Das Liederbuch

Bl. 115v-116v (II, 40)

____________________________________________________________

Ain neẅes Jar ym ‹siben› vnd viertzigisten

Meins hertze‹n› Schlos, meiner fräden schrein,

Ich main dich, lieplichs fräwelein,

Mit triuen zwavr on als geuar,

Des wünsch ich dir ain säligs Jar,

5

Zu disem Neẅ gelück vnd hail,

Auch alles gůtz ain Michel tail.

Fräd, lust vnd wunn in eren

Müsz dir der obrost meren,

Der vns ietz Neẅgeporen ist,

10

Meins hertzen du gewaltig bist

Allain mit allem recht.

Ich bin deiner eren knecht

Mit willen lang beliben,

Lasz mich nur vnuertriben

15

In deinem dienst bestavn.

Wes gůten ich dir gan,

Des ist chain end ze sagen,

Sich mert von tag ze tagen

Mein lieb vnd stätte triu

20

Gen dir on affterreẅ.

Nach dir mi‹ch› v:bt belangen,

Nun bin ich dein gefangen,

Des ich dir ye vergich.

Du hast geschätzet mich

25

Vmb hertz, můt vnd syn,

Darumb ich gantz aigen bin

Dein vor aller welt.

Was deiner lieb geuelt,

Des bis von mir gewert,

30

Ich pleib dein vnuerchert;

Tů widerumb, als ich dir traw.

Meins hertzen schatz, mein liebste fraw,

Lasz mich in dein genaden,

So mag mir nichtz geschaden,

35

Empfach mich vff das Neẅ

In deines hertzen triu.

Gib mir ‹ai›n friuntlich wort,

Damit wirt mir erstort

Meins hertzen swär vnd pein.

40

Schliusz mich in die arme dein

Vnd schmuck mich an dein prust,

So hab ich grössern lust,

Dann yemantz der vff erden lebt.

Mein hertz in hochen fräden s‹w›ebt

45

Wann es dein triu bedenckt.

Chain vnmůt mich bekrenckt,

So ich dein Er vnd wirde misz,

Alles traurens ich vergisz.

Du bist meins hertzen spiegel

50

Vnd meiner fräden sigel,

Zu dir statt all mein hoffen,

Du hast mich ye getroffen

Mit deiner triue sper,

Kains Artzatz ich beger

55

Dann dein, bis an meins endes zil.

Halt vest, als ich dir trawen wil!