Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

26.

Von dem mirrenzaher.

Ptacten, sam die maister sprechent, ist ain zaher, der fleuzet von dem mirrenpaum. wenn der zaher hert wirt, sô hât er den namen, aber er ist verr scherpfer wan der mirr selb, der fäuht ist und wolsmeckend. etleich sprechent, daz der zaher vliez von dem gar alten mirrenpaum, wenn der wol erhitzet von der sunnen. die andern sprechent, daz der reht mirrenpaum in etleichen landen den zaher pringet ân daz, daz er sô gar alt sei, wan daz ist gar mügleich, daz von der selben lai paum in ainem land vil pezzer zaher vliez wan in dem andern, reht sam der vaizt waiz ist in ainem land verr pezzer wan in dem andern.