Tractat von den landen Scithia

J4r

________________________________________________________

<fol. J IIII> weeleydig das es zuo verwundern ist / und also ligen sy mer malen ob und besonder so sy verfürt werden in die tieffen gemöß / im schnee oder eyß unnd der geleichen sorgklichen örter / da sy auß bestendigkait und beharrung den merer tayl ob sigen. Die Scithi seind hübsch und schön leut / und zuo Alkeyro under den verkaufften Mamalucken unnd Armiralden so maist tail dises stamm seind wie gesagt ist / so seind sy mann aines grossen ansehens / jre weyber seind in jrem landden frömbden mannen vast haymlich und freuntlich. Sy geprauchen sich gemaincklich des ampts der wirtschafft / beherbergen jederman mitt lieplicher erzaygung / den wirt und den gast nennen sy yeden geleich Conacco / ist als vil in teutsch gesprochen als ain wirt zuo abschyd des gastes beglayt jn der wirt biß zuo ainer andern herwerg / und beschützt jn getreulichen vor aller not biß in das leben zuo jm setzend und wiewol als gesagt ist vil unnd grosse rauberey in den selben landen beschicht unnd die rauberey ain rechtfertig handlung unnd gewinist / so seind sy doch den beherbergten vil freuntlicher beweysung / lassen sy jre junckfreylin allenthalb betasten und angreiffen / von dem haubt biß auf die füß / besonder in peysein jrer gesipten / doch mitt verhüttung letster unzymlicher werck. So der gast ruoet / schlaft oder wacht besuochen sy jm die flöch oder ander unzifer nach gelegenhait des lands und jrer gewonhait / Die junckfreuwlin paden sich nackent in den flüssen / von yederman gesehen / unnd ain grosse zal der hübschen Creaturen mag man alle zeit sehen / vast weiß und wolgestalts leybs. Ir narung ist der merer tail vonn vischen / sunderlich aines geschlächts Anticei dißsmals von jnen auch von Strabo also genannt / aber in der aygenschafft ains Stör / grösser unnd klainer. Sy trincken das wasser der selben flußs / vast gesuntlich der deüwung. So geprauchen sy sich allerlay wildbrechts / und des haimischen flaisches / weder Korn Waitzen / noch wein haben sy nicht / Aber auß hirsch und etlichem anderm getrayd / machen sy prot und gemüß / syeden auch darauß getranck unnd pyer / das sy Boza hayssen / für wein machen sy getranck auß hoenig das wir mäet