Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

15.

Von dem diadragant.

Diadragantum ist kalt und fäuht, sam Platearius spricht, und ist ain harz oder ain zaher, der fleuzt auz ainem paum gegen der sunnen aufganch, wenn in diu hitz dar auz twingt. der weiz diadragant und der lauterist ist der pest, aber der rœtlot ist der pœst. er hât die art, daz er die hitz sänftigt und labt und macht fäuht und rainigt daz gesiht allermaist, wenn man ain electuari dar auz machet, sam geschriben ist in antidotario. wer auch ain gargelwazzer dar auz macht, daz ist guot wider der prust siehtum, und daz selb ist auch guot wider die huosten, diu von hitz kümt der gaistleichen gelider: wenn man den diadragant zerlæt in warmem gerstwazzer und tuot dar zuo den zaher, der gummi arabicum haizt, und gorgelt in der keln dâ mit, daz ist gar guot wider die kalten huosten und wider die dürren der prust.