Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

13.

Von dem cappar.

Capparis haizt ain cappar. daz ist ain staud, diu wehset gegen der sunnen aufganch und ist haiz und trucken, sam Platearius spricht, und wehst auch in Püllen und in Romania, ez ist aber niht als kreftig. der stauden wurz, rinden, plüet und pleter sint guot zuo erznei. wenn man sein rinden ab zeuht, sô legt man si an die sunnen und derrt si und diu ist r&1#156;tlot und pitter. wer si seudet mit wein, sô ist si guot für des milzes laster und für der lebern hertikait. man schol sein plüet samnen die weil si runzlot sint und noch niht gepraitt, und schol si machen mit salz und mit ezzeich. die habent die kraft, daz si den lust erweckent ze ezzen und kochent die fäuht in dem magen und lutzent den kalten magen.