Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

1.

Von der salben aloe.

Aloe ist ain salb, haiz und trucken mit seiner kraft, sam Plinius spricht. daz macht man auz dem saf des krautes, daz aloe haizt, und macht ez alsô. man zestœzt daz kraut und druckt daz saf dar auz und seudet ez lang pei ainem feur und setzt ez dann an die sunn und behalt ez. daz obrist ist daz lauterist und haizet epaticum, dar umb, daz ez der lebern guot ist. daz ander dar nâch haizt citrinum und daz ist niht sô lauter sam daz êrst. daz unterist ist trüeb und gerbig und haizet caballinum. diu obern zwai sint an der varb gel, aber daz ander ist niht sô gel sam daz öbrist und daz unterist ist swarz. die aloe alle sint gar pitter und menschleichem munde widerzæm. daz aloe hât die art, daz ez diu zeprochen pain wider genzt, wenn man ez auzwendig dar über pindet, und hilft für der vergiftigen tier piz. aber wenn man ez inwendig nimt, sô fürbt ez den leib von der fäuhten, die man flegma haizt. ez hât auch die kraft ze rainigen und ze auztreiben die fäuht, diu melancolia haizt, und ze sterken diu glider, und dar umb ist ez guot wider überflüzzichait der fäuhten, die in dem magen beslozzen sint. ez macht daz haupt gesunt, daz siech ist von räuchen und von dünsten, und macht diu augen clâr. ez öffent daz verschoppen des milzes und der lebern, ez erlescht die überflüzzichait der gelider und allermaist umb die schämigen stet. ez macht daz antlütz schœn, daz entverbet ist von swerz. wie daz sei, daz aloe dem mund pitter sei, doch ist ez dem magen süez, dar umb haizt ez in erznei epiglostomachon, daz spricht: dem magen süez. man schol ez geben mit herbem wein oder mit wermuotsaf.