Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

19.

Von dem arabischen zaher.

Gummi arabicum haizt ain arabischer zaher. der zaher hât den namen dar umb, daz er von ainem paum vleuzt, der wehset in dem land Arabia, sam Platearius spricht, und der zaher ist haiz und fäuht und ist dreier lai. daz ainr lai ist weiz und daz ist der pest. daz ander ist gel und daz dritt undergel oder gelblot. der zaher hât die art, daz er fäuht macht und zesamen leimt und entlæt und sänftigt. wem diu zung rauch ist, der leg den zaher in ain wazzer, unz daz er slipfrig werd und reib dann die zungen dâ mit. man schol in auch geben für daz wüllen oder für die undäw, diu von krankhait kümt. sein pulver mit cinamomespulver ist guot für die kalten und die trucken huosten, und wider der prüst dürr schol man wazzer sieden mit dem zaher und mit gersten und schol daz trinken. er ist auch für des feurs prunst guot, ist daz man seinen pulver mischt mit ainem weizen ains ais und legt ez auf die stat.