Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

5.

Von dem bidell.

Bidellia haizt ain bidell. daz ist ain paum, der wechst in Arabia. des paumes zäher ist scheinig und weizlot und ist leiht und gleichvirbich, und der ist der pest, der leiht waich wirt und der niht gemischt ist mit erd und mit holz, und der pitter ist guotes smackes, aber er zepricht sein ê, wenn man andern zäher dar zuo mischt, der niht sô pitter ist in dem munde. Platearius spricht, daz der zäher ain kraft hab zesamenziehen und zuoziehen. er hailt des leibes hinlauf, der von der scharpfen colera kümt in dem leib. er hailt auch die geswer, diu man apostem haizt, inwendig und auzwendig dâ mit salbet, und zepricht den stain in der plâtern. er hailt krefticleich ains töbigen hundes piz oder ander wunden oder des mannes gezeuglein, wenn man in mit ezzeich twirt.