Buch der Natur

V. VON DEN KRÄUTERN

IN AINER GEMAIN.

___________________________________________________

87.

Von dem zitwar.

Zeduarium oder zeduara haizet zitwar. daz ist ain kraut daz wechst in den landen gegen der sunnen aufganch. pei des krautes wurzel wehset diu wurz, die wir zitwar haizen, und wehst auch in dem land Italia. der zitwar ist der pest, der etwaz gelvar ist und der scharpf und pitter ist auf der zungen. er ist guot für die wind in dem leib und für die darmgiht und für etleich stechent smerzen. diu sals, die man macht auz seinem pulver, ist guot für die âmaht und für daz swinteln, daz ze latein syncopis haizt, und pringt lust zuo ezzen.