Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

14.

Von den kubeben.

Cubebe haizent kubeben. die sint mæzicleich haiz und trucken, sam Platearius spricht. diu fruht wehset auf ainem paum gegen der sunnen aufganch. die pesten sint die mæzleich wol smeckent. man schol die kubeben erhitzen und zerreiben und für die nasen haben, daz ist guot für den kalten hauptfluz, der reuma haizt, und sterket daz hirn, und wenn man si kewet, sô schol man si lang in dem mund haben, unz der dunst auf gê in daz hirn, daz ist dem haupt gar gesunt.