Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

4.

Von dem cardamom.

Cardamomum haizt ain cardamom, daz ist amomo geleich und ist ain staud, diu pringt ainen länkloten sâmen. der paum ist vierlai. ainer ist gar grüen und vaizt mit scharpfen stichlingen und laidigt den, der sein haut dar an reibt, und derlai ist der aller löbleichist. der ander ist ain wênich rôt mit ainer weiz gemischt. daz dritt ist kurz und swarz. daz vierd ist manigverbig und hât klainen smack und mag man ez leiht zereiben, und daz acht man für daz pœst. daz pest ist, daz aller edelist smecket und ain süez dar ein gemischt ist. daz holz hât die kraft, daz ez die nâtûr kreftigt mit seinem guoten smack und daz ez entlœst und verzert mit seiner art, wan ez ist haiz und trucken. daz holz ist auch guot wider die krankhait des magen und hilft zuo dem kochen in dem magen und ist guot wider den swintel und wider die âmaht und wider daz wüllen, wenn man ez in den munt legt. nu macht dû sprechen: diu dinch sint gar guot und nütz menschleicher art, aber wâ nim ichs? wærleich, si wachsent gar verr in meim garten! aber hâst dû guot und golt, dû machest dir vil ding nâhen und holt, die kaufläut varnt verr.