Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

25.

Von dem taubenpaum.

Peridixion ist ain paum, der wehst in dem land India und haizt kriechisch alsô, aber er mag ze däutsch der taubenpaum haizen, und dar umb, daz ainerlai tauben des paums früht wunderleichen gern ezzent, und ist sein fruht süez, sam Isidorus spricht, und die tauben habent vrid under den esten und under dem schaten des paums von ainerlai slangen. von dem paum hab wir mêr geschriben, dô wir von den tauben schriben.