Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

2.

Von dem aloes.

Aloes ist ain holz und ist ain paum, der wechst in dem land India und in dem land Arabia, sam Isidorus spricht, und hât gar ainen guoten süezen smack. man nützet daz holz zuo den ältern in den gotshäusern, reht sam man tuot daz thymiama, daz von dem paum thymus kümt, dâ von wir vor gesagt haben. die andern maister sprechent, daz daz holz köm von dem irdischen paradis in vliezenden wazzern und daz man ez mit netzen in den wazzern auf vâch. welhez holz under derlai holz swær ist und knorrot in seiner art, daz ist daz pest und ist gar wolsmeckend. ez ist underpitter, alsô daz ez niht gar pitter ist, wenn man ez auf die zungen legt. ez ist auch underswarz oder underrôt an der varb; ez læt sich niht mit den zenden leiht prechen. wenn man ez keut und in dem mund helt, daz ist dem hirn guot von dem edelem smack, der dâ von gêt. ez ist auch für die krankhait des magen, der lebern, des hirns und des herzen guot und wider daz verliesen der frawen gewonhait, wenn si der niht gehaben mügen, wider der prust siechtuom und wider ander krankhait der gelider, die von kelten koment. der wein, der mit dem holz gesoten wirt, der ist auch gar guot wider die vor genanten siechtüem, und wer den dunst mit der nasen in sich zeucht, der von dem sieden gêt, daz pringt dem kalten hirn vil gesunthait. wer daz holz pulvert und nimt nägelpleter und daz pain, daz in ains hirzen herz ist, und pulvert diu auch und reibt den pulver zesamen mit paumöl und salbet ainem hann sein haupt dâ mit, der singt tag und naht niht.