Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

27.

Von dem storax.

Storax ist ain paum, der wehst in dem land Arabia, sam Platearius, Plinius und Isidorus sprechent, und geleicht nâhen ainem malgrampaum. des paums gärtel lâzent zäher in tropfen weis, wenn der stern auf gêt mit der sunnen, der canis haizt, und wenn der zaher auf die erden gevellet, sô ist er niht rain; welher aber an den ästleinn beleibt hangend und an den hälmeln, der ist rain und weiz. dar nâch wirt er goltvar von der sunnen hitz. der zaher ist vaizt und vol harz und ist gar ains wunnicleiches smackes, und wenn man in fäuht, sô gibt er ain honigsüez fäuht. der lai zaher ist guot, der fäuht wirt wenn man in handelt mit den henden, und der aller pest smeckt, der ist guot wider die kelten und wider die krankhait des magen und treibt die fäuht auz dem hirn und rainigt ez; iedoch macht er daz haupt wêtuond. ander maister sprechent, daz der zaher köm von dem ölpaum, der in der môrn lant wahs, und daz er zwaierlai sei; der ain vleuzt willicleich von dem paum und ist gel und goltvar, den haizt Constantînus calamitum; der ander kümt von dem, daz man die rinten des ölpaums seudet, und der ist swarz und fäuht und haizt in Constantînus sigia.