Buch der Natur

V. VON DEN KRÄUTERN

IN AINER GEMAIN.

___________________________________________________

86.

Von dem ingwer.

Zinciber haizet ingwer. daz kraut wehst in dem lande India und diu wurz, die wir ingwer haizen, wehst pei des krautes wurzel. ez ist zwaierlai ingwer. ainer ist wild und ist der er under den wurzen, und der ist scherpfer auf der zungen wan der haimisch. der ander ist haimisch und der ist diu si in der art und der ist waicher und weizer wan der wild und ist auch pezzer. er ist guot für die kelten der prust, wenn diu kümt, und ist dem kalten magen gar guot und entsleuzt den muossak und verzert die übrigen fäuhten in dem leib. zuo den gepresten allen ist der ingwer guot, wenn man in mit wein seudet oder der in kewt in dem mund und in izzt. wer des ingwers pulver in träufen in diu augen tuot, dem werdent si clâr. sein electuari, daz diacinciber haizt, daz ist kreftiger zden vorgenanten dingen wan der ingwer sust.