagen mag man zu dem gmunt des fluß Cilma khumen / und dem grossen fluß Petzora / der an dem selben ort zwayer wersst prait ist / Nach dem fert man sechs tagraiß zu dem Schloß und fleckhen Pustoosero / da dann Petzora in sechs arm gethaillt in das Moer fleusst / die Leut der ortten sein ainfaltig / haben den Tauff erst im 1518 Jar angenumen / von der Cilma gmundt zu der Ussa gmund nach der Petzora raisend / seind bey dreissig tagraisen / Ussa der fluß hat sein ursprung aus dem gepürg Poyass Semnoj / der in Sumers Aufgang ist zu der linckhen seitten / und fleusst aus grossen Velsen / des gepürgs / genant Camen Bolschoy / mehr dan tausent wersst / Von d[er] Ussa gmund uber sich / hintzt die Schuchogora einfelt / seind zwaintzig tagraisen / die so den weg oder die raiß beschriben und getzogen / haben gesagt das zwischen Schuchogora und Potzscheriema / der flüssen gmund sy gerast / und bey dem nächsten schloß Strupili / des da an den gestatten gegen Reissen an den gepürgen zu der rechten hand ligt / die speiß oder Profandt die sy mit jnen aus Reissen bracht / gelassen haben / uber die flus Petzora und Schuchogora / an dem Perg Cameni poyas bey dem Moer und Inssln / und bey dem Schloß Pustoosero seind manigerlay und villerlay Völckher / die man mit ainem namen Szamoyed (ist sovil gesprochen als sich selbs essend) nent / da hat man vil des gefügls manigerlay thier / als Zöhl / Märder / Piber / Harmbl / Feech / und in dem Mör das Thier so sy Morß nennen / Item ains haisst Weß / weisse Peern / Wölf / Hasen / Roß die sy nennen Wodwani / Walvisch / und ain Visch den sy Semphi nennen / Die leüt seind so wild / das sy recht der menschen gemainschafft fliehen / sy khumen auch nit in die Mosqua / Von der Schuchogora gmund / uber sich nach dem wasser zu dem Poyassa / Artawische / Cameni / und zu dem grossen Poiassa / seind zwaintzig tagraisen / Auff dem perg Camen seind dreyer tagraiß / so man wider darab geet / so khumbt man zu dem fluß Artawischa / darnach zu dem fluß Sibut / von dann zu dem Schloß Lepyn. Von dann an das wasser Sossa / Die leut so an dem wasser wonen / haisst man Wogolitzi / das wasser Sossa an der rechten hand gelassen / khumbt man zu dem grossen fluß Obi / der entspringt auß dem See Khitaisco / den sy khaum mit grosser arbait ain tag uberschifft haben / so groß und weit ist der fluß / auf Achtzig werst geschätzt.

     An dem wonen auch Wogulici und Ugrici / Von dem Schloß Obea uber sich nach dem wasser der Obi / zu dem gmund des fluß Irtischa / darein die Sossa felt / seind dreyer Monath tagraisen / An den ortten seind zway Schloß Jeron und Tumen / den seind fürgesetzt die Herrn Khnesn Juhorskhi / wie sy sagen dem Großfürsten zinßpar / da seind villerlay thier und gefül.

     Von der Irtische gmund zu dem Schloß Grustina seind zwayer Monatraisen von dann zu dem See Khithay nach dem fluß Obi/ der darauß entspringt / seind meer dann dreyer Monat raisen.

     Von dem See khomen Schwartze leüt / die der gemainn red mangln / verkhauffen manigerlay waarn / sonderlichen Perln und Edlgestain / von denen khauffen die völckher Grustintzi und Serponowtzi die wonen in dem Schloß oder Stat Serponow.

     LUCOMORYE uber den fluß Obi in gepürgen gelegen / denen aber zu Lucomorye sol was järlichen zuesteen / acht ich gleichwol meer ain fabl / dann war sein / Nemblichen sollen sy järlichen am Sibenundtzwaintzigisten tag Novembris (an dem tag halten die Reissen Sant Georgens tag) sterben / darnach im Frueling am Vierundtzwaintzigisten tag Aprilis wider erquickhen.

     Mit denen halten sy Serponowtzi / und Grustintzi ain sondere handlung / Wann denen jr zeit khumbt zum sterben oder schlaffen / legen sy jre waarn an ain ort / dargegen legen die Grustintzi / und Serponowtzi in gleichem werdt waaren an die stat / unnd nemen die andern hin.

     So die Lucomortzi wider lebendig werden / oder entwachen / und befinden / das jnen nit ain gleicher weert erlegt ist / so khumbts zu ansprachen und Khriegen / Nach dem Obi abwerts nach der linckhen seitten geend / seind völckher gehaissen Calami die von Obyova und Pogosa / daselbstn hin khumen sein. Nach der Obi ab zu der gulden Vetln / da die Obi in das Moer felt / seind die flüß Sossa / Berezwa / unnd Danadim / khumen al von dem perg Camen Wolschega [sic] Poyassa / entspringend / aus den selben felsen / was von denen flüssen hintzt zu der Gulden Vetlen Völckher wonen / sollen al dem Moscoviter zinßpar sein.

     SLATA BABA, sovil als ain Guldene Vetl / oder Anfrau / sol ain Abgott sein der ortten da Obi das groß wasser in das Moer felt / das Land haisst Obdora / auf der jenigen seitten des wassers / daselbstn an den gestatten des wassers / und der nächsten fluß wonen Völckher wie die Moscoviter sagen / sollen al jrem Fürsten underthenig sein / Sagen auch das khaum zu glauben ist / diser Abgot sol ain Pild sein / aines weibs / die helt ainen Sun in der schoß / in ainer zeit / hat sich noch ain ander Sun sehen lassen / wöllen sprechen sey jr Eninckhl / daselbstn sollen etliche werch oder Instrument / die ainen ewigen hall oder stimb geben / als obs Trumeter [=Trompeter] wärn / Soverr nun das ist / wirdt dermassen gestalt sein / das die Wind so villeicht für und an der orrtten sein / solchen thon geben.

     COSSIN, ain fluß von Lucomorye heer fliessend an des gmundt / ist ain Schloß das etwan Knes Wentza jnngehabt / und nunmals seine Sün besitzen / daselbsten hin von dem ursprung des Cossin / ist zwayer Monat raysen / Auß demselben ursprung khumbt ain ander wasser Cassima / das fleust durch Lucomorye in den grossen fluß Tachnin / uber denselben fluß sollen die leut manigerlay frembde gestalt haben / Etliche sollen gar rauch sein / wie die thier / ander hundtskhöpf / ander khain haubt / sonder die augen an der prust / Etliche aber khain fueß / aber lang hendt haben / So solt in dem fluß Tachnin ain Visch gefunden werden / aller gestalt wie ain mensch / haubt / nasen / augen / mund / hend und fueß / allain das khain stimb dergleichen von dem gehört wirdt / sol vast guet zu essen sein.

     Was ich hintzt heer erzelt / hab ich auß dem verzaichnen der Reissen von wort zu wort genumen / Wiewol ich waiß das vil enttzwischn unglaublich ist / hab nichts minder vil darnach gefragt / ob yemandt der solches gesehen vorhanden gewest / aber nit erfragen mügen / Dennocht hab ichs nit ausstellen wellen / ob etwan yemand merere nachfrag haben wolte.

     NOSS Reissisch ist ain Nasen damit bedeutten sy die Perg so sich in das Moer von dem andern gepürg lassen / als ain Nasen vom khopf / welche perg man Lateinisch Promontoria nent.

     SEMNOY POYAS das gepüet bey Petzora ist genent / als des Landts oder des Ertrichs gürtl / Poyaß haist ain Gürtl.

     KHYTHAI der See / davon das Land den namen hat / und darnach der Khünig des Lands / wirdt Chan zu Khithai genent / Moscoviter sprechen Chan Khithaiskhi / Chan ist auf Tartarisch ain Khünig / und nit ain hund / als etliche sprechen / Nemblichen die Walhen / als obs CAN oder CANIS hieß.

     LUCOMORYE ist ain gegent neben dem Moer / höltzer und wälder / darinnen leut on heuser in huetlen wonend / und wiewol die beschriben Rayß setzt manigerlay völckher zu Lucomorye / dem Großfürsten gehorsamen sollen.

     So hat doch der Tartarisch Khünig zu Tumen dem Moscoviter neulichen grossen schaden gethon / wol zu gedenckhen / solche völckher möchten mer demselben Tartarischen Khünig / als nächstem gehorsamb laisten.

     PAPIN oder Papinowgorod Schloß und Stat bey dem fluß Petzora / und die völckher haissen Papini / haben gar ain andere sprach von der Moscovitischen / uber denselben fluß seind hohe gepürg / gar an das gestat des wassers rainend / Derselben gepürg höhe von wegen der unaufhörigen wind / seind ploß one graß und holtz / dasselb gepürg hat gleichwol an vil ortten villerlay namen / in der gmain aber nent mans / des Landes oder Ertrichs gürtl.

     In denselben zuchten und wonen die Geerfalckhen / Czederpaum sollen der orten wachsen / neben denen seind die schwertzesten Zobl.

     Die perg möchten villeicht RIPHEI oder HIPERBOREI sein / davon vil der alten geschriben haben / die mit ewigem Schnee bedeckht sein sollen und mit grosser beschwerde darüber zu khumen sey / und das Engronen land unbekhant verhelt.

     Diser Basilius hat meer frembde land zu bekhumen / uber die gepürg / zwen Haubtleut durch Permiam und Petzoram geschickht / den Khnes Pheodorowitz Kurbskhi / auß dem geschlecht der Jaroslawskhi / und Khnes Petern Vschatoy / Und nach dem der Khurbskhi noch in leben zu mein zeitten was / und ich den sachen nachgefragt / hat er mir empotten sy wären Sibentzehen tag gangen / und dennocht die rechte höhe nit erraicht die sy STOLP als ain seil nennen / das gepürg zeucht sich hintzt an die Dwina und Petzora / da die zwen fluß in das Moer lauffen / sovil von der Rayß.

 

Nunmals khumb ich wider
an die Moscovittische Fürstenthumer.

     SUSDALI ain Fürstenthumb / sambt Stat unnd Schloß aines namens / da wont auch ain Bischoff / gelegen zwischen Roß[t]ow / und Wolodimeria / alle weil die Reissische Großfürsten jr geseß zu Wolodimeria gehabt / ist das under andern der namhafftigisten Fürstenthumer ains gewest / und der nahent umb gelegnen Stet ain Haubtstat / So pald aber die Fürsten jren sitz in die Mosqua ubersetzt / ist dises Fürstenthumb den andern oder nachgebornen / als des Großfürsten bruedern zuthailt worden / Auß welchen Basilius Schuiskhi mit seines brueder Sun / die noch zu unsern zeitten zu der Mosqua lebten / durch des Basilij vater / den Hannsen des Fürstenthumbs entsetzt seind / Ain namhafftiges Frauen Closter ist daselbsten / darein diser Basilius erstes weib Salomeam gestossen hat / undter allen des Großfürsten Fürstenthumern ist Resan das vordrist / nach dem Jaroslaw Rostow / Pereaslaw / Susdali / und Wolodimeria an der fruchtperkhait des Ertrichs.

     CASTROMOWGOROD, Schloß und Stat an der Wolga gestat / in Sumers Aufgang von Jaroslaw ungefärlichen zwaintzig meil / von dem Neugartn bey viertzig / das wasser des namens Costroma felt daselbstn in die Wolga.

     GALITZ ain Fürstenthumb Schloß und Stat / wann man auß der Mosqua durch Castromowgorod / in Aufgang zeucht / so khumbt man daheer.

     WIATKHA ist ain Land uber den fluß Kama / in Sumer Aufgang bey hundert und fünfftzig meyllen / den nächsten weg daselbstn hin / von der Mosqua doch der beschwärlicher durch Castromovgorod / und Galitz / dann zwischen Galitz und Wiatkha an das / das sovil gmöß und wälder seind / So wonen auch daselbstn die völckher Czeremissa / die straiffen und rauben / darumb so ziehen sy gemaingelichen durch Wolochda und Ustyug / ist wol verrer aber bequember und sicherer.

     Wiatkha ist von Ustyug hundert unnd zwaintzig meyl / von Casan sechstzig meyl / das Land hat mit dem wasser ain Namen / an demselben gestat seind die nachvolgunde Schloß Clinowa / Orlo / und Slowoda / Orla ist vier meyl undter Clinowa / darnach sechs meyl gegen Nidergang abwerts Slowoda auf dem wasser Retzitza / so von Aufgang zwischen Clinowa unnd Orlo in die Wiatkha rint / ist das Schloß Cotelnitz acht meyl von Clinowa / das Land ist gemösig und unfruchtpar als ain freyung der enttrunnen khnechten und ublthäter. Wildprädt / Visch / Hönig und Feech hat es genueg / die Tattern haben vasst darinnen geherrscht / und noch an paiden landen / des wasser Wiatkha hintzt die in Camam einfelt / die Cama fleust zwelf meyl under Casan in die Wolga / an dem wasser ligt Sibier das Land.

     CZUNKHAS ist ain namen der meylen / wie mans der ortten rayt / unnd ain Czukhas hat fünff werst / als ungeuerlichen ain Teütsche meyl.

     PERMIA ain groß und weits Land / darumb nennen sy es die groß Permia / von der Mosqua zwayhundert und fünfftzig / ander aber sagen dreyhundert meyl / zwischen Mitternacht und Aufgang / hat ain Stat auch Permia genant / an dem fluß Wischora der fluß zehen meyl darundter in die Cama felt / daheer khan man Sumers zeitten der vil gemöß und wasser halben / nit wolkhumen / aber im Winter wol / wil man dann ye im Sumer dahin raysen / so mueß man an die fluß Wolochda / Ustyug / und Witzechda (diser felt zwelf meyl undter Ustyug in die Dwina) khomen / und nach den wassern schiffen.

     So man dann auß Permia nach Ustyug raist / mueß man nach dem wasser Wischora uber sich schiffen / khumbt dann in etliche andere fluß / und uberzeucht am Land etliche mal / das Schiffl / von ainem Pach in den andern / so khumen sy auf dreyhundert meyl / also zuraitten gehn Ustyug / man findt selten prot in dem Land / Den Tribut den sy dem Großfürsten järlichen geben / verrichten sy mit Pherdten und gefül / haben jr aigne sprach / auch aigne schrifften / die ain Bischoff Stephanus genant / als er sy schwankhund im glauben wider bestättet hat / erfunden.

     Der Stephan ist bey zeitten Demetri j Johannis Sun Großfürsten undter die heiligen gezelt worden / hievor haben dise Permier ainen Bischoff geschunden / Man findt noch in den wäldern die Abgöttereyer / so ziehen ye die Reissische Münich oder Ainsydl daselbstn hin / und befleissen sich / die zu dem rechten glauben zubekheren / unnd thuen das noch / man raist allermaist an den ortten an Archtachn. ARTACH ist ain holtz wie ain Pret ainer zwerchen handt prait geschnitten / ungeverlichen zwo daum eln lang / vornen wenig erhoben / in der mitte an örtern sovil erhoben / das ainer den fueß entzwischen setzt / an dem erhobnen holtz seind löcher damit den fueß hintzue pinden mag / So dann der Schnee erhertnet oder ruffen gewindt / ferdt ainer ain fern weeg aines tags / helt ain clains Spiessl in der handt / wann es von ainer höch abgeet / oder sich zum faal geben wil sich steurt oder behilft / deren ortten raist man vasst mit solchen Artachn / Sagen auch das sy grosse hund haben / die Schlitten ziehen / und das Land sol gegen Aufgang dem Tatarischen Land Tumen genant / anrainend sein.

     IUGARIA auf Reissisch schreibt mans gleich wol mit dergleichen Puechstaben / sy sprechens aber nit also auß / sonder Juharia / Juhra / Juhrici / von dannen sollen die Hungern heerkhomen sein / und das Land so sy yetz besitzen / haist von alter Panonia / Des sich die Moscoviter berüemen / das jre Underthonen den grossen thail EUROPE bezwungen haben / Der clain Georg Griech Schatzmaister / hat in meiner [E]rsten Potschafft und handlungen seines Fürsten gerechtigkhait zu Lithen und Poln darmit darbringen wellen / nachdem seines Herrn Underthon Juhrici gar zu dem gemöß Meotis / sich darnach in Panoniam zu der Thunaw nider gelassen / darvon dan der namen des Hungerlandts heerkhumbt / von dan dem Märher land nach dem fluß March den namen gegeben unnd Poln von Polle (sovil als veld genent) eingenumen / und uberkhumen haben / von jres Khünigs Brueder Ofn genent / was der gesagt / solches schreib ich yetz darvon / ich waiß das ander anderst schreiben / Sy sagen auch das die Juchri noch auf heut wie die Hungern / die sprach haben / ich möchte aber khainn zu wegen bringen / damit mein Diener nuer etliche wort mit jme geredt / oder von jme verstanden hette / die sollen auch nuer gefüll zu Tribut geben / wiewol sy auch Perl und Edlgestain in die Mosqua zuverkhauffen bringen / aber sy habens im Land nit / sonder uberkhumens von dem gestat des Moers / nit verr von dan da Dwina einfelt.

     SIBIER ist ain Land raint an Permia und Wiatkha / hab nit erfragen khunnen / ob auch Schlösser und Stet darinnen waeren / in dem Land entspringt der fluß IAICK der rint in das Moer Lateinisch CASPIUM, Reissisch CHWALINSCO genant / ist den Tattern und andern zuberauben gelegen / und sonderlich dem Tater Schichmamai / haben auch jre sondere sprach / da findt man die schönisten und grösten Feech / oder Grabwerch / Als ich zu ersten mal in der Mosqua was / hab ich derselben gesehen / hernach nimer.

     CZEREMISSN seind völckher underhalb des Niderneugarten / wonend in wäldern mit aigner oder sonderer sprach / seind Machometisch glaubens / dem Künig zu CASAN gehorsam / gleichvil derselben seind hievor dem Moscoviter zinspar gewest / und die Moscoviter wellen sy noch für jre Underthonen haben / darumb ich sy auch hieheer gesetzt.